Dauveilewai 8 - Ai Vola Tabu Ena Vakavakadewa Vou

Na Qaqa i Kitione

¹ Ia era sa qai kaya na Ifereimi vei Kitione, “A cava o a sega kina ni kacivi keimami ena nomuni la'ki valuti ira na kai Mitiani? Na mataqali i vakarau vakacava o cakava oqo vei keimami?” Era sa rarawa ka vosavosa sara kina vakalevu.

² A sauma lesu vei ira o koya, “Na veika au sa vakayacora oqo sa sega sara ni vakatauvatani rawa kei na veika o ni sa cakava oti. A veika lalai mada ga o ni sa cakava na Ifereimi e raici ni rui yaga vakalevu cake sara mai na veika sa vakayacora oqo na noqu lewe ni mataqali.

³ Na Kalou sa solia ki na ligamuni na nodrau bula e rua na i liuliu vakaivalu ni Mitiani, o Orepi kei Siepi. A cava na ka au sa bau rawata me vakatauvatataki kei na kena o ya? Ia ni sa vakaraitaka o koya na veika oqo, a qai seavu kina na nodra cudru.

⁴ Ena gauna vata o ya a lako mai kina o Kitione kei na tolu na drau na nona mataivalu ki na uciwai na Joritani ka takosova yani. E dina era sa oca vakalevu, ia era sa cici muri ira ga na meca.

⁵ Ia ni ra yaco yani ki Sakoca, sa kaya vei ira na tamata era tiko ena koro, “Ni yalo vinaka ka solia vei ira na noqu tamata eso na madrai me ra kania, era sa oca vakalevu, ia o au me'u sa cici muri Sepa kei Salimuna na nodra tui na kai Mitiani.”

⁶ Ia o ira na i liuliu mai Sakoca era sa kaya; “A cava na vuna me keimami solia kina vei ira na nomu mataivalu na kakana? Ni o sa bera mada ni vesuki rau o Sepa kei Salimuna.”

⁷ A sa kaya o Kitione, “Sa vinaka! Ia ni sa na soli Sepa kei Salimuna vei au ko Jiova, au na vakanakuitataki kemuni ena wa vakavotona kei na soni mai na vanua talasiga.”

⁸ A sa lako o Kitione ki Penueli ka kerekere vei ira na tamata, ia o ira na kai Penueli era a qai tukuna na vosa vata ga era sa tukuna na kai Sakoca.

⁹ A sa kaya vei ira o Kitione, “Sa vinaka, ia ni'u sa na lesu mai ena qaqa, au na mai basuraka sobu na nomuni vale sa vakarewa i cake oqo.”

¹⁰ Ia e rau sa tiko mai Karikori o Sepa kei Salimuna kei na nodrau mataivalu. Ia na nodrau mataivalu kecega era tamata mai na vanua lala, sa ra vo wale ga e lewe 15,000, ka rauta ni lewe 120,000 na sotia era sa vakamatei oti.

¹¹ A sa lako yani o Kitione, muria na salatu ka donuya na vanua talasiga, ki na tokalau kei Nopa kei Jokipa, ka kabai ira yani vakasauri na meca.

¹² E rau sa dro na tui Mitiani e rua o Sepa kei Salimuna, cici muri rau o koya, vesuki rau ka yaco kina me ra rere vakalevu na nodrau mataivalu.

¹³ Ni sa lesu tiko mai o Kitione ena i valu ni sa muria mai na sala ki Eresi Pasi,

¹⁴ a sa vesuka o koya e dua na cauravou ni Sakoca ka taroga. A sa vola na cauravou na yacadra na lewe vitusagavulu kavitu na turaga qaqa kei Sakoca.

¹⁵ A sa mani lako yani o Kitione vei ira na kai Sakoca ka kaya: “O ni sa nanuma tiko li na nomuni sega ni via vukei au? O ni a kaya ni sega ni rawa mo ni solia vei ira na lewe ni noqu mataivalu ka sa oca vakalevu tu baleta ni'u se sega mada ni vesuki Sepa kei Salimuna. Ia, o rau sa tu oqo!”

¹⁶ Sa qai kauta mai o koya na wa vakavotona ni vanua lala ka vakayagataka me totogitaki ira kina na i liuliu ni vanua o Sakoca.

