Dauvunau 11 - Ai Vola Tabu Ena Vakavakadewa Vou

A Veika e Vakayacora na Tamata Yalomatua

¹ Vakacuruma na nomu i lavo ena veivoli ki na veivanua tani, ia ena dua na siga o sa na rawata kina e dua na kena tubu.

² La'ki biuta na veika o via vakatubura ena vitu na vanua, se me levu sara, baleta ni o sega ni kila na veika ca ena yacovi iko ena vuravura oqo.

³ Na yasana ga ena bale kina e dua na vunikau sa na davo talega kina. Ni loaloa vakalevu na vanua sa na tau na uca.

⁴ Kevaka o waraka na liwa ni cagi kei na draki vinaka o na sega ni tea rawa e dua na ka, ka na sega talega ni tamusuka e dua na ka.

⁵ Sa cakava na ka kecega na Kalou, ka na sega ni rawa vei iko mo kila na ka e cakava me vaka na nomu sega ni rawa ni kila na kena tekivu e dua na bula vou ena ketena e dua na yalewa bukete.

⁶ Mo kaburaka na nomu i tei ena mataka ka vaka talega kina ena yakavi. O na sega ni kila se ra na bula vinaka kece beka, se na dua na kakaburaki ena bula vinaka cake, mai na kena ka dua.

⁷ Sa dua na ka talei me da rawa ni marautaka na rarama ni siga.

⁸ Mo marautaka na veiyabaki yadua o bula kina. Veitalia sara ga na balavu ni gauna o bula kina, nanuma tiko ni na balavu cake na gauna ni nomu mate. Na veika kece ena yaco mai e muri sa sega na kena yaga.

Na i Vakasala Vei Ira na i Tabagone

⁹ Kemuni na cauravou ni marautaka na nomuni gauna ni cauravou. Mo reki ni o sa cauravou tiko ka cakava na ka o via cakava, ka vakamuria na gagadre ni lomamu. Ia mo nanuma tikoga ni na lewai iko na Kalou ena ka kecega o cakava.

¹⁰ Mo kakua ni laiva e dua na ka me vakalomaocaocataki iko se me vakavuna na nomu rarawa. Ena sega ni balavu na gauna o na cauravou tiko kina.