Cakacaka 2 - Ai Vola Tabu Ena Vakavakadewa Vou

Na Lako Mai ni Yalo Tabu

¹ Ia ni sa yaco mai na siga ni Penitiko, era sa soqoni vata tiko ena dua na vanua o ira na vakabauta.

² Sa qai lako vakasauri mai lomalagi e dua na rorogo, e vaka na cagi vakacevaruru kaukauwa, ka vakasinaita na vale taucoko era tiko kina.

³ Sa qai rairai vei ira na ka e vaka na yameyame ni buka, sa veisebayaki, ka la'ki toka ena buradela ni tamata yadua.

⁴ Era sa vakasinaiti kecega ena Yalo Tabu, ka sa vakatekivu me ra vosataka na veivosa tani eso, me vaka sa solia vei ira na Yalo Tabu.

⁵ Era a tiko e Jerusalemi eso na Jiu, era tamata lotu, ka ra lako mai na veivanua kecega ena ruku i lomalagi.

⁶ Ia ni sa rogo yani na rorogo o ya, era sa qai soqoni vata kina na lewe vuqa; ka ra sa kurabui ni ra rogoci ira era sa vakabauti Jisu ni ra vosa tiko ena nodra duivosa ni vanua na tamata yadua.

⁷ Era sa kurabui kecega ka qoroqoro, ka kaya vakai ira, “O ira na tamata era sa vosa tiko vakaoqo era sa kai Kalili kece sara!

⁸ E qai rawa beka ga vakacava, ni da sa rogoca kece tiko oqo na nodra sa vosataka tiko na noda dui i vosavosa oi keda?

⁹ O keda oqo eda sa dui lako mai Paricia, kei Mitia, vata kei Ilama; mai Mesopotemia, kei Jutia, vata kei Kapatosia; mai Ponito vata kei Esia,

¹⁰ mai Firijia vata kei Pamifilia, mai Ijipita, kei na yasayasa vaka-Libiya e voleka ki Kirini. Eso vei keda sa lako mai Roma,

¹¹ o ira na Jiu kei na kai matanitu tani sa vuki ki na lotu vaka-Jiu, ka eso vei keda sa lako mai Kiriti kei Arapea — ia eda sa rogoca kece sara ni ra vosataka tiko ena noda dui i vosavosa na veika e baleta na cakacaka veivakurabuitaki sa cakava na Kalou!”

¹² Era sa kurabui kecega ka taqaya, ka veikayaka vakai ira, “A cava na i balebale ni ka oqo?”

¹³ Ia eso tale era sa vakalialiai ira na vakabauta, ka kaya, “Era sa mateni o ira oqo!”

Na i Tukutuku i Pita

¹⁴ Sa qai tucake o Pita kei iratou na lewe tinikadua, ka sa tabalaka cake na domona, ka kaya vei ira, “Oi kemuni na Jiu, kei kemuni kecega sa tiko oqo e Jerusalemi! Ni rogoci au mada ka me'u tukuna vei kemuni na i balebale ni veika sa yaco oqo.

¹⁵ E ratou sega ni mateni o iratou oqo, me vaka o ni sa nanuma; e se qai ciwa ga oqo na kaloko ena mataka.

¹⁶ Ia, sai koya ga oqo na ka e sa vosa oti kina o Joeli na parofita:

¹⁷ ‘Sa kaya na Kalou, Sa i koya oqo na ka au na vakayacora ena gauna mai muri. Au na sovaraka na Yaloqu vei ira na tamata kecega; Era na parofisai o ira na luvemuni tagane kei ira na luvemuni yalewa, Ka ra na raica eso na raivotu o ira na nomuni cauravou, Ka ra na tadra na tadra eso o ira na nomuni qase.

¹⁸ Io, vei ira talega na noqu bobula, na tagane kei na yalewa, Au na sovaraka vei ira na Yaloqu ena gauna o ya ka ra na parofisai kina.

¹⁹ Ka'u na cakava na veika e veivakurabuitaki mai lomalagi e cake Kei na veivakatakilakila eso ena vuravura e ra. Ena basika kina na dra, kei na bukawaqa, kei na kubou vavaku;

²⁰ Ena vuki na matanisiga me butobuto, Ka na damu na vula me vaka na dra Ni bera ni yaco mai na siga lagilagi ka rogo ni Turaga.

²¹ Ena qai yaco me vakabulai o koya yadua sa masuta na yaca ni Turaga.’ ”

²² “Oi kemuni na Isireli, ni rogoca mada na veivosa oqo! Ko Jisu na kai Nasareci sai koya na tamata ka sa vakadinadinataki koya oti ena nona i tutu vakalou mai na veicakacaka mana kei na veika veivakurabuitaki sa vakayacora na Kalou ena vukuna. O ni sa kila vinaka na ka oqo oi kemuni, ni sa yaco na veika oqo ena kemuni maliwa.

²³ E a soli yani ko Jisu vei kemuni me vaka ga sa nakita ka kila e liu na Kalou. O ni a qai tauri koya ka vakota ki na kauveilatai, ka vakamatea ena ligadra na tamata ca.

²⁴ Ia sa qai vakaturi koya cake tale na Kalou ni sa sereki koya mai na i vau ni mate, ni sega ni rawa me vauci tikoga kina.

