Cakacaka 28 - Ai Vola Tabu Ena Vakavakadewa Vou

Mai Molota

¹ Ni keimami sa cabe bula i vanua, keimami sa qai kila ni yaca ni yanuyanu o ya o Molota.

² Era sa lomani keimami vakalevu sara o ira na i taukei. Era a kidavaki keimami kece, ka vakawaqa na buka ka ni sa tau mai na uca ka sa batabata sara na draki.

³ A la'ki kumuna mai e dua na i vesu buka o Paula, ka la'ki tuva sara ki na buka sa waqa koto; sa qai dolo mai kina e dua na gata ena vuku ni katakata, ka viviga na ligana.

⁴ Ia ni ra sa raica o ira na i taukei ni sa lili tiko na gata e ligana, era sa veikayaka vakai ira, “Sa tamata daulaba dina o koya oqo. E sa cabe bula mai wasawasa, ia e sega ga ni laivi koya me bula o Lewa Dodonu.”

⁵ Ia sa qai kuretaka tani na gata o koya ki na buka, ka sega ni dua na kena leqa e yaco vua.

⁶ Era namaka na i taukei me na vuce na yagona se me bale ka mate vakasauri. Ia ni ra sa waraka toka vakadede, ka raica ni sega ni dua na leqa e yaco vua, sa veisau tale na nodra vakasama ka ra sa kaya, “O koya e dua na kalou!”

⁷ E sega soti ni yawa maikea na veitiki ni qele nei Papiliu, na turaga ni yanuyanu o ya. E a kidavaki keimami ena yalo vinaka ka keimami nona vulagi tiko ena tolu na siga.

⁸ E a tauvi tama i Papiliu tiko na katakata kei na coka dra. Sa qai curu ki na vanua e davo koto kina o Paula ka masu, ka tabaki koya ena ligana, ka vakabulai koya.

⁹ Ni sa yaco na ka oqo, era sa qai lako yani na vo ni tauvimate ena yanuyanu o ya ka ra sa vakabulai.

¹⁰ Era a solia vei keimami e vuqa na ka-ni-loloma, ia ni keimami sa vakarau soko tale, era sa qai vakavodoka ki waqa na veika ena yaga vei keimami.

Mai Molota ki Roma

¹¹ Ni sa oti e tolu na vula, keimami sa qai soko ena dua na waqa ka kele koto ena yanuyanu o ya ena vula i liliwa. E waqa mai Alekisadria, ka vakatokai na “Drua kalou”.

¹² Keimami sobu mai na koro o Sairakiuse, ka tiko kina ena tolu na siga.

¹³ Mai kea keimami sa qai veicavuyaki ka yaco ki na koro o Rejiumi. Ena siga ka tarava, sa qai liwa toka mai na ceva, ka oti e rua na siga keimami sa yaco yani ki na koro o Putioli.

¹⁴ Keitou a sota e kea kei na so na tamata era sa vakabauta, ka ra kerei keitou me keitou tiko mada kei ira me dua na macawa. Oti o ya keimami sa qai lako ki Roma.

¹⁵ Era a sa rogoca mai na ka e baleti keitou o ira na vakabauta mai Roma, ka ra mani mai tatavaki sara tu ki na Makete i Apio kei na koro o Bure e Tolu. Ia ni sa raici ira o Paula sa vakavinavinaka vua na Kalou, ka sa vakayaloqaqataki vakalevu o koya.

Mai Roma

¹⁶ Ni keimami sa yaco ki na koro levu o Roma, sa qai vakatarai vei Paula me sa tikoga vakai koya, ka vakatawani koya voli ga e dua na sotia.

¹⁷ Ni oti e tolu na siga, sa qai kacivi ira vata na nodra i liuliu na Jiu e kea o Paula. Ni ra sa soqoni vata yani, sa qai kaya vei ira o koya. “Oi kemuni na wekaqu, e dina ga ni'u a sega ni cakava e dua na ka ca vei ira na noda qase, ia au a vesu ga ka soli vei ira na kai Roma mai Jerusalemi.

¹⁸ Ia ni ra sa vaqaqai au na kai Roma, era a via sereki au ni a sega na ka e dodonu me tau kina na i totogi mate vei au.

¹⁹ Ia ena nodra cata ga na ka oqo o ira na Jiu, au a mani vakauqeti kina me'u cavuta na Sisa me mai lewai au; e sega ni baleta ni dua na ka au beitaki ira kina na kai noqu.

²⁰ Sa i koya oqo na ka au sa via raici kemuni kina ka veivosaki kina kei kemuni, ni'u sa vesu tu ena sinucodo oqo ena vuku i koya na noda i nuinui na Isireli.”

²¹ Era sa mani kaya vua, “Keimami se sega ni taura e dua na i vola mai Jutia me baleti iko, ka se sega ni dua vei ira na wekada e lako maikea me tukuna se cavuta e dua na ka ca ka baleti iko.

²² Ia keimami sa gadreva me keimami rogoca na nomu i vakamacala, ni keimami kila ni ra sa vosa vakacacataka tiko na vakabauta vakatani oqo o ira na tamata ena veivanua kecega.”

Sa Vakamacalataka o Paula na Matanitu ni Kalou

²³ Era sa mani lokuca vua e dua na siga, ka ra sa lewe vuqa era lako yani kina ki na i tikotiko i Paula ena siga o ya. Sa qai vakamacala o koya ka tukuna vei ira na Matanitu ni Kalou, ka vakadinadinataki Jisu mai na Lawa i Mosese kei ira talega na parofita. E a vakamacala tiko o koya me tekivu ena mataka ka yacova na yakavi.

²⁴ Eso ga vei ira era a vakadinata na nona vosa, ka so e sega.

²⁵ Era a sega ni lomavata vakai ira, ka ra sa mani mai dui lako yani. Era qai dui lako o ya ni sa kaya oti o Paula na vosa oqo: “Sa dodonu dina na ka e kaya na Yalo Tabu ena vosa i Aisea na parofita vei ira na nomuni qase.

²⁶ Ni sa kaya na Kalou: ‘Lako vei ira na tamata oqo ka kaya, O ni na rogoca dina ka lecava tu ga, O ni raica dina ka sega ni kunea.

²⁷ Ni sa kaukauwa na lomadra na tamata oqo, Ka sa didivara na daligadra, Ka bobo na matadra. De na qai rai rawa na matadra, Ka rogo na daligadra, Ka kila na lomadra, Ka ra saumaki mai vei au, me'u vakabulai ira.’ ”

²⁸ Sa qai tinia o Paula ka kaya vakaoqo: “Sa dodonu mo ni kila tiko kina, ni sa kau na i tukutuku ni veivakabulai ni Kalou kivei ira na kai matanitu tani. Era na vakarorogo kina o ira.”

²⁹ (Ia ni sa tukuna oti na ka o ya o Paula, era sa mani lako tani na Jiu ka veileti sara vakalevu vakai ira.)

Sa Veivakatavulici Tiko o Paula me Rua na Yabaki

³⁰ E a tiko e kea o Paula, ena vale ka sauma tikoga o koya, ka rua taucoko na yabaki. A sa dau vakacegui ira kecega kina era lako yani vua.

³¹ A sa vunautaka tikoga o koya na Matanitu ni Kalou, ka veivakatavulici ena doudou kei na galala me baleta na Turaga ko Jisu Karisito.