Dauveilewai 7 - Ai Vola Tabu Ena Vakavakadewa Vou

Vakadrukai Ira na Kai Mitiani o Kitione

¹ O Jerupeali, o ya o Kitione kei ira na mataivalu era tiko kaya era sa yadra ena mataka lailai sara ka ra la'ki vakeba toka ena i vurevure ni wai mai Aroti, ia na yasana kadua vaka ki na vualiku era a vakaitikotiko kina na kai Mitiani, ka tiko vaka ki ra na ulunivanua kei na buca o Mori.

² A sa kaya vei Kitione ko Jiova, “Era sa rui lewe levu na mataivalu era tiko vata kei iko me rawa kina vei au me'u soli ira na kai Mitiani ki na ligamu. Sa na rawa vei ira na Isireli me ra nanuma ni ra sa rawai ira na meca ena nodra kaukauwa ga vakataki ira, ka sega kina ni vagolea kivei au na nodra rawata na qaqa.

³ Mo vakaraitaka vei ira na nomu mataivalu, ‘O koya yadua vei kemuni sa rere me suka lesu tale ki na nona vale, ka me da tiko ga eke ena ulunivanua o Kiliati.’ ” Ena ka oqo, era sa lesu tale kina e lewe 22,000, ka qai vo tiko mai e lewe 10,000.

⁴ A sa kaya tale vei Kitione ko Jiova, “Era sa rui lewe levu tikoga na nomu mataivalu. Mo kauti ira sobu mada ki na uciwai mai kea, au na qai wasei ira kina. Ia ni'u sa kaya, ‘O koya oqo me lako vata kei iko,’ me lako vata kei iko; ia ni'u sa kaya, ‘o koya oqo me kakua ni lako vata kei iko,’ ia, me kakua ni lako o koya.”

⁵ A sa kauta sobu na nona mataivalu o Kitione ki na uciwai, sa kaya vei koya ko Jiova, “O koya sa gunu sevusevu me vaka sa gunu na koli mo sa biuti koya vakatikitiki, ia o ira kece era sa tekiduru ena durudra ka takiva cake na wai e ligadra ruarua ka gunu, mo biuti ira ena dua na yasana.”

⁶ Ia na kedra i wiliwili era a gunu sevusevu e rauta ni ra lewe tolu na drau, ia o ira na kena vo era sa tekiduru e wai.

⁷ A sa kaya ko Jiova vei Kitione, “Mai vei ira na lewe tolu na drau au na sereki ira na kai Mitiani mai na ligamu. Ia mo laivi ira na kena vo me ra suka tale ki na nodra dui vale.”

⁸ A sa kauta mai o koya na saqa ki na ligadra kei na nodra davui, ka vakatalai ira lesu yani na Isireli o ya ki na nodra i tikotiko. Ia a tauri ira tikoga na lewe tolu na drau o koya. Ia era a vakaitikotiko na kai Mitiani vaka ki ra ena buca.

⁹ Ena bogi o ya a kaya vei Kitione ko Jiova, “Mo tucake, mo sa kaba na nodra i tikotiko na meca, ka ni'u sa soli ira oti ki na ligamu.

¹⁰ Ia kevaka o sa rere ni valuti ira mo lako sobu ki na nodra keba vata kei na nomu tamata o Pura.

¹¹ Mo la'ki rogoca na ka era sa tukuna, ia ni oti o ya ena qai kaukauwa na ligamu mo sa valuti ira ena nodra keba.” A sa lako sobu o koya vata kei na nona tamata o Pura ki na vanua era tu kina na yadra me ra yadrava na nodra keba.

¹² Ia era sa davo tu ena buca na kai Mitiani kei na Amalekaiti vaka ki na tokalau, ka kedra lewe levu sa vaka na qele ni vodre. Na nodra kameli sa sega ni wili rawa me vaka na nuku ni matasawa.

