Aisea 53 - Ai Vola Tabu Ena Vakavakadewa Vou

¹ Era sa kaya na tamata, “O cei me na vakabauta na veika keitou a rogoca? O cei me na raica rawa na liga i Jiova ena ka oqo?”

² Ni sai naki ga i Jiova vua na nona dauveiqaravi oqo me tubu vaka na kau sa tubu ena vanua mamaca. Sa sega na ka e dokai se rairai vinaka me da na via raici koya kina. Sa sega na ka me malele kina vua na yaloda, ka segai na ka me dreti keda yani ki vua.

³ Era sa beca ka cati koya na tamata Ka sa vosota na veika rarawa kei na mosi. E sega mada ni dua e bau via raici koya; Ka da beca ka sega ni dokai koya.

⁴ “Ia sa vosota o koya na veika rarawa e dodonu me yacovi keda Kei na mosi e dodonu me da sotava. Ia eda sa nanuma ni sa vakavuna na Kalou Na nona rarawa kei na nona totogitaki.

⁵ Ia sa vakamavoataki o koya ena vuku ni noda ca Ka sa mokuti ena vuku ni noda i valavala ca. Eda sa sereki ena vuku ni nona totogi Ka vakabulai ena nona vakanakuitataki.

⁶ Oi keda kece eda sa vaka na sipi sa lako sese Ka da sa dui lakova ga na sala eda dui muria. Ia sa qai vakaitotogitaki koya ko Jiova Ena i totogi e dodonu me tau vei keda kece.

⁷ “Sa vakararawataki vakaca sara o koya, ia sa vakamalumalumu ga Ka sega ni bau kaya e dua na vosa. Sa galu talega o koya Me vaka na lami sa vakarau me koti.

⁸ A sa vesu o koya ka lewai me mate Ia a sega ni bau dua e kauwaitaki koya. A vakamatei o koya ena vuku ni nodra i valavala ca na noqu tamata.

⁹ Era sa cakava na kena i bulubulu vata kei ira na tamata ca Ka bulu vata kei ira na tamata vutuniyau; Dina ga ni a sega ni bau cakava e dua na i tovo kaukauwa, Se vosataka e dua na ka lasu na gusuna.

¹⁰ Ia sa na raici ira na nona kawa o koya Ka na balavu sara na nona bula, Ka rawa vakavinaka sara na noqu i naki ena vukuna.

¹¹ Ni a oti e dua na bula ni vakararawataki Sa na qai yacovi koya tale na marau; Ni sa kila ni sega ni tawa yaga na nona vakararawataki. Sa i koya na noqu dauveiqaravi Yalosavasava; Ena colata na nodra i totogi na lewe vuqa, Ka qisi ira me ra noqu tamata yalodina.

¹² Au sa na qai solia kina vua e dua na i tutu dokai E dua na i tutu ena kedra maliwa Na tamata cecere kei ira na tamata qaqa. E a solia yani vakai koya na nona bula Ka wiliki vata kei ira na tamata ca. Sa colata na nodra i valavala ca na lewe vuqa Ka veimasulaki ena vukudra na i valavala ca.