Aisea 52 - Ai Vola Tabu Ena Vakavakadewa Vou

Na Kalou ena Vueti Jerusalemi

¹ I Jerusalemi, mo yadra mai! Vakaukauwataki iko tale mada Ka daramaka na nomu i sulu lagilagi. Era na sega ni curu tale mai ena kemu matamata, O ira na tawa cili kei ira era sega ni kila na Kalou.

² Tucake mai Jerusalemi, Ka kuretaka laivi vei iko na kuvu ni qele. Ni sereka tani na kemuni i vesu Na lewe i Saioni o ni vakabobulataki tu!

³ A sa kaya ko Jiova vei ira na nona tamata: “Ena nomuni a tiko vakabobula, o ni a sega ni voli ena lavo; o ni na sega talega ni voli lesu ena i lavo ena nomuni sereki.

⁴ Ena nomuni a lako sobu taumada ki Ijipita ka la'ki tiko vakavulagi voli kina, o ni a vakayacora oqo ena nomuni yalo galala. Ia sa kauti kemuni ga vakaukauwa o Asiria ka sega ni saumi kemuni ena dua na ka.

⁵ Ia oqo, sa kitaka vakakina o Papilonia: sa vesuki kemuni mo ni bobula, ka sega ni saumi kemuni. Na nodra i liuliu na tamata sa kauti kemuni tani era sa dokadoka ga ka kaikaila, ka vosa vakacacataka na yacaqu.

⁶ Ia ena yaco mai na gauna mo ni kila kina na yacaqu, ka vakataudeitaka ni sai au ga na Kalou sa vosa oqo vei kemuni.”

⁷ Sa na dua na ka rairai vinaka Na noda raica na nona lako kosova mai na veiulunivanua, O koya sa kauta mai na i tukutuku vinaka; Na i tukutuku ni vakacegu. Sa mai kacivaka na qaqa o koya, ka kaya ki Saioni, “Sa tui na nomu Kalou!”

⁸ Era na kaila o ira era yadrava tiko na nomuni koro, Ka ra qolou vata ena marau! Era sa raica sara ga e matadra, Na nona lesu mai ko Jiova ki Saioni.

⁹ Ni kailavaka vata yani ena marau Na veiyasa i Jerusalemi sa rusa tu! Sa vakacegui ira na nona tamata ko Jiova Ka vakabula tale na nona koro.

¹⁰ Ena vakayagataka ko Jiova Na nona kaukauwa savasava; Ena vakabulai ira na nona tamata o koya, Ka na raica oqo o vuravura taucoko.

¹¹ Ni biuti Papiloni ka lako, Oi kemuni kece sa daucolata na i yaya ni valenisoro! Ni kakua sara ni taura e dua na ka dukadukali; Mo ni savasava tikoga ka biuta na koro.

¹² O ni na qai sega ni lako yani vakusakusa, Ka sega ni tovolea mo ni dro! Ena liutaki kemuni ga ko Jiova na nomuni Kalou Ka veitaqomaki talega mai dakumuni.

¹³ A sa kaya ko Jiova, “Ena qaqa ni qarava na nona i tavi na noqu dauveiqaravi Ka na vakacerecerei o koya, ka vakalagilagi.

¹⁴ Era lewe vuqa era kidroa ni ra raici koya Ni sa vakacacani vakalevu Ka sa sega ni vaka na i rairai ni tamata.

¹⁵ Ia oqo era na kurabui e vuqa na matanitu ena vukuna, Ka ra na sega ni vosa rawa na tui ena nodra kidroa. Era na qai raica ka kila Na veika era a sega ni kila.”