Emosi 2 - Ai Vola Tabu Ena Vakavakadewa Vou

O Moapi

¹ Sa kaya vakaoqo ko Jiova, “Ni sa vakawasoma na cala nei Moapi, au na sega ni vakasuka na noqu cudru, ni ra sa beca ka vakama me dravusa na sui nei tui Itomi.

² Au na tala na bukawaqa i Moapi, me kania na veitikotiko ni valu kaukauwa mai Kirioci. O ira na Moapi era na mate ga ena rorogo ni valu ni ra sa ia na qoqolou na sotia ka voqa na domo ni davui.

³ Au na vakamatea na nodra turaga sau, vata kei ira na nodra turaga ni vanua,” sa kaya ko Jiova.

O Juta

⁴ A sa kaya ko Jiova, “Ni sa vakawasoma na cala i Juta, au na cudruvi ira kina ena ka oqo. Era sa biuta na noqu vakatavuvuli ka sega ni muria na noqu i vunau. Era sa vakacalai mai vei ira na kalou lasu era dau qarava taumada na nodra qase.

⁵ O koya oqo ka'u na tala kina na bukawaqa vei ira na Juta, me vakama na veitikotiko ni valu kaukauwa kei Jerusalemi.”

Na Lewa ni Kalou me Baleti Isireli

⁶ A sa kaya ko Jiova, “Ni sa wasoma na cala i Isireli, au na sega ni vakasuka na noqu cudru. Era sa volitaki ira me ra bobula na yalododonu ena siliva kei ira na dravudravua ena i vava.

⁷ Era sa butuqaqi ira sobu na malumalumu kei ira na vakaloloma, ka biliraki ira tani na dravudravua. A tagane kei na tamana erau sa veiyacovi ruarua kei na duabau na yalewa bobula, ka sa vakacacani kina na yacaqu tabu.

⁸ Ena veitikina ni sokalou eso, era sa davo koto na tamata ena i sulu sa kau mai vei ira na dravudravua me i vesu ni nodra dinau. Ena valenisoro ni nodra Kalou, era sa gunuva kina na medra waini na tamata era totogitaka ena vuku ni dinau.

⁹ “Ia oqo kemuni na noqu tamata, sai au ga ka'u a vakarusai ira na Amoraiti ena vukumuni, o ira sa cecere me vaka na sitari ka kaukauwa me vaka na oki. Au a vakarusa na vuadra e cake kei na wakadra e ra.

¹⁰ Au a kauti kemuni mai na vanua o Ijipita, ka liutaki kemuni voli e loma ni vanua lala me vasagavulu na yabaki, mo ni taukena kina na nodra vanua na Amoraiti.

¹¹ “Au a susuga cake eso na luvemuni me ra parofita, ka eso vei ira na nomuni cauravou me ra nasiraiti. Kemuni na Isireli, e sega li ni dina o ya? Oi au, ko Jiova, sa kaya vakaoqo.

¹² Ia o ni sa qai vagunuvi ira na nasiraiti ena waini, ka vakaroti ira na parofita me ra kakua ni kacivaka na noqu i tukutuku.

¹³ O koya oqo ka'u na bikai kemuni sobu kina ki na qele, ka o ni na ole me vaka e dua na kareti sa usa bi ena i vau sila.

¹⁴ Era na sega ni dro bula rawa mada ga na daucici totolo; ena takali na nodra kaukauwa na tamata qarikau, ka ra na sega ni vakabulai ira rawa o ira na sotia.

¹⁵ Era na sega ni tudei rawa na dauvavana, o ira na yava totolo era na sega ni dro bula, kei ira na sotia vodo ose era na sega ni dro rawa.

¹⁶ Ena siga o ya, ena biuta sobu talega na nona i yaragi ka cici ena vaqara bula o koya na sotia yaloqaqa duadua.” Sa vosa vakaoqo ko Jiova.