Dauvunau 1 - Ai Vola Tabu Ena Vakavakadewa Vou

Sa Sega ni Yaga na Bula

¹ Oqo na veivosa sa kaya na Dauvunau, na luve i Tevita, o koya sa tui tiko mai Jerusalemi.

² Sa sega ni vakaibalebale, sa sega ni vakaibalebale, sa kaya na Dauvunau. Sa sega ni vakaibalebale na bula.

³ Na cava na kena yaga vua na tamata na veicakacaka kecega sa cakava ena nona bula ena ruku ni matanisiga?

⁴ Sa takali yani e dua na i tabatamata, ia sa tudei tu ga na vuravura ka sega ni mudu.

⁵ Sa dau cabe ga mai na matanisiga ka la'ki dromu yani, ka lako tale ki na vanua me la'ki cabe tale mai kina.

⁶ Sa liwa yani na cagi vaka ki na ceva, ka gole sara yani ki na vualiku; sa wavoki voli na cagi ka wavoki lesu tale me vaka na kena i lakolako.

⁷ Na veiuciwai kecega sa drodro sobu yani ki waitui, ia sa sega ga ni sinai na wasawasa. Sa suka tale na wai ki na vanua sa tekivu mai kina na uciwai ka tekivu drodro tale yani.

⁸ Na veika kecega sa yaco kina na oca, na oca sa sega ni rawa me vakamacalataki. Sa sega ni mamau rawa na matada ena ka eda raica ka sega ni mamau rawa na daligada ena ka eda rogoca.

⁹ Na ka sa yaco oti e liu ena yaco tale. Na ka sa caka oti e liu ena vakayacori tale. Sa sega sara ni dua na ka vou ena vuravura taucoko.

¹⁰ Era sa kaya, Raica, oqo e dua na ka vou. Sega, na ka oqori sa yaco oti e liu. Sa yaco oti ni da sa bera ni sucu.

¹¹ E sega ni dua e nanuma tiko na veika sa yaco oti e liu, ka na sega talega ni dua ena gauna mai muri ena nanuma na veika ena yaco ena loma ni gauna oqo kei na gauna mai muri.

A Nona i Vakavuvuli na Dauvunau

¹² Oi au na Dauvunau, au a tui Isireli mai Jerusalemi.

¹³ Au a nakita e lomaqu me'u dikeva matua sara ka vulica na veika kece e caka ena vuravura oqo. Sa cakava tu na Kalou na ka dredre oqo me baleti keda na tamata.

¹⁴ Au sa raica na veika kece e caka e vuravura oqo, ka'u sa tukuna kina oqo vei kemuni ni sa sega kecega ni vakaibalebale. Sa tautauvata ga kei na vakacemuri cagi.

¹⁵ Sa sega ni vakadodonutaki rawa tu na ka sa veve. Sa sega ni rawa ni wiliki na ka e sega e kea.

¹⁶ Au kaya e lomaqu, Au sa yaco me'u dua na tamata cecere sara ka vuku cake duadua vei ira kece era sa tui e liu vei au e Jerusalemi. Au sa kila na ka e rua oqo, na vuku kei na kila-ka.

¹⁷ Au a nakita e lomaqu me'u vulica na kedrau duidui na kila-ka kei na yalowai, na yalomatua kei na lialia, ia au sa qai kunea ni sa vaka talega na vakatobo cagi.

¹⁸ Na levu ga ni nomu kila-ka, na levu talega ni nomu rarawa.