²⁵ Ni a sa kaya tu o Tevita me baleti koya, ‘Au a sa raica rawa tiko ni na dau tiko vata ga kei au na Turaga; Ni sa tu o koya ena yasaqu i matau, Me'u kakua kina ni yavalati.

²⁶ O koya oqo ka'u sa vakasinaiti kina ena yalomarau, Ka sa sinai ena reki na noqu vosa. Ia oi au, ni sa vakaiyalayala ga na noqu bula, Ka'u na tiko vakacegu ga ena i nuinui,

²⁷ Baleta ni o ni na sega ni biuti au tu mai ena nodra vuravura na mate; Ka sega ni vakatara vua na nomuni tamata yalodina me vuca ena i bulubulu.

²⁸ O ni sa vakatakila vei au na sala eso ki na bula; Kei na nomuni sa tiko vata kei au ena vakasinaiti au ena marau.’

²⁹ “Oi kemuni na wekaqu na Isireli, ni vosota me'u tei tukuni Tevita vakadodonu mada vei kemuni. A sa mate o koya, ka bulu, ka se tu ga oqo vei keda na kena i bulubulu me yacova na siga edaidai.

³⁰ A sa dua talega na parofita o koya, ka sa kila na veika sa bubului oti kina vua na Kalou: ni sa yalataka vua na Kalou ni na vakayacora e dua e kawa mai vei Tevita me tui, me vakataki Tevita ga.

³¹ A sa raica rawa o Tevita na veika ena cakava na Kalou ena gauna mai muri, ka sa tukuna kina na veika e baleta na tucake tale mai na mate nei koya na Mesaia ni sa kaya vakaoqo: ‘A sa sega ni biu tu ga yani o koya ena nodra vuravura na mate; Ka sa sega ni vuca na yagona e loma ni bulubulu.’

³² Sa i koya ga na Jisu oqo ka sa vakatura cake tale mai na mate na Kalou, ka keitou sa kena i vakadinadina kece oi keitou oqo.

³³ A sa kau cake o koya ki na liga i matau ni Kalou na Tamana, ka sa ciqoma mai vua na Yalo Tabu, me vaka sa yalataka. Na veika o ni sa raica ka rogoca tiko oqo sai koya na nona i solisoli ka sa sovaraka mai vei keda.

³⁴ E a sega ni lako cake ki lomalagi o Tevita; ia sai koya ga ka sa kaya: ‘Sa kaya na Turaga vua na noqu Turaga: Mai dabe ena yasaqu i matau,

³⁵ Me yacova ni'u sa biuti ira na nomu meca me ra i tutu ni yavamu.’

³⁶ “O koya oqo mo ni kila kece sara kina na Isireli, ni ko Jisu oqo, o koya o ni a vakota ki na kauveilatai, sai koya ga oqo e sa lesia na Kalou me Turaga ka Mesaia!”

³⁷ Ia ni ra sa rogoca na tamata na vosa o ya sa laucoka na lomadra, ka ra sa kaya vei Pita kei iratou na vo ni apositolo, “Oi kemudou na weka i keimami, a cava me keimami cakava?”

³⁸ Sa qai kaya vei ira o Pita, “Oi kemuni yadua mo ni veivutuni ka papitaisotaki ena yaca i Jisu Karisito, me bokoci kina na nomuni i valavala ca; ena qai soli vei kemuni na i solisoli ni Kalou, na Yalo Tabu.

³⁹ Ni a caka na vosa ni yalayala ni Kalou, vei kemuni kei ira talega na nomuni gone, kei ira kecega era tiko vakayawa, io vei ira kecega ena kacivi ira ki vua na Turaga na noda Kalou.”

⁴⁰ E a tusanaka e vuqa tale na ka o koya, ka vakauqeti ira kina, ka kaya, “Ni vakabulai kemuni mai na i tabatamata takelo oqo.”

⁴¹ Era sa mani papitaisotaki o ira era vakabauta na nona vosa; ka rauta e 3,000 na tamata e vakaikuritaki kina na kedra i wiliwili na vakabauta ena siga o ya.

⁴² Era sa soli ira vakatabakidua ki na nodratou veivakatavulici na i apositolo, na tiko vakaveitokani, na dovi madrai kei na masumasu.

Na Bula ena Kedra Maliwa na Vakabauta

⁴³ A yacovi ira kecega na tamata na rere ena levu ni cakacaka mana kei na veika veivakurabuitaki e ratou cakava na i apositolo.

⁴⁴ Era sa la'ki tiko vata tikoga o ira kece sa vakabauta, ka ra dui solia na nodra i yau me ra taukena vata.

⁴⁵ Era volitaka na nodra vanua kei na nodra i yau, ka vota na kena i lavo kivei ira kece, me vaka na ka e ganita na tamata yadua.

⁴⁶ Era dau tiko ena lomavata ena Valenisoro ena veisiga, ka dovi madrai ena nodra veivale, ka kania na kedra ena marau kei na lomavinaka,

⁴⁷ ka vakavinavinaka vua na Kalou, ka marautaka na i solisoli loloma ni tamata kecega. A sa vakaikuritaka na Turaga na i wiliwili ni tamata vakabulai ki na nodra i soqosoqo ena veisiga.