Efeso 1 - Ai Vola Tabu Ena Vakavakadewa Vou

¹ Oqo na i vola i Paula e dua na i apositolo i Karisito Jisu me vaka na lewa ni Kalou. Ki vei ira na tamata lotu mai Efeso, era sa yalodina tiko vei Karisito Jisu.

² Me nomuni na loloma kei na vakacegu mai vua na Kalou o Tamada kei na Turaga ko Jisu Karisito.

Na Veivakalougatataki Vakayalo ena Vuku i Karisito

³ Me vakavinavinakataki na Kalou na Tama ni noda Turaga ko Jisu Karisito, o koya ka sa vakalougatataki keda ena ka ni veivakalougatataki vakayalo kecega, mai na veiyasana vakalomalagi ena vuku i Karisito.

⁴ Ni sa bera ni tauyavutaki o vuravura, sa digitaki keda tu na Kalou me da nona ena vuku i Karisito, me da savasava ka sega ni cala e matana.

⁵ A sa lesi keda o koya ena nona loloma me da vakabau me da luvena ena vuku i Jisu, me vaka na i naki ni lomana.

⁶ Me da vakacaucautaka kina na Kalou ena uasivi ni nona lolomasavu, ena i loloma soli wale vei keda ena vukuna na Luvena lomani!

⁷ Ni da sa sereki ena vuku ni nona mate ka sa bokoci na noda i valavala ca me vaka na levu ni nona lolomasavu,

⁸ sa sovaraka vakayauyau mai vei keda.

⁹ Ni sa vakatakila mai vei keda na Kalou na nona i naki vuni, na nona i naki vinaka sa vakarautaka me cakava na Karisito.

¹⁰ Na i naki ni Kalou, sai koya ena vakataucokotaka ena gauna sa lokuca, me vakaduavatataka na veika kecega mai lomalagi kei na veika e vuravura vei Karisito.

¹¹ Ni sa caka na ka kecega me vaka na i naki kei na lewa ni Kalou; ka sa digitaki kemuni na Kalou mo ni nona tamata ena vuku i Karisito me vaka na nona i naki, ka sa yavutaki na i naki oqo mai na veika sa vakatulewataka mai na i vakatekivu.

¹² O koya oqo me da qai vakacaucautaka kina na lagilagi ni Kalou, oi keda na i sevu ni tamata ka vakanuinui taumada vei Karisito.

¹³ Oi kemuni talega sa yaco mo ni tamata ni Kalou ena vuku ni nomuni sa rogoca na i tukutuku dina, na Tukutuku Vinaka sa kauta mai na veivakabulai. O ni sa vakabauti Karisito, ka sa dregata kina na Kalou na nona i vakatakilakilataki ni sa taukeni kemuni, ni sa solia vei kemuni na Yalo Tabu sa yalataka.

¹⁴ Na Yalo Tabu sai koya na i vakadei ni noda na vakaivotavota ena veika sa yalataka na Kalou vei ira na nona tamata, ka vakataudeitaka talega na soli ni bula galala mai vua na Kalou vei ira sa nona. Me vakacaucautaki kina na lagilagi ni Kalou!

Na Masu i Paula

¹⁵ Ena vuku ni ka oqo, ena gauna ga au rogoca kina na nomuni vakabauta na Turaga ko Jisu kei na nomuni loloma vei ira na tamata lotu,

¹⁶ au sa sega ni mudu ni vakavinavinaka tiko vua na Kalou ena vukumuni. Au sa dau nanumi kemuni tikoga ena noqu masu

¹⁷ vua na Kalou ni noda Turaga ko Jisu Karisito, na Tamada lagilagi me solia vei kemuni na Yalo ni Kalou, mo ni kilai koya kina.

¹⁸ Me vakararamataki talega na yalomuni, mo ni kila kina na ka sa nuitaki ka sa kacivi kemuni kina o koya, na nona veivakalougatataki lagilagi me baleti ira na nona tamata.

¹⁹ Kei na kena levu ni nona kaukauwa sa cakacaka tiko vei keda eda vakabauta, me vaka na cakacaka ni nona kaukauwa

²⁰ sa vakayagataka ena nona vakaturi Karisito cake tale mai na mate, ka vakatikori koya ena ligana i matau ena veiyasana vakalomalagi.

²¹ Sa cecere cake kina ko Karisito vei ira kecega sa liu, kei ira sa nodra na lewa, kei ira era sa kaukauwa ka qaqa, ka sa cecere cake mai na veiyaca sa dau cavuti ena gauna oqo kei na veigauna e muri.

²² A sa vakamalumalumutaka na veika kecega na Kalou ka biuta ena ruku ni yava i Karisito, ka sa lesi koya me lewa na veika kecega ena vuku ni soqosoqo lotu.

²³ Na i soqosoqo lotu sai koya na yago i Karisito, ka sa vakataucokotaki mai vei Karisito, o koya sa vakataucokotaka na ka kecega.