Dauveilewai 21 - Ai Vola Tabu Ena Vakavakadewa Vou

Watidra na Lewe ni Mataqali Penijamini

¹ Ena gauna o ya era a bubului na Isireli e Misipa ka kaya, “Me kakua ni dua vei keda me solia na luvena yalewa me vakawati kei ira na Penijamini”.

² Era a lako mai na tamata ki Peceli, ka dabe tiko e kea ena mata i Jiova me yacova na yakavi, era a qai laveta cake na domodra ka tagi vakadomoilevu sara.

³ Era a kaya, “Kemuni Jiova na Kalou ni Isireli, a cava sa yaco kina oqo vei keimami edaidai, me sa yali e dua na mataqali?”

⁴ Ena siga ka tarava, era a yadra sara vakamataka na tamata, ka tara na i cabocabonisoro e kea, ka ra cabora na i soro kama, kei na i madrali ni veivinakati.

⁵ Era a qai kaya na Isireli, “O cei vei keda na mataqali e Isireli era a sega ni la'ki soqoni vei Jiova? Ni a sa bubuluitaki oti kina me baleti ira era sega ni lako mai vei Jiova ki Misipa ni a tukuni kina, “O koya oqo me moku mate.”

⁶ Ia o ira na Isireli era a rui nanumi Penijamini na wekadra ka kaya, “E dua na mataqali sa na muduki laivi mai vei Isireli edaidai.

⁷ A cava me qai caka vei ira na dui watidra era sa vo tu, ka ni da sa bubului oti vei Jiova, ni da na sega ni solia na luveda me ra vakawatitaki vei ira?”

⁸ Era a kaya, “E dua tale beka ena mataqali e Isireli e sega ni lako cake vei Jiova ki Misipa?” Sa qai kune ni sega ni dua mai Jepesa e Kiliati me tiko kei ira na i soqosoqo.

⁹ Ni kacivi na i vola ni yaca vei ira na tamata, e sega sara ga ni dua mai Jepesa e Kiliati a tiko e kea.

¹⁰ Era a qai vakatala na lewe ni soqoni e 12,000, vakaroti ira ka kaya, “Ni lako ka vakarusai ira na kai Jepesakiliati ena nomuni seleiwau, o ira talega na yalewa kei na gone.

¹¹ Oqo na ka mo ni cakava, o ira kecega na tagane era sa tara yalewa kei ira kecega na yalewa sa tara tagane mo ni vakarusai ira kece!”

¹² Ia era sa kunea e Jepesa e Kiliati e va na drau na yalewa era sa sega ni tara tagane, ka kauti ira oqo ki na i tikotiko ki Sailo, o ya ena vanua o Kenani.

¹³ Era a qai vakauta na i soqosoqo taucoko na nodra i tukutuku vei ira na Penijamini ka ra a tiko ena vatu o Rimoni, ka kacivaka vei ira me ra veisaututaki.

¹⁴ Era a lesu mai ena gauna o ya na Penijamini, ka ra a qai solia vei ira na goneyalewa era a maroroya tu mai Jepesa e Kiliati, ia a sega ni veirauti kei ira.

¹⁵ Era a nanumi ira vakalevu na Penijamini na Isireli baleta ni sa wasei ira ko Jiova mai na nodra mataqali.

¹⁶ Era sa qai kaya na i liuliu ni lewenivanua sa vakasoqoni vata, “A cava eda na qai cakava me baleti ira na kena vo, sa sega na watidra, ni sa sega na yalewa e vo vei ira na Penijamini?

¹⁷ Era a qai kaya, “E dodonu me ra vakatubu kawa na kena vo ni Penijamini, me kakua ni kawaboko kina na nodra mataqali mai vei Isireli.

¹⁸ Ni oqo eda na sega ni rawa me da solia na luveda yalewa vei ira me watidra, ka ni ra a sa bubului oti na Isireli, “Ena ca vua e dua sa solia na luvena yalewa me vakawati kei na dua na Penijamini.”

¹⁹ Era mani kaya, “Raica, sa yaco tiko na solevu vakayabaki vei Jiova e Sailo, o ya ena vualiku kei Peceli, ena tokalau ni salatu ka gole vaka ki Peceli vaka talega ki Sikemi, ena ceva kei Lapona.”

²⁰ Era a qai vakavulici ira na Penijamini, ka kaya, “Ni la'ki vuni ka wawa toka ena veiloganivaini,

²¹ ni o ni raica ni ra sa lako mai na goneyalewa mai Sailo ka meke, mo ni qai lako mai ena veivaini, oi kemuni yadua ka kauta na watimuni mai vei ira na yalewa ni Sailo, ka kauti ira yani ki na vanua o Penijamini.

²² Kevaka era taroga na dui tamadra se o ira na ganedra me ra mai tukutuku vei keitou, keitou na kaya vei ira, “Mo ni loma vinaka ga, ka laivi ira ga me ra veiwatini, baleta ni da sega ni vesuka rawa na yalewa ena i valu me dui watidra. Ia oqo ena sega ni na cala vei kemuni mai na nomuni soli ira na luvemuni vei ira.”

²³ Era a qai vakayacora na veika a vakaroti vei ira na Penijamini, ka ra dui taura e yadua na watidra mai vei ira na daumeke era a vesuka. Era a qai lesu tale ki na nodra vanua, tara tale na nodra koro ka tiko kina.

²⁴ Era a qai lako tani mai kea na Isireli ena gauna o ya ki na nodra dui mataqali kei na vuvale yadua, ena nodra dui tikotiko.

²⁵ Ena gauna o ya a sega tu na nodra tui na Isireli, ka ra a dui vakayacora ga na tamata na veika a dodonu e matadra.