Iperiu 12 - Ai Vola Tabu Ena Vakavakadewa Vou

Na i Lala i Vakadinadina Levu

¹ Ia vei keda, era sa vakavolivoliti keda talega e dua na i lala i vakadinadina levu. O koya oqo me da biuta laivi sara kina na veika kecega era vakabibitaki keda tu kei na i valavala ca sa kabiti keda matua tiko, ka me da ciciva tikoga ena yalodei na veisisivi sa tu e matada.

² Me da raici Jisu matua tikoga, o koya sa vakatekivuna ka na vakataucokotaka talega na noda vakabauta. A sa sega vakadua ni soro ena vuku ni kauveilatai! Ia, ena vuku ni reki sa waraki koya tu, a sa sega ni maduataka kina na mate ena kauveilatai ka sa dabe tiko edaidai ena liga i matau ni tikotiko vakaturaga ni Kalou.

³ Ni vakasamataki koya mada sa vosota na veivakacacani levu era vakayacora vua na tamata i valavala ca! O koya oqo, ni kakua sara kina ni yalolailai se soro koso.

⁴ Ena nomuni veivorati kei na i valavala ca, o ni se sega mada ni vala me la'ki yacova sara na vakadavei ni nomuni dra.

⁵ O ni sa guilecava li na vosa ni veivakayaloqaqataki ka a tukuna vei kemuni na Kalou me vaka o ni sa luvena? “Na luvequ, kakua ni vakawaletaka na veivakadodonutaki ni Turaga, Mo kakua ni yalolailai ni sa vakanakuitataki iko o koya.

⁶ Ni sa dau ia na veivakadodonutaki na Turaga vei ira kecega sa lomana, Ka vakanakuitataki ira sa okata o koya me ra luvena.”

⁷ Ni vosota na veika rarawa ena vuku ni veivakadodonutaki, me vaka ni ra i kuita ni dua na tama; na nomuni vakararawataki vakaoqo sa vakaraitaki kina na nona sa okati kemuni na Kalou mo ni luvena. O cei na gone sa sega ni bau cudruvi koya o tamana?

⁸ Ia kevaka o ni sa sega ni cudruvi ena nomuni vakadodonutaki, me vaka ni ra sa cudruvi kecega na luvena, sa kena i balebale o ya ni o ni sa vaka na gone sa sega ni vakatamani, ka sega ni luvena dina.

⁹ O ira talega na tamada vakayago era sa dau vakadodonutaki keda, ia eda sa dau dokai ira kina. E sega li ni ganita cake me da vakayalomalumalumutaki keda vua na Tamada vakayalo, ka me da bula kina?

¹⁰ O ira na tamada vakayago era sa vakadodonutaki keda vakalekaleka ga, me vaka na veika era sa nanuma; ia sa vakadodonutaki keda ga na Kalou me da vinaka kina, ka vakaivotavota ena nona yalosavasava.

¹¹ Ena gauna eda vakadodonutaki kina, sa vaka me ra ka mosimosi kecega na veika e sotavi, ka sega ni ka me da marau kina. Ia kevaka eda sa vulica rawa kina na bula ni talairawarawa, eda na vuataka na vua ni yalododonu kei na tiko vakacegu.

Na i Vakavuvuli Eso

¹² O koya oqo mo ni qai laveta cake na liga sa oca vakalevu, ka vakaukauwataka na duru sa malumalumu.

¹³ Ni muria voli ga na sala dodonu, me kakua kina ni vakaleqai na yava sa lokiloki, ia me vakabulai ga.

¹⁴ Ni tovolea vakaukauwa mo ni tiko veilomani kei ira kecega na tamata ka bula voli ena yalosavasava, baleta ni na sega ni raica rawa na Turaga e dua na tamata ke sega ni yalosavasava.

