Aisea 51 - Ai Vola Tabu Ena Vakavakadewa Vou

Na Vosa ni Veivakacegui vei Jerusalemi

¹ A sa kaya ko Jiova, “Ni rogoci au mada, oi kemuni sa vinakata na bula, Oi kemuni o ni lako mai vei au me'u vukei kemuni. Ni nanuma mada na vatu o ni a lako mai kina, Sa i koya na vatu o ni a ta mai kina.

² Ni nanuma mada na nomuni tubutubu o Epara-ama Kei Sera o koya o ni a kawa mai vua. Ena gauna au a kacivi Epara-ama kina E a sega tu na luvena, Au a qai vakalougatataki koya, Ka vakalewevuqataka na nona kawa.

³ “Au na vakaraitaka na noqu loloma ki Saioni Kei na kena veiyasana kece sa rusa tu. E dina ga sa vaka tu e dua na vanua dravuisiga, Au na cakava me dua na loga ni teitei, Me vaka na i teitei au a cakava mai Iteni. Ena yaco e kea na reki kei na marau Kei na sere ni veivakacaucautaki Kei na vakavinavinaka vei au.

⁴ “Ni rogoci au mada na noqu tamata, Ni vakarogoca mada na ka au kaya: Au sa solia na noqu i vakavuvuli ki na veimatanitu; Na noqu lawa ena kauta yani vei ira na rarama.

⁵ Au na lako vakatotolo yani me'u vakabulai ira, Sa voleka mai na noqu gauna ni qaqa. Oi au ga au na liutaki ira na veimatanitu, Ka ra na waraki au na veivanua yawa Era nuitaki au me'u vakabulai ira.

⁶ Raica cake mada na lomalagi; ka sarava na vuravura! Ena seavu yani na lomalagi me vaka na kubou; Ena madra yani na vuravura me vaka na i sulu makawa, ka ra mate kece talega na tamata era tiko kina me vaka na lago. Ia na veivakabulai au na cakava ena tawamudu; ka na tudei tu ga na noqu qaqa.

⁷ “Ni rogoci au mada oi kemuni o ni kila na ka dodonu Oi kemuni sa tu e lomamuni na noqu i vakavuvuli. Ni kakua ni rere ni ra vakalialiai kemuni Ka vakacacani kemuni na tamata.

⁸ Ena kani ira na sarasara me vaka na i sulu, Ka kani ira na bacaniqele me vaka na vutinisipi. Ia na veivakabulai au na kauta yani ena sega ni mudu Ka na tudei tu ga na noqu qaqa.”

⁹ Ni yadra mada, Jiova, ka vukei keimami! Ni vakayagataka na nomuni kaukauwa Mo ni vakabulai keimami. Ni vakayagataka mada Me vaka na nomuni a vakayagataka ena gauna e liu. Oi kemuni ga o ni a musumusulaki Reavi, Na drakoni levu ni wasawasa.

¹⁰ Oi kemuni ga o ni a vakamacara na wasawasa Ka cakava ena loma ni wasawasa e dua na sala, Me ra rawa ni lako kina o ira o ni vakabulai ira.

¹¹ O ira o ni vakabulai ira Era na yaco ki Jerusalemi ena marau, Era na sere ka kaila ena reki. Era na marau ka sega ni mudu Ka galala mai na rarawa kei na veika dredre.

¹² A sa kaya ko Jiova, “Oi au ga au a vakacegui kemuni. Na cava mo ni rerevaki ira kina na tamata Ni ra sa dau mate talega, Ka ra sa sega ni bula dede cake mai vei ira na co?

¹³ O ni sa guilecavi Jiova beka o koya ka a buli kemuni O koya ka a tevuka na lomalagi Ka cakava na yavu kei vuravura? Na cava o ni rerevaka tikoga kina na nodra cudru o ira sa vakararawataki kemuni? Sa evei kina na cudru o ya?

¹⁴ O ira na vakararawataki era na sereki vakatotolo, Era na sega ni mate ka bulu Se na sega na kedra kakana.

¹⁵ “Oi au ko Jiova na nomuni Kalou, Ka'u sa vakayavalata na wasawasa Ka vakavuna me vadugu na kena ua. Na yacaqu ko Jiova ni lewevuqa.

¹⁶ Au a tevuka yani na lomalagi Ka bulia na yavu kei vuravura; Ka'u kaya ki Saioni, ‘Oi kemuni na noqu tamata! Au a solia vei kemuni mo ni na noqu i vakavuvuli Ka taqomaki kemuni ena ligaqu.’ ”

Na i Cavacava ni Vakararawataki nei Jerusalemi

¹⁷ I Jerusalemi, mo yadra mai! Yadra mada ka duri cake! O a mateni ena bilo ni veitotogitaki E a solia vei iko ena nona cudru ko Jiova mo gunuva; O a gunuva kece ka vakavuna mo veicebayaki.

¹⁸ A sega ni dua me tuberi iko Ka sa sega ni dua vei ira na luvemu Me tuberi iko ena ligana.

¹⁹ Sa yaco vei iko e rua na leqa oqo: Sa vakacacani sara na nomu vanua ena i valu, Ka ra sa viakana na luvemu. A sega ni dua me lomani iko.

²⁰ Era sa mata buto ena malumalumu na luvemu, Era sa davo koto ena veitutu ni sala; Era sa vaka na dia sa coko ena nona i cori na dauvakasasa. Era sa vakila na kaukauwa ni cudru i Jiova.

²¹ Kemuni na lewe i Jerusalemi o ni sa rarawa, O ni sa veicebayaki me vaka o ni sa mateni.

²² Sa taqomaki kemuni ko Jiova na nomuni Kalou, A sa kaya, “Au sa kauta tani mai na ligamuni Na bilo au a solia vei kemuni ena noqu cudru. O ni sa na sega tale ni gunuva Na waini o ni a veicebayaki kina.

²³ Au na qai solia vei ira sa vakararawataki kemuni, O ira era vakavuna mo ni davo sobu ena veisala, Ka buturaki kemuni ena nodra veilakoyaki.”