Esiteri 1 - Ai Vola Tabu Ena Vakavakadewa Vou

Vakasivoi Vasiti na Ranadi o Tui Asuerosi

¹ Ena dela ni nona gauna ni veiliutaki vakatui o Asuerosi, sa veiliutaki tiko mai na koroturaga o Susa.

² Era a vakarorogo tu vua e 127 na veiyasana me tekivu mai Idia ka yaco yani ki Eciopea.

³ Ena i katolu ni yabaki ni nona tui, a cakava kina o koya e dua na soqo ni kana magiti kei na veivakamarautaki me baleti ira kecega na ravouvou ni vanua, na vakailesilesi liu, na turaganivalu lelevu ni veimata i valu ni Perisia kei Mitia, na sucu turaga kei ira na kovana ni veiyasana era qali tu ki Perisia.

⁴ Me ono taucoko na vula na kena dede, sa vakaraitaka na levu ni yau e tu vua kei na lagilagi ni nona i tikotiko.

⁵ Ni oti na soqo o ya, a qai cakava tale o koya ena lomanibai ni tikotiko vakatui e dua na soqo vaka o ya me baleti ira na tagane ni koro o Susa, o ira na vutuniyau kei ira na dravudravua, ka siga vitu na kena dede.

⁶ A ukutaki tu na lomanibai vakatui ena vuqa na i latilati i sulu roka vulavula kei na karakarawa, ka vesuki vata ena lineni matailalai roka lokaloka ki na mama siliva sa nokati tu ki na veiduru vatu mapolo. Na i dabedabe eso ka buli mai na koula kei na siliva era a biu talega ena lomanibai vakatui, ka kena buturara na mapolo vulavula, kei na felesipa damudamu, kei na tinadra na mataniciva, kei na tokise karakarawa.

⁷ Era sa bilo koula na bilo ni waini, ka duidui na kedra lelevu kei na kedra i bulibuli, ka sa lomasoli na tui ena kena vakayagataki na waini vakaturaga.

⁸ A sa sega ni yalani na gunu, ni sa solia na i vakaro na tui vei ira na dauveiqaravi ni rawa me ra gunuva na levu ni ka era vinakata o ira na tamata kecega.

⁹ Ia sa cakava tale tikoga e dua na soqo ni kana magiti kei na veivakamarautaki vei ira na yalewa ena loma ni valenitui o Vasiti na ranadi.

¹⁰ Ena i kavitu ni siga ni soqo oqo ni sa gunu ka marau tiko na tui, a sa kacivi iratou na lewe vitu na enuki ka ratou nona dauveiqaravi na tui, o ya o Meumani, o Piseca, o Apona, o Pikica, o Epakica, o Seca, kei Kakasi.

¹¹ A qai vakaroti iratou me la'ki kau mai o Ranadi Vasiti, ka me daramaka tu mai na nona i sala vakaranadi. A sa yalewa matavinaka na ranadi, ka gadreva na tui me vakaraitaka na kena totoka vakaoti vei ira na i vakalesilesi kei ira kece na nona vulagi.

¹² Ia ni ratou sa tukuna vua na ranadi na i vakaro ni tui, a qai bese ni lako mai o koya. A ka oqo sa vakavuna me cudru vakalevu sara kina na tui.

¹³ A qai qara i vakasala vei ira na tamata vuku na tui era kila na ka me caka ena leqa vakaoqo, ni sa nona i vakarau tudei na tui me dau qara i vakasala vei ira era kila vakavinaka na veika vakalawa kei na veika ni veiliutaki.

¹⁴ A qai taro na tui vei iratou o Kasina, o Seca, o Atimata, o Tasisi, o Mereisi, o Masena kei Memukani — o iratou na lewe vitu na turaga ni Perisia kei Mitia e ratou taravi koya ena veiliutaki ena matanitu, ka ratou veikilai kaya sara vakavinaka.

¹⁵ A sa kaya vei iratou, “Na cava e dodonu vakalawa me caka vei Vasiti na ranadi ena vuku ni nona sega ni muria na noqu i vakaro e ratou a kauta vua na noqu i talai?”

¹⁶ Sa qai vosa o Memukani vua na tui kei ira na nona i vakalesilesi: “E sega ni cala duadua ga vua na tui na Ranadi; sa cala talega o koya vei ira kece na i vakalesilesi ni tui, io sa cala vei ira na tagane kecega ena matanitu raraba!

¹⁷ Na ka sa cakava oqo na Ranadi era na rogoca kecega na yalewa ka na vakavuna me ra beci keda na watidra, ka ra na kaya vakaoqo. ‘E a vakarota o Asuerosi na tui me la'ki kau mai vua o Vasiti na Ranadi, ia a qai bese na Ranadi ni lako vua.’

¹⁸ O ira sara mada ga na marama ni Perisia kei Mitia era rogoca rawa edaidai na i vakarau a vakayacora oqo na Ranadi era na talanoataka vei ira na nona vakailesilesi liu na tui ka sa na ka levu sara kina na veibeci kei na kena cudru.

¹⁹ Kevaka sa lomamuni vakakina na tui, ia mo ni vakauta e dua na i vakaro vakatui, ka me okati talega me lawa tudei ni vanua o Perisia kei Mitia, o ya me sa kakua tale ni qai rairai yani vei kemuni na tui o Vasiti. Me vakaroti me sa soli na nona i tutu vakaranadi vua e dua tale e uasivi cake.

²⁰ Ni sa kacivaki yani ki na matanitu taucoko na i vakaro oqo, era na qai rokovi ira na dui watidra na yalewa kecega, se ra turaga vutuniyau se dravudravua.”

²¹ A taleitaka na tui kei ira na nona daunivakasala na i tukutuku oqo, ka sa vakayacora kina na tui na i vakasala i Memukani.

²² A sa veikauyaki na i tukutuku ni tui oqo ki na veiyasana mai na i vola era volai ena nodra matanivola duidui eso kei na vosa duidui vakamatatamata, ka tukuni kina ni dodonu me ra i liuliu ni matavuvale na turaga vakawati.