Esiteri 7 - Ai Vola Tabu Ena Vakavakadewa Vou

Vakamatei o Amani

¹ E rau a qai lako na tui kei Amani me rau la'ki kana vata kei Esiteri.

² Ena i karua ni siga ni ratou gunu waini tiko, a qai tarogi Esiteri tale na tui ka kaya, “I Esiteri na noqu Ranadi, a cava beka o via kerea? Na ka oqori ena vakadonui vei iko. Se dua tiko beka na ka o vinakata? Kevaka o mani vinakata na veimama ni noqu matanitu, ena vakayacori oqori.”

³ A qai sauma vua o Esiteri, ka kaya, “Oi kemuni na tui, au kerea mo ni yalo vinaka ka vakayacora na noqu kerekere malumalumu oqo, o ya me'u bula kei ira kece na wekaqu.

⁴ Keimami sa volitaki oti tu me keimami vakamatei, ka vaqeyavutaki vakadua. Kevaka me keimami a la'ki vakabobulataki wale, ke'u a galu ga ka sega ni vakasosataki kemuni kina; ia keimami sa vakarau laki vakarusai vakadua - me keimami vakawabokotaki!”

⁵ A sa qai tarogi Esiteri na ranadi o Asuerosi na tui, “O cei sara mada na tamata doudou me kitaka na ka oqo? Evei na tamata oqo?”

⁶ A sauma o Esiteri ka kaya, “Na keimami meca, ka dauvakacacani keimami, sai koya na tamata ca oqo o Amani!” A sa vakaraici rau na tui kei na ranadi o Amani ena rere levu.

⁷ A tucake na tui ena levu ni nona cudru, a sa biuta na tikina o ya, ka curu yani ki na loga ni veisenikau ni valenitui e tautuba. A kila o Amani ni na totogitaki koya na tui ena vuku ni ka oqo, a sa tiko tale kina me vakamasuti Esiteri na ranadi me vakabulai koya.

⁸ Ni curu lesu tale mai na tui ki na vanua eratou tiko kina, a donuya yani na nona kolotaki koya sobu yani o Amani ena vanua e dabe toka kina o Esiteri me kere veivosoti. Ia ni raica oqo na tui, a qai kailavaka mai, “Na tamata li oqo ena kucuva talega eke na ranadi e mataqu, ena noqu loma ni vale?” Ni cavuka ga na vosa ni tui, eratou a qai ubia na mata i Amani na enuki.

⁹ A sa qai kaya o Apona, e dua vei iratou na enuki ka veiqaravi vua na tui, ‘Sa vakarautaka oti saka tu o Amani ena mata ni nona vale na duru ni veikuna me kunati kina o Motekai, o koya ka a vakabulai kemuni saka na tui. Na kena cere e 22 na mita!’ A sa qai vakarota na tui, ‘Dou la'ki vakaliligi Amani kina!’

¹⁰ Era a qai la'ki vakalilici Amani ena duru ni veikuna vata ga ka vakarautaka o koya me vakamatei Motekai kina. A sa qai seavu yani na cudru ni tui.