Dauveilewai 13 - Ai Vola Tabu Ena Vakavakadewa Vou

Na Sucu nei Samisoni

¹ Era sa vuki tani tale na Isireli ni ra sa caka ca ena mata i Jiova, ka sa soli ira ko Jiova ki na ligadra na kai Filisitia me 40 na yabaki.

² A bula donuya na gauna o ya e dua na tamata mai na koro o Sora, mai na mataqali i Tani, ka yacana o Manoa. A sa sega na luvena baleta ni sega ni vakaluveni rawa o watina.

³ Sa qai rairai vua na yalewa na agilosi i Jiova ka tukuna: “O iko a sega ni vakaluveni rawa tiko, ia o na kunekune ka vakasucuma e dua na gonetagane.

⁴ Ia mo qarauna mo kakua ni gunuva na waini se na gunu kaukauwa ni mateni, se kania e dua na kakana e sega ni savasava;

⁵ ni o na kunekune ka vakasucuma e dua gonetagane, ka mo kakua ni kotiva na drau-ni-uluna, baleta ni sa na vakatabui vua na Kalou mai na siga e sucu kina, me okati na gone oqo me nasiraiti. Ena tekivuna o koya na cakacaka ni nodra sereki na Isireli mai na ligadra na kai Filisitia.”

⁶ A lako yani na yalewa me tukuna vua na watina ka tukuna, “A lako mai vei au e dua na tamata ni Kalou, ia na kena i rairai sa vaka na agilosi ni Kalou, e rairai bibi ka rerevaki, au a sega ni taroga vua se lako mai vei, ka sega ni tukuna vei au na yacana,

⁷ ia e kaya ga vei au: “O na kunekune ka vakasucuma e dua na gonetagane. Ia mo kakua ga ni gunuva na waini se dua na gunu kaukauwa ni mateni, me'u kakua ni kania e dua na ka e sega ni savasava, baleta na gonetagane oqo me na vakatabui vua na Kalou me nasiraiti mai na nona sucu ka yacova na nona mate.”

⁸ A vakamamasu vei Jiova o Manoa ka kaya: “Kemuni na noqu Turaga, au sa vakamamasu mo ni vakalesui koya tale mada mai na tamata ni Kalou o ni a tala mai me mai tukuna ka vakavulici keirau ena veika me keirau cakava ena vuku ni gone ena sucu mai.”

⁹ A rogoca na masu i Manoa na Kalou, ka sa lako tale mai na agilosi ni Kalou vua na yalewa ena nona a tiko voli ena i teitei; ia sa sega ni tiko vata kei koya na watina o Manoa.

¹⁰ A qai cici yani na yalewa ka tukuna vua na watina, “Na tamata ka a lako mai vei au ena siga o ya, sa rairai tale mai oqo vei au.”

¹¹ A tucake o Manoa ka muria yani na watina. A sa yaco yani vua na tamata ka taroga, “Sai kemuni beka na tamata ka vosa vua na watiqu oqo?” A sa kaya o koya, “Sai au ga.”

¹² A sa taroga tale o Manoa, “Ena gauna sa na yaco me dina kina na nomuni vosa, a cava li me na vakayacora na gone oqo? Kei na mataqali i tovo ni bula cava me muria?”

¹³ A sa tukuna na agilosi i Jiova vei Manoa: “Me rogoca vinaka ga na watimu na veika kece au sa tukuna vua ka me talairawarawa kina.

¹⁴ Me kakua ni kania o koya e dua na ka sa lako mai na vunivaini; me kakua ni gunuva na waini se dua na gunu kaukauwa ni mateni, se kania e dua na kakana tawa savasava. Me doka ka vakamuria na veika kece sara ka'u sa vakarota vua.”

¹⁵ A sa tukuna o Manoa vua na agilosi i Jiova: “Au kerea mo ni wawa mada. Me keirau la'ki vakarautaka mada e dua na luve ni me vei kemuni.”

¹⁶ A mani tukuna na agilosi i Jiova vei Manoa, “Kevaka o na tarovi au, au na sega ni kania na kakana. Ia kevaka o via vakarautaka tikoga, ia mo qai cabora ga vei Jiova.” (A sega ni kila o Manoa ni sai koya ga na agilosi i Jiova na tamata oqo.)

¹⁷ A sauma lesu o Manoa ka tukuna, “Ni tukuna mada mai vei keirau na yacamuni, ka me keirau vakacerecerei kemuni kina ni sa yaco dina na nomuni vosa.”

¹⁸ A sa taroga lesu vua na agilosi i Jiova, “A cava o sa taroga kina na yacaqu? Ni sa veivakurabuitaki ka dredre me kilai.”

¹⁹ A sa qai kauta na luve ni me kei na sila o Manoa ka vakacabora ena dela ni vatu vei Jiova, vei koya sa dau cakava na ka e veivakurabuitaki.

²⁰ Ia ni sa lako cake na yameyame ni buka mai na i cabocabonisoro, a sa raica vakakina o Manoa kei watina na nona sa lako cake talega na agilosi i Jiova ena yameyame ni buka; ka rau sa cuva vakatoboicu ga ki na qele.

²¹ A sega tale ni rairai mai vei Manoa kei na watina na agilosi i Jiova. A qai kila o Manoa ni sai koya ga o ya na agilosi i Jiova.

²² A sa tukuna o Manoa vei watina: “E daru na mate vakaidina, baleta ni daru sa raica na Kalou!”

²³ Ia sa qai tukuna vakaoqo na watina, “Kevaka sa nakita ko Jiova me vakamatei kedaru, ke a sa sega ni vakadonuya na nodaru vakacaboisoro; ke a sega talega ni vakaraitaka ka tukuna vei kedaru na veika kece sara oqo.”

²⁴ A vakasucuma na yalewa e dua na gonetagane ka vakayacani koya o Samisoni. A tubu cake na gone ka sa vakalougatataki koya ko Jiova.

²⁵ A sa vakatekivu me vakaukauwataki koya na yalo i Jiova ena nona a tiko voli ena tadrua ni vanua o Sora kei Esitaoli, ena i tikotiko o Tani.