Esiteri 9 - Ai Vola Tabu Ena Vakavakadewa Vou

Vakarusai na Kedra Meca na Jiu

¹ Ia ena i katini katolu ni siga ni katini karua ni vula, o ya na vula o Ata, ni a vakarau tu me vakayacori na i vakaro kei na lawa vakaturi ni tui, io, na siga dina sara ga o ya era a nuitaka tu kina na kedra meca na Jiu ni sa na nodra kina na qaqa, a qai veisau na vakanuinui o ya me ra qaqa na Jiu vei ira na kedra meca.

² Ena siga o ya era a soqoni vata kina na Jiu ena veikoro lelevu ena veiyasana era dui tu kina ena matanitu levu o Perisia me ra valuti ira na tamata era via vakacacani ira tiko. A sega ni dua tale e via saqati ira baleta ni sa tarai ira kecega na tamata na rere.

³ O ira na turaga mai na veiyasana, na vakailesilesi kei na kovana ka vaka sara talega kina na vakailesilesi ena valenitui, era a vukei ira tale na Jiu ni ra tarai ira na rere ena vuku i Motekai.

⁴ A sa yaco me tamata nuitaki ka qaqa ena valenitui o Motekai, ka sa toro cake tikoga na kena i rogorogo me yacova yani na veiyasana kece sara ena matanitu o Perisia.

⁵ Era a mani valuti ira ka vakarusai ira na kedra meca o ira na Jiu, ka cakava vei ira na ka ga era vinakata.

⁶ Ena koro turaga o Susa, era a vakamatea kina na Jiu e lewe 500 na tamata.

⁷ Eratou a vakamatei kina o Parasanidata, o Talifone, o Asepaca,

⁸ o Paraca, o Atelia, o Aritara,

⁹ o Pamasita, o Arisai, o Aritai kei Vaisaca,

¹⁰ o iratou na lewe tini na cauravou na luve i Amani, o koya na kedra meca levu na Jiu ka luve i Emitaca. Ia era a sega ga ni kauta e dua na i tokinivalu na Jiu.

¹¹ Ena siga vata o ya, a sa la'ki tukuni vua na tui na kedra i wiliwili era moku mate ena koro turaga o Susa.

¹² A qai tukutuku na tui vua na Ranadi, ka vaka: “Ena koro turaga o Susa era a vakamatea kina na Jiu e lewe 500 na tamata, ka wili kina e lewe tini na luve i Amani tagane. Sa na qai wacava li na levu ni veika era cakava ena vo ni veiyasana ena noqu matanitu! Kevaka e dua tale na ka o vinakata ena soli ga vei iko. Tukuna ga mai ka'u na vakayacora.”

¹³ A qai kaya o Esiteri vua na tui, “Kevaka o ni lomadonu kina na tui, ia me ra vakatarai tale mada na Jiu ena koro o Susa me ra cakava tale ni mataka na veika era vakayacora edaidai. Ni vakarota talega me vakaliligi ena kau ni veikuna na yagodratou na lewe tini na luve i Amani.”

¹⁴ A mani vakadonuya na tui na ka ruarua o ya, ka a tabaki ka kacivaki vakalawa mai Susa. A sa vakaliligi talega na yagodratou na luve i Amani tagane e tini me ra raica na tamata.

¹⁵ Ena mataka cake, o ya na i katinikava ni siga ni vula o Ata, era a soqoni vata o ira na Jiu ena koro levu o Susa ka ra vakamatea kina e lewe 300 tale na tamata. Ia, era a sega ga ni taura e dua na nodra i yau.

¹⁶ Era a vakasoqoni vata o ira na vo ni Jiu mai na veiyasana ena matanitu o Perisia me ra taqomaka na nodra bula. Era a vakabulai ira rawa mai vei ira na kedra meca ena nodra vakamatea e lewe 75,000 na tamata era a cati ira, ia era a sega ga ni kovea na nodra i yau.

¹⁷ A yaco na ravuravu levu oqo ena i katinikatolu ni siga ni vula o Ata. Ia ena i ka tinikava ni siga era a cegu kina ena vala. Era a caka magiti ka solevu kina.