¹⁵ Ni qarauna me kakua ni dua me vakanadakuya na lolomasavu ni Kalou. Ni qarauna talega me kakua ni dua e yaco me vaka na kau gaga sa tubu cake ka vakavu leqa vei ira na lewe vuqa ena vuku ni kena gaga.

¹⁶ Ni qarauna me kakua ni dua e yaco me dau kitaka na i tovo vakasisila ni yago se me sega ni vakabauta na Kalou me vakataki Iso, o koya sa volitaka na nona i tutu vakaulumatua ena duabulu ga na kakana.

¹⁷ O ni sa kila ni a qai vinakata emuri o koya me ciqoma na veivakalougatataki i tamana; ia sa sega ga ni vakadonui, baleta ni sa sega ni kunea e dua na sala me veisautaka tale kina na ka sa yaco oti, ka dina ga ni a vakasaqara matua sara na veivakalougatataki ena nona tagicaka.

¹⁸ O ni sa sega ni lako mai ki na dua na vanua o ni rawa ni raica ka tara me vakataka na Ulunivanua o Saineai kei na kena bukawaqa caucaudre, na o loaloa kei na butobuto, na cava,

¹⁹ na rorogo ni davui, kei na voqa ni dua na domo. Ni ra rogoca na tamata na domo o ya, era sa qai vakamamasu me kakua tale ni qai cavuti e dua tale na vosa vei ira,

²⁰ baleta ni ra sa sega ni ciqoma rawa na i vakaro ka sa tukuna vakaoqo, “Kevaka e mani dua sara mada ga na manumanu yavaiva e tara na ulunivanua, me na vakaviriki ena vatu me mate.”

²¹ Io sa vakadomobula dina na kena i rairai na ka o ya, ka sa kaya kina o Mosese, “Au sa sautaninini ena rere!”

²² Ia oqo, o ni sa qai lako mai ki na Ulunivanua o Saioni kei na koro ni Kalou bula, o Jerusalemi vakalomalagi, kei ira na udolu vakaudolu na kena agilosi.

²³ O ni sa lako mai ki na nodra soqoni rekitaki na ulumatua ni Kalou, ka sa volai tu mai lomalagi na yacadra. O ni sa lako mai vua na Kalou, o koya sa lewai ira kecega na tamata. Era sa tiko talega kina na yalodra kecega na tamata yalododonu era sa vakataucokotaki ka vinaka sara.

²⁴ O ni sa lako mai vei Jisu, o koya sa vakayacora na veiyalayalati vou ni Kalou vata kei keda, kei na nona dra kureitaki ka sa cavuti kina na vosa vinaka cake sara mai na kena e cavuti me baleta na dra i Epeli.

²⁵ Ni qarauna vinaka mo ni kakua ni besetaka na vakarorogo ki vua sa vosa tiko vei kemuni. O ira vakayadua sa besetaka me ra vakarorogo ki vua sa vakadewataka na i tukutuku vakalou e vuravura era sa sega ni dro bula rawa. O ni sa nanuma li ni rawa mo ni dro bula kevaka o ni bese ni talairawarawa vua sa vosa vei kemuni mai lomalagi?

²⁶ A sa vakayavalata na vuravura na domona ena gauna o ya, ia sa yalataka ga o koya vakaoqo edaidai, “Au na vakayavalata vakadua tale mada na vuravura, io, kei na lomalagi talega.”

²⁷ Na mala ni vosa oqo na “vakadua tale mada” sa dusia na kena biu tani vakatikitiki na veika sa vakayavalati rawa, o ya na veika buli, ka me qai vo tiko mai na veika tudei sa sega ni vakayavalati rawa.

²⁸ O koya oqo me da ia kina na vakavinavinaka, baleta ni sa soli me noda na matanitu sa sega ni vakayavalati rawa. Me da marau ka cuva vua na Kalou ena sala sa lomavinaka kina o koya, ena vakarokoroko kei na rere;

²⁹ ni sa bukawaqa dau veivakarusai na noda Kalou.