Aisea 61 - Ai Vola Tabu Ena Vakavakadewa Vou

Na i Tukutuku Vinaka ni Veisereki

¹ Sa sobuti au na Yalo ni Turaga ko Jiova. Sa digitaki au o koya ka talai au Me'u kauta na i tukutuku vinaka vei ira na dravudravua, Ka vakabulai ira sa mavoa na yalodra, Me'u vunautaka na veisereki vei ira era tiko vakabobula Kei na galala vei ira era tiko ena valeniveivesu.

² Sa talai au o koya me'u vunautaka Ni sa yaco mai na gauna, Me na vakabulai ira kina na nona tamata ko Jiova Ka vakadrukai ira na kedra meca. Sa talai au o koya me'u vakacegui ira era sa tagi,

³ Me'u solia vei ira era sa tagi mai Saioni Na reki kei na marau ka sega ni rarawa, Na sere ni veivakacaucautaki ka sega ni lolosi. Na Turaga sara ga vakai koya ena qaravi ira; Ka ra na tete yani me vaka na kau. Na tamata yadua ena cakava na ka dodonu, Ka na qai vakacaucautaki na Kalou ena ka sa cakava.

⁴ Era na tara vou tale na veikorokoro sa vakarusai makawa tu.

⁵ Kemuni na noqu tamata, era na qaravi iko na vulagi. Era na vakani ira na nomuni qele ni sipi Ka teivaka na nomuni vanua ka qarava na nomuni veivaini.

⁶ Ia o ni na kilai tu mo ni bete i Jiova, Na dauveiqaravi ni noda Kalou. O ni na taleitaka na nodra i yau na veimatanitu, Ka cibitaka ni sa okati me nomuni.

⁷ Sa na oti na nomuni madua kei na nomuni beci. O ni sa na tiko ga ena nomuni vanua. Sa na vakaruataki na nomu i yau; Ka na sega ni mudu na nomuni reki.

⁸ A sa kaya ko Jiova, “Au sa vinakata ga na yalododonu ka'u sa cata na butako kei na i lavo ca. Au na yalodina me'u saumi ira na noqu tamata, Ka cakava e dua na veiyalayalati tawa mudu kei ira.

⁹ Ena yaco me ra rogo levu sara vei ira na veimatanitu; O ira kece era raici ira era na kila Ni sai ira e dua na mata tamata au sa vakalougatataka.”

¹⁰ Mo marau Jerusalemi ena vuku ni ka sa cakava ko Jiova. Sa vaka na yalewa e vakarau vakawati Sa dara na nona i sulu ni vakamau. Sa vakasulumi koya na Kalou Ena veivakabulai kei na qaqa.

¹¹ Me vaka ni sa bula ka tubu na sorenikau, Ena vakabulai ira na nona tamata vakakina Ko Jiova ni lewevuqa. Era na vakacaucautaki koya na veimatanitu.