Aisea 47 - Ai Vola Tabu Ena Vakavakadewa Vou

Tau na Lewa vei Papiloni

¹ A sa kaya ko Jiova, “Papiloni, siro sobu mai na nomu i tikotiko vakaturaga, Ka mai dabe ena qele. O a vaka e dua na goneyalewa, E dua na koro sega ni druka rawa! Sa oti na kemu totoka kei na kemu lagilagi! O sa yaco oqo mo dua na bobula!

² Yavalata na vatu ni qaqi ka qaqia na falawa! Biuta tani na nomu i ubi ka luvata tani na nomu i sulu vinaka.

³ Era na raica na tamata na nomu vakamaduataki, Kei na nomu luvawale. Au sa na sauma lesu na nomu ca Ka sega ni dua me na tarovi au.”

⁴ Sa noda i vakabula na Kalou Yalosavasava ni Isireli Ka sa yacana ko Jiova ni lewevuqa.

⁵ A sa kaya ko Jiova vei Papiloni, “Mo dabe galugalu ena vanua butobuto, Era sa na sega tale ni kacivi iko mo ranadi ni veimatanitu!

⁶ Au a cudruvi ira na noqu tamata. Ka'u a cakava vei ira na i vakarau me vaka era sa sega ni noqu tamata: Au a soli ira yani ki na ligamu, Ia o sa sega ni lomani ira; Ka vakacakacakataki ira vakaukauwa na qase.

⁷ O a nanuma ni o na ranadi tikoga me tawa mudu Ka sega ni vakasamataka na veika oqo e lomamu Se vakananuma na kedra i cavacava kece.

⁸ Rogoca mada oqo o iko sa dau lomana na marau, Ka nanuma ni o sa galala ka taqomaki vinaka. O sa okata e lomamu mo cecere sara me vaka na Kalou Ka sega tale ni dua me vakataki iko. O nanuma ni o na sega ni yaco mo yada Se rarawataka na nodra mate na luvemu.

⁹ Ia, ena dua ga na gauna ena dua na siga, Ena yaco ruarua kina vei iko na ka oqo. Veitalia ga na cakamana lasu kece o na vakayagataka, Era na yali ga na luvemu ka yaco mo yada.

¹⁰ “O nanuma ni o sa taqomaki vinaka ena nomu i valavala ca. O nanuma ni sega ni dua e kunei iko rawa. Sa vakacalai iko na nomu vuku kei na kila-ka, Ka kaya vakai iko ni o sa kalou, Ka sa sega tale ni dua me vakataki iko!

¹¹ Ena yaco mai vei iko na veivakarusai Ka na sega ni dua na nomu cakacaka mana me na tarova. Sa na yaco vakidacala mai na rusa vei iko, Na rusa o a sega mada ni bau tadra.

¹² Maroroya kece tiko na nomu cakamana lasu kei na daurairai O a dau vakayagataka me tekivu mai na gauna ni nomu gone. De na rairai ena vukei iko ena so na ka, Ka na rairai vakarerei ira na kemu meca.

¹³ O na malumalumu ga ka veitalia sara na levu ni vakasala o rawata. Laivi ira na nomu daunivakasala me ra lako mai ka vakabulai iko, Oqo o ira era dikeva na veikalokalo, Ka yalana na veiyalayala ni lomalagi Ka ra dau tukuna tiko vei kemuni ena veivula Na veika kece ena yacovi kemuni.

¹⁴ “Era na vaka na tikitiki ni co madu, Ka ra na vakamai ena buka! Era sega mada ga ni vakabulai ira rawa Mai na yameyame ni buka. E sega ni qilaiso me caka kina na tatalai Se me da dabe voleka kina.

¹⁵ Ena vaka oqo na ka era cakava o ira era dau vakasalataki iko, O ira o a dau oca ni qaravi ira me tekivu sara ni o sa gone. Era na biuti iko tu ka dui lako yani ena nodra sala, Ka na sega ni vo e dua me vakabulai iko.”