Dauvunau 6 - Ai Vola Tabu Ena Vakavakadewa Vou

Na Leqa ni Gagadre ni Tamata

¹ Au sa raica e dua na ka ca e vuravura oqo e caka vei ira na tamata.

² Sa solia na Kalou vua e dua na tamata na i yau, na dokai kei na veika me taukena, io na veika kece sara e gadreva, ena qai sega ni soli vua me marautaka. Era na qai la'ki marautaka tale e so na tamata tani. Sa sega sara ga na kena yaga ka sega ni dodonu.

³ Kevaka e dua na tamata sa dua na drau na luvena ka balavu sara na nona bula. Ia ena sega ni dua na ka na balavu ni nona bula, kevaka e sega ni kunea na nona marau ka sega ni caka vua e dua na veibulu rakorako, au na qai kaya ni vinaka cake na nona sucu mate e dua na gone.

⁴ E sega ni dua na kena yaga vua na gone o ya na nona sucu mai; ena takali o koya ki na vanua butobuto ka na guilecavi kina.

⁵ Sa sega ni bau raica na rarama se bau kila mada se cava na bula, ia sa kunea vakalevu na vakacegu,

⁶ mai vua na tamata e rua na udolu na yabaki na nona bula ka sega ni marautaka. Ia e rau sa lako ruarua ki na duavata ga na vanua.

⁷ Na cakacaka kece e cakava e dua na tamata sa baleta ga na ka me kania, ia sa sega ga ni oti vakadua kina na nona viakana.

⁸ Na cava e vinaka cake kina e dua na tamata vuku mai vua e dua na tamata lialia? Na cava na kena yaga vua e dua na tamata dravudravua me kila na ka me cakava ena nona bula?

⁹ E sega ga na kena yaga; sa vaka ga na via vesu cagi. E vinaka cake me sa mamau na yaloda ena ka ga sa tu vei keda mai na noda gadreva tale eso na ka.

¹⁰ Na veika kece sara e yaco sa nakiti makawa sara ka sa kilai talega ni sega ni rawa ni dua na tamata me veileti kei koya e kaukauwa cake vua.

¹¹ Na levu ga ni nomu veileti na levu talega ni kena sega ni yaga. Na cava na ka yaga o rawata mai kina?

¹² E rawa beka vakacava vua e dua na tamata me kila na ka e uasivi duadua vua e dua na tamata ena nona bula lekaleka ka tawa yaga oqo, ka vaka ga na takali yani ni yaloyalo ni dua na ka? E rawa vakacava vua e dua na tamata me kila na ka sa yaco e vuravura ni sa na mate oti.