Dauvunau 8 - Ai Vola Tabu Ena Vakavakadewa Vou

Talairawarawa Vua na Tui

¹ O cei li sa vakataki koya na tamata vuku? Ia o cei sa kila na i balebale ni ka? Na vuku e sa vakavuna me serau na mata, Ka veisautaka na kaukauwa ni mata me malumu mai.

² Cakava na ka e tukuna na tui ka kakua ni vakusakusa ena nomu vakayacora na nomu veivosa ni yalayala vua na Kalou.

³ Ena cakava na tui na ka ga e vinakata, sai koya oqo mo lako tani kina mai na matana; kakua ni tiko ena vanua rerevaki vaka o ya.

⁴ Sa dau cakava na tui na ka e cakava ena nona kaukauwa ka na sega ni rawa ni dua me na saqati koya ena ka e cakava.

⁵ Ni o muria na nona lewa na tui o na sega ni sota kaya e dua na leqa, ia na tamata vuku ena kila na ka me cakava kei na gauna me caka kina.

⁶ Sa tiko ga na gauna dodonu kei na sala me caka kina na ka kecega, ia sa rui lailai ga na ka eda kila.

⁷ E sega ni dua vei keda e kila na ka e yaco mai; o cei e tiko kina me na tukuna vei keda?

⁸ E sega ni dua na tamata ena tarovi me kakua ni mate, se me na tarova na siga ena mate kina. Sa i koya o ya e dua na i valu eda sega ni rawa ni drotaka, eda na sega ni kunea e dua na sala me da na galala mai kina.

Na Tamata Ca kei na Tamata Yalododonu

⁹ Au sa raica na ka kece oqo ena gauna au vakasamataka kina na veika sa caka ena vuravura oqo, na vuravura era sa kaukauwa kina eso na tamata, ka ra sa vakararawataki ira na tani ena vukudra.

¹⁰ Au sa raici ira na tamata ca ni ra sa la'ki bulu ena kedra i bulubulu, ia ni'u lesu mai na kedra i bulubulu era sa vakacaucautaki ira tale tiko o ira ena koro ga era a vakayacora kina na veika ca. Sa sega na kena yaga.

¹¹ Sa dau rawarawa na nodra cakava na ka ca na tamata, baleta ni sa rui dau berabera na kena dau vakatauci na nodra i totogi.

¹² E dua na tamata ca sa cakava e 100 na ka ca, ia e sa bula tikoga. Au sa kila ni sa waraki ira era rerevaka na Kalou na marau,

¹³ ia ena sega ni na vakakina vei ira na i valavala ca. Na nodra bula ena vaka ga na i yaloyalo ni dua na ka, ka na qai mate ni sa gone ga baleta ni ra sega ni rerevaka na Kalou.

¹⁴ Ia sa sega na kena yaga na ka oqo. Raica mada na ka sa yaco tiko e vuravura: ena so na gauna sa tau vei ira na yalododonu na nodra i totogi na tamata ca ka soli na tamata yalododonu. Au sa kaya ni sa sega sara ga na kena yaga.

¹⁵ Ia au sa vakadinata ni sa dodonu vua e dua na tamata me vakamarautaki koya baleta ni ka ga me marau kina ena vuravura oqo sai koya na kana kei na gunu ka vakamarautaki koya. Sa na rawa me na cakava voli na ka oqo ena nona cakacaka voli ena nona gauna ni bula lekaleka sa solia vua na Kalou ena vuravura oqo.

¹⁶ Ena gauna ga au vinakata kina me'u vuku ka kila na ka e yaco tiko e vuravura oqo, au vakila ni rawa ni o yadra tu ena bogi kei na siga,

¹⁷ ka sega sara ni rawa mo kila na ka e cakava tiko na Kalou. Veitalia sara ga na levu ni ka o cakava o na sega ga ni kunea rawa. Sa na rawa me ra kaya na tamata vuku ni ra sa kila, ia era sega ga ni kila.