Cakacaka 1 - Ai Vola Tabu Ena Vakavakadewa Vou

Na Yalataki ni Yalo Tabu

¹ I Ceofilo, ena i matai ni vola, au sa vola kina na veika kece sa vakayacora ka vakatavuvulitaka ko Jisu mai na i tekivu ni gauna

² me yacova na siga sa kau cake kina ki lomalagi. Ni bera na nona kau cake, a sa veivakaroti oti ena kaukauwa ni Yalo Tabu vei iratou ka sa digitaka o koya me ratou nona i apositolo.

³ Ena loma ni 40 na siga ni oti na nona tucake tale mai na mate, a sa vakaraitaki koya vei iratou ena vuqa na sala sa vakadinadinataki kina ni sa bula tiko vakaidina o koya. Era sa raici koya, ka sa tukuna vei ira o koya na veika me baleta na Matanitu ni Kalou.

⁴ Ia ni ratou sa soqoni vata, sa qai vakarota vei iratou o koya vakaoqo: “Dou kakua ni biuti Jerusalemi, ia dou waraka tikoga na i solisoli ka'u a sa tukuna oti vei kemudou, na i solisoli sa yalataka ko Tamaqu.

⁵ A sa veipapitaisotaki ena wai o Joni, ia dou na qai papitaisotaki ena Yalo Tabu ena vica ga na siga oqo.”

Sa Kau Cake ko Jisu

⁶ Ni ratou sa soqoni vata yani vei Jisu, e ratou sa tarogi koya, “Turaga, o ni na vakalesuya tale beka na matanitu o Isireli ena gauna sara ga oqo, se segai?”

⁷ Sa qai kaya vei iratou o koya, “E sega ni nomudou i tavi mo dou la'ki kila na kena gauna se na kena vula, ni sa lesia tu o ya ko Tamaqu ena nona lewa ga vakai koya.

⁸ Ia dou na vakasinaiti ena kaukauwa ni sa sobuti kemudou na Yalo Tabu, ka dou na qai noqu i vakadinadina e Jerusalemi, kei Jutia taucoko kei Samaria, ka yacova na i yalayala kei vuravura.”

⁹ Ni sa tukuna oti na veika oqo, ni ratou se vakaraici koya tu, a sa qai kau cake ki lomalagi, ka sa tabonaki koya mai na matadratou e dua na o.

¹⁰ Ena gauna sa lako cake tiko kina ko Jisu ka ratou se vakararai matua tikoga ki lomalagi na i apositolo, eratou qai kidacala ni sa duri tu e yasadratou e lewe rua na tamata sa vakaisulu vulavula.

¹¹ Erau sa qai kaya, “Oi kemudou na kai Kalili, a cava o dou sa tu ka vakararai kina ki lomalagi? Ko Jisu ka sa kau cake oqo ki lomalagi, ena lako tale mai ena sala vata ga dou sa raica ni sa lako kina ki lomalagi.”

Na i Sosomi kei Jutasa

¹² E ratou sa mani lesu tale na i apositolo ki Jerusalemi mai na Ulunivanua ni Veiolive, ka sa rauta ga e dua na kilomita na kena yawa.

¹³ Ni ratou sa yaco yani ki Jerusalemi, e ratou sa lako sara ki na rumu ena tabavale e cake ka ratou tiko kina: o ya o Pita, kei Joni, o Jemesa vata kei Adriu, o Filipe vata kei Tomasi, o Pacolomiu vata kei Maciu, o Jemesa na luve i Alifio, o Saimoni na Gumatua, kei Jutasa na luve i Jemesa.

¹⁴ E ratou sa dau sota vakawasoma me ratou dau masumasu vata, ka vakakina o iratou na yalewa, kei Meri na tina i Jisu, kei iratou na tacina.

¹⁵ Ni oti e vica na siga, sa qai vakayacori e dua na nodra soqoni na vakabauta ka sa rauta ni 120 na kedra lewe levu. Sa qai tu cake ena kedra maliwa o Pita ka kaya,

¹⁶ “Oi kemuni na veiwekani, sa dodonu me vakayacori oqo na veika sa kaya na i Vola Tabu, ena nona sa kaya na Yalo Tabu ena gusu i Tevita na parofisai me baleti Jutasa, o koya ka a la'ki vakatakilai Jisu vei ira sa vesuki koya.

¹⁷ E a lewena tu na i lawalawa oqo o Jutasa, ni a sa digitaki o koya me vakaitavi ena noda cakacaka.”

¹⁸ (A sa volia o Jutasa e dua na tiki ni qele mai na i lavo sa saumi kina na nona cakacaka ca, ka sa mate kina; ka sa kacabote na boto ni ketena, ka lutu kece mai ki tuba na wawa ni ketena.

¹⁹ A sa rogo yani na ka oqo vei ira kecega era tiko e Jerusalemi, ka ra mani vakatoka kina na vanua o ya ena nodra vosa, me o Akeletama, ka kena i balebale, “Na Vanua ni Dra’.)

²⁰ “Ni sa volai tu ena i Vola ni Same, ‘Me lala didi sara na nona vale, Ka me kakua ni dua e tawana.’ Sa volai talega: ‘Me qai dua tani tale me taura na nona i tutu.’

²¹ “Ena ka oqo, sa dodonu kina me na dua tale na tamata me na tomani kedatou me i vakadinadina ki na tucake tale mai na mate nei Jisu Karisito. O koya oqo me na dua vei ira sa dau sala vata voli kei kedatou na i apositolo ena gauna taucoko ka tiko kina kei keda na Turaga ko Jisu,

²² me vakatekivu mai na veipapitaisotaki i Joni, ka yacova na siga sa kau cake tani kina mai na keda maliwa.”

²³ Era sa qai vakatura mai e lewe rua: o Josefa, ka sa vakatokai talega o Parisapa (ka yacana talega o Jusitu), ka kena i karua o Mataiasi.

²⁴ E ratou sa qai masu ka kaya, “Oi kemuni na Turaga, oi kemuni o ni sa kila na yalo ni tamata kecega, mo ni vakatakila mada mai se o cei vei rau oqo o ni sa digitaka,

²⁵ me taura na i tutu ni apositolo ka me sosomitaki Jutasa, o koya sa lako ki na vanua e dodonu me lako kina.”

²⁶ E ratou sa qai vakawirimadigitaki rau, ka sa mani golevi Mataiasi na madigi; ka sa mani okati kina o koya me i apositolo vata kei iratou na le tinikadua.