Aisea 60 - Ai Vola Tabu Ena Vakavakadewa Vou

Na Lagilagi sa Waraki Jerusalemi

¹ Mo mata cake, i Jerusalemi, ka cila vaka na siga; Sa serauni iko na lagilagi i Jiova!

² Na veimatanitu tale eso ena tabonaki ena butobuto; Na ramase ni nona i serau ena tiko vata kei iko.

³ Na veimatanitu era na vakayarayarataki mai ki na nomu rarama, Kei ira na tui ki na kida ni nomu siga vou.

⁴ Rai wavoki mada ka raica na ka sa yaco: Era sa soqoni vata na luvemu Me ra lesu mai vei iko. Era na lako mai na luvemu tagane Mai na vanua yawa Ka ra na colati na luvemu goneyalewa Me vakataki ira na gone.

⁵ O na raica na ka oqo ka vakasinaiti ena marau, O na kaikaila ena marau. Na i yau ni veimatanitu ena kau mai vei iko Kei na i yau mai na wasawasa.

⁶ Ena levu sara na kameli era na lako mai vei iko mai Mitiani kei Ifa. Era na lako mai o ira mai Sipa, Ka ra na kauta mai na koula Kei na ferekiniseni; Era na mai tukuna na tamata na i tukutuku vinaka Ni ka e sa cakava na Kalou.

⁷ Era na kau mai vei iko na sipi kece ni Kitari kei Nepeioci me i soro kama Ka ra mai cabo ena i cabocabonisoro Me yalovinaka kina ko Jiova.

⁸ Na cava sa lako mai oqo me vaka na o, Se na qele ni ruve ni ra lesu ki na nodra i tikotiko?

⁹ Sa i ira oqori na waqa era lako mai na veivanua yawa, Era kauti ira mai na tamata ni Kalou ki na nodra vanua. Era sa kauta vata mai kei ira na siliva kei na koula Me vakarokorokotaki kina na yaca i Jiova Na Kalou Yalosavasava ni Isireli, O koya sa cakava me ra dokai ira Na nona tamata na veimatanitu kece.

¹⁰ A sa kaya ko Jiova ki Jerusalemi, “Era na tara na kemu bai na kai veimatanitu tani Ka ra na qaravi iko ena noqu vinaka kei na noqu loloma.

¹¹ Ena dola tu ga na nomu matamata ena siga kei na bogi, Me ra kauta mai kina vei iko na tui ni veimatanitu na nodra i yau.

¹² Ia na matanitu ena sega ni qaravi iko Ena vakarusai vakadua sara.

¹³ Na i yau kei Lepanoni ena kau mai vei iko. Na damanu, na paini kei na dilo Me mai vakarairaivinakataki kina na noqu vale tabu, Me lagilagi kina na i tutu ni yavaqu.

¹⁴ Era na lako mai na luvedra era vakasaurarataki iko, Ka ra mai cuva sobu me ra vakarokoroko Kei ira kece era beci iko era sa na qaravi iko. Era na vakatokai iko me yacamu ‘Na koro ni Turaga’ O ‘Saioni na koro ni Kalou Yalosavasava ni Isireli.’

¹⁵ O na sega tale ni cati se biu wale tu, Me dua na koro sa vakalalai ka lala tu. Au na cakava tale me koro levu ka rairai vinaka Ka mo vanua ni marau ka sega ni mudu.

¹⁶ Era na qaravi iko na veimatanitu kei na tui e vuqa Me vaka e dua na tina sa qarava na luvena. O na qai kila ni sai au ko Jiova O koya a vakabulai iko. Ni sai koya na nodra Kalou Kaukauwa na Isireli O koya sa sereki iko.

¹⁷ Au na kauta mai vei iko na koula me i sosomi ni parasa Na siliva mei sosomi ni kaukamea Kei na parasa me i sosomi ni kau. Era sa na sega tale ni qai vakasaurarataki iko na nomuni i liuliu. Au na cakava me ra liutaki iko Ena dodonu kei na sautu.

¹⁸ Ena sega tale ni rogoci vakadua Na i rogorogo ni tovo kaukauwa Ka na sega tale ni vakarusai na nomu vanua. Au na viribaiti iko ka taqomaki iko me vaka e dua na bai, O na qai vakacaucautaki au ni'u sa vakabulai iko.

¹⁹ Na matanisiga ena sega tale ni qai nomu rarama ena siga Se na vula me nomu rarama ena bogi; Oi au, ko Jiova, ka'u na nomu rarama tawamudu; Ena vakararamataki iko na i serau ni noqu i ukuuku.

²⁰ Sa na oti na nomu gauna ni rarawa Ka'u sa na nomu rarama tawa mudu oi au ko Jiova. Au na dede cake mai na matanisiga kei na vula.

²¹ O ira kece na luvemu era na cakava na ka dodonu Ka taukena na vanua ka tawa mudu. Au a tei ira, ka buli ira, Me'u vakaraitaka na noqu cecere vei ira kece.

²² Na nomu vuvale lailai ka yalo malua duadua sara mada ga Ena yaco me levu me vaka e dua na matanitu qaqa. Au na cakava me yaco mai vakatotolo na ka oqo Ni sa yaco na kena gauna dodonu. Oi au ko Jiova.