¹⁸ Ia o ira na Jiu ena koro levu o Susa era a soqoni vata ka vala kei ira na kedra meca ena i 13 kei na i 14 ni siga, ka ra vakacegu ena i katini kalima ni siga me ra ia kina na kana magiti kei na solevu.

¹⁹ O ya na vuna era a ia kina na Jiu era tu ena veikoro lalai na marau kei na kana magiti ena i 14 ni siga ni vula o Eta, na olodei ni soqo kei na veivotai vakailoloma ni kakana.

Na Solevu ni Purimi

²⁰ A qai vola o Motekai e dua na i tukutuku ni veika a yaco oqo. A vola talega e dua na i vola veikauyaki vei ira na Jiu mai na veiyasana — o ira na yasana era tu voleka kei ira era tu yawa ena matanitu o Perisia.

²¹ Ena i vola o ya, a vakaroti ira kina na Jiu o Motekai me ra dau marautaka vakayabaki ena veigauna mai muri na i 14 kei na i 15 ni siga ni vula o Eta,

²² ka ni siga e rua oqori era a rawata kina na Jiu na nodra galala mai vei ira na kedra meca, kei na vula a vukici kina na nodra rarawa ki na marau kei na nodra tagi ki na siga ni vakacegu. Ena siga e rua o ya, me ra dau ia kina na kana magiti kei na mamarau, ka me ra dausoli loloma kina vakai ira kei ira na dravudravua.

²³ Era a muria na i vakaro nei Motekai na Jiu, ka sa yaco na solevu o ya me dau vakayacori ena veiyabaki.

²⁴ Oqo me vakananumi kina na bukivere i Amani na luve i Emitaca, na kawa i Ekaki, na kedra meca levu na Jiu ena nona a cakava na Purimi, o ya me wirimadigitaka na tiki ni siga me vakarusai ira kina vakadua na Jiu.

²⁵ Ia, a sa vakaraitaka o Esiteri vua na tui na ka oqo ka sa vakarota kina na tui na i vakaro sa volai me vakayacori vei Amani na ka sa nakita vei ira na Jiu — ka ratou a vakalilici kina ena kau ni veikuna o koya kei iratou na luvena tagane.

²⁶ O ya na vuna sa vakatokai kina na olodei siga rua o ya me yacana na Purimi. Ena vuku oqo ni veika sa volai ena i vola i Motekai kei na veika era a raica ka sota kaya,

²⁷ era a lomavata kece kina na Jiu, o ira na nodra kawa, kei ira kecega era vuki me ra wili vaka-Jiu ni ra na sega sara ni vakalutuma ena dua na yabaki na nodra vakananuma na Purimi ena kena i valavala me vaka na i vakasala i Motekai.

²⁸ Na siga e rua oqo ni Purimi me dau vakananumi kina ena veivuvale vaka-Jiu yadua ena veikoro kei na veiyasana, ena veitabatamata kecega; ka me ra kakua sara ni la'ki muduka ena dua na gauna o ira se o ira na nodra kawa mai muri.

²⁹ A qai vola tale e dua na i vola o Esiteri na Ranadi, na luve i Apikali me vakadeitaka kina na veika a vola tu o Motekai e nona i karua ni vola, me baleta na Purimi.

³⁰ Era a veikauyaki na i lavelave ni vola o ya vei ira kecega na Jiu ena 127 na yasana ena matanitu o Perisia. Era vakauti vata kei na vosa ni vakanuinui ni tiko sautu kei na vakacegu,

³¹ ni ra sa na dau vakananuma na veisiga ni Purimi ena kena i loku me vaka e rau a lavaka vei ira na Jiu o Motekai kei Esiteri na Ranadi, me vaka ga na i valavala ni nodra lolo kei na vakaloloku e ra a vakotora oti tu me baleti ira kei ira na nodra kawa mai muri.

³² Na i vakaro oqo i Esiteri, a vakadeitaka na i vakarau ka dau caka ena solevu ni Purimi, ka volai talega me maroroi vakaivola.