¹³ Ia ni yaco yani o Kitione, a rogoca e dua na tamata ni sa kaya tiko na nona tadra vei ira na nona i lawalawa, “Au a tadra ni a vaqiqiqi sobu mai ki na nodra keba na kai Mitiani e dua na i buli madrai barile ka bika e dua na valelaca. A bale sobu ka vakacacani sara kina vakadua na valelaca o ya.”

¹⁴ Era sa sauma na nona i lawalawa ka kaya, “Oqori sa sega tale ni dua na kena i balebale, o Kitione ga na luve i Joasa kei na nona i seleiwau, na qaqa ni Isireli ka ni sa tiko kei koya na nona Kalou ena soli ira na kai Mitiani kei na kena i mataivalu ki na ligana.”

¹⁵ Ia ni rogoca na tadra o ya o Kitione kei na kena i balebale, a masu kina vei Jiova, ka lesu tale yani ki na nodra i tikotiko na Isireli ka kaya, “Ni duri cake me da sa lako ni sa soli ira na mataivalu ni Mitiani ko Jiova ki na ligada.”

¹⁶ Ni wasei ira oti vakatolu na nona tamata i valu e tolu na drau o Kitione ka solia vei ira na davui, na saqa lala kei na kena cina ena loma ni saqa.

¹⁷ A sa kaya vei ira, “Ni raici au mai, ka vakayacora vakakina, ni'u sa na lako yani ki na yasa ni nodra i tikotiko na meca, ni vakayacora na ka au sa cakava.

¹⁸ Ni'u sa na uvuca na davui vata kei ira na noqu i lawalawa, mo ni qai uvuca vaka talega kina na nomuni davui ka wavokita na nodra i tikotiko na meca, ka kailavaka, ‘Ena vuku i Jiova kei Kitione!’ ”

¹⁹ A sa lako sobu o Kitione vata kei ira na lewe dua na drau na sotia era sa tiko kaya ki na yasa ni nodra i tikotiko na meca ena i vakatekivu ni gauna ni yadra ena lomaloma ni bogi. Ia ni ra qai veisau yadra wale ga era a uvuca na nodra davui na sotia ka voroka na saqa era a taura tiko e ligadra.

²⁰ Ia na tolu na i lawalawa oqo era sa uvuca na nodra davui, voroka na nodra saqa ka taura e ligadra i mawi na cina sa waqa tu kei na ligadra i matau na davui ka uvuca ka kacivaka, “Na i seleiwau i Jiova kei Kitione!”

²¹ Era sa tu wavokita na nodra i tikotiko na meca o ira na tamata i valu ni sa waqa tu na nodra cina kei na nodra uvuca na nodra davui ia o ira era tiko e loma ni keba, era sa qoqolou ka veiciciyaki me ra dro.

²² Ni ra uvuca na mataivalu i Kitione na tolu na drau na davui, ia ko Jiova sa vakatuburi ira na meca me ra tara na nodra i seleiwau ka ra veivakamatei vakai ira ka ra dro yani na meca vaka ki Pecisita kei Serira, ki na i yalayala ni vanua o Apelemeola, vaka ki Tepaci.

²³ Ia o ira na Isireli era sa kacivi mai Navitalai ka vakakina mai Aseri kei Manasa era sa muri ira yani na kai Mitiani.

²⁴ Ia o Kitione sa talai ira yani na i talai ki na veidelana kecega e Ifereimi, ka kaya, “Ni siro sobu mai vei ira na kai Mitiani ka vesuki ira ena uciwai vaka ki Pecipara, kei na Joritani talega.” Ia o ira na tamata i valu mai Ifereimi era sa kacivi mai ka vesuki ira ena bati ni uciwai vaka ki Pecipara, ka vaka talega kina ki na Joritani.

²⁵ Era sa vesuka e rua na turaganivalu ni Mitiani, o Orepi kei Siepi, era sa vakamatei Orepi ena dela ni vatu mai Orepi ia o Siepi, era sa vakamatei koya ena vanua ni butubutu ni vaini mai Siepi, ena nodra sa cici muri ira na kai Mitiani. Ia era sa kauta mai na ulu i Orepi kei Siepi vei Kitione ena bati ni Joritani.