¹⁷ A sa basuraka sobu na vale sa vakarewa i cake mai Penueli ka vakamatei ira na tagane ni koro o ya.

¹⁸ A sa tarogi Sepa kei Salimuna o Kitione ka kaya: “Vakacava o ira na tamata drau a vakamatea mai Tepo?” E rau a sauma: “Era vakataki kemuni na kedra i rairai ka ra vaka na i rairai ni luvenitui.”

¹⁹ A sa kaya o Kitione, “O ira oqori na taciqu, na luve i tinaqu. Au a sa bubuluitaka ni kevaka o drau a sega ni vakamatei ira, au na sega ni vakamatei kemudrau.”

²⁰ A sa kaya o koya vei Jica na luvena ulumatua tagane ka kaya: “Lako, ka vakamatei rau!” Ia sa sega ni ucuna na nona i seleiwau na cauravou lailai. A sa tu vakasuka, ka ni se gone ga.

²¹ E rau sa qai kaya o Sepa kei Salimuna vei Kitione: “Lako mai o iko, ka vakamatei keirau. Na tagane ga e rawa ni cakava na cakacaka ni tagane.” A sa vakamatei rau o Kitione ka taura na veivatu talei ka vakaiukuuku tu kina na domodrau na nodrau kameli.

²² Ni oti o ya, era sa kaya na Isireli vei Kitione: “Mo ni liutaki keimami kei ira na nomuni kawa kecega. O ni sa vakabulai keimami mai na ligadra na kai Mitiani.”

²³ A sa sauma o Kitione, ka kaya: “Au na sega ni nomudou dauveilewai, ka na sega talega ni lewai kemudou na luvequ; ko Jiova ga ena lewai kemudou.”

²⁴ A sa kaya tale: “Me'u kerea ga e dua na ka vei kemuni. Mo ni solia mai vei au na sau ni daliga kece sara o ni a taura.” (O ira na kai Mitiani, me vakataki ira na dautiko ena vanua lala, era dau daramaka na sau koula ena daligadra.)

²⁵ Era sa sauma na tamata ka kaya: “Keimami marau ni solia vei kemuni na veika kece oqori.” Era a tevuka e dua na i sulu, ka ra biuta kece kina na sau ni daliga era a taura.

²⁶ Ia na sau koula kecega sa kumuna vata o Kitione ka rauta e ruasagavulu na kilokaramu, ia oqo e sega ni okati kina na i taube kei na i sulu lokaloka, o ya era a daramaka na kai Mitiani ka vaka talega kina na i sulu a vau e domodra kei na veivatu talei ena domodra na kameli.

²⁷ A sa cakava e dua na matakau o Kitione mai na koula kecega a kumuna vata ka vakaduria ena nona koro o Ofira. Era sa vakanadakuya na Kalou o ira kecega na Isireli ka lako yani me cuva ki na matakau sa bulia o koya. Ia oqo e dua na i cori sa cakava o Kitione kei na nona matavuvale.

²⁸ Era sa vakamalumalumutaki na kai Mitiani mai vei ira na Isireli ka ra sega tale ni dau veivakarerei tiko vei ira. A sa tiko sautu na vanua me vasagavulu na yabaki me yacova ni mate o Kitione.

Na Mate nei Kitione

²⁹ A sa lesu tale o Kitione ki na nona koro ka la'ki tiko kina.

³⁰ A sa vitusagavulu na luvena tagane, ka ni sa vuqa na watina.

³¹ A sa tiko talega na watina lalai mai Sikemi, a vakasucuma vua e dua na gonetagane, a sa vakatokai koya me o Apimeleki.

³² A sa mate o Kitione na luve i Joasa ni a sa qase sara; era sa buluti koya ena i bulubulu i tamana mai Ofira, na nodra koro na luvei Apieseri.

³³ Ni mate o Kitione era a sega ni yalodina na Isireli vei Jiova ka ra suka lesu tale me ra qaravi Peali. Era sa qisi Peali me nodra kalou ni veiyalayalati.

³⁴ Era sa sega tale ni qaravi Jiova na nodra Kalou, o koya ka vakabulai ira mai vei ira na nodra meca kecega era a tiko wavoliti ira.

³⁵ Era sa sega talega ni qai yalololoma tiko ki na matavuvale i Jerupeali (o ya o Kitione) ka ra guilecava na veika vinaka kece sara a vakayacora vei ira na Isireli.