Aisea 39 - Ai Vola Tabu Ena Vakavakadewa Vou

Na i Lawalawa era Talai mai Papiloni

¹ Ena gauna o ya, a sa rogoca kina na tui Papiloni o Merotaki Paletani, na luve i Paletani, ni a tauvi mate tu o Esekaia na tui. A mani vakauta mai vua e dua na i vola kei na dua na i loloma.

² A kidavaki ira na i talai o Esekaia ena yalovinaka ka vakaraitaka vei ira na nona i yau, na siliva, koula kei na veika boi vinaka, na waiwai boi vinaka kei na nona i yaya kece sara ni valu. A sega ni vo e dua na ka ena nona vale ni yau se ena nona vanua taucoko me sega ni vakaraitaka vei ira.

³ A sa qai lako o Aisea na parofita vei Esekaia na tui ka tarogi koya, “E ratou a lako mai vei na tamata oqo, ka cava e ratou sa mai tukuna vei kemuni?” A qai sauma o Esekaia ka kaya, “E ratou sa lako mai ena dua na vanua yawa sara, mai Papiloni.”

⁴ “Na cava e ratou sa raica ena valenitui.” “E ratou sa raica na ka kecega. E sega tale ni vo e dua na ka ena vale ni yau au sega ni vakaraitaka vei iratou.”

⁵ Sa qai kaya o Aisea vua na tui, “Sa tukuna ko Jiova ni lewevuqa,

⁶ ni na yaco mai na gauna ena kau kina ki Papiloni na veika kece e tu ena nomu i tikotiko vakatui, na veika kece era a maroroya tu mai na nomuni qase. Ena sega tale ni dua na ka ena vo.

⁷ Ena so sara talega na luvemu dina era na kau yani ka ra na la'ki buli me ra enuki ka veiqaravi ena valenitui nei tui Papiloni.”

⁸ Sa qai kaya o Esekaia vei Aisea, “E daumaka vei au na vosa i Jiova o tukuna mai oqori.” Ni sa nanuma o koya, “Ni na yaco na bula vakacegu kei na galala donuya na nona gauna.”