Aisea 38 - Ai Vola Tabu Ena Vakavakadewa Vou

Na Tauvi Mate i Esekaia na Tui

¹ Ena gauna vata o ya a tauvi mate kina na tui o Esekaia ka voleka sara ni mate. E a qai mani la'ki sikovi koya o Aisea na parofita na luve i Emosi ka kaya, vua, “Sa tukuna ko Jiova mo tuva vinaka kece sara tu na veika kece e tu ena nomu vale baleta ni o sa na sega ni bula tale mai na nomu tauvi mate oqori.”

² A qai vuki ki lalaga o Esekaia na tui ka masu vei Jiova:

³ Kemuni Jiova, ni qai nanuma na noqu a qaravi kemuni ena yaloqu taucoko ena yalodina, ka'u sa dau tovolea me'u cakava na veika kece sara o ni vinakata me'u cakava.” A mai tabalaka yani na tagi ena rarawa levu.

⁴ A sa qai vakaroti Aisea ko Jiova

⁵ me lako vei Esekaia ka kaya vua, “Oi au, ko Jiova, na Kalou i Tevita na nomu qase, au sa rogoca na nomu masu ka raica na wai ni matamu. Raica, au sa na solia tale e tinikalima na yabaki me vakuri kina na nomu bula.

⁶ Au na vakabulai iko kei na koro oqo o Jerusalemi mai vua na tui Asiria, ka'u na tomana tikoga na noqu taqomaka na koro oqo.”

⁷ A qai sauma o Aisea ka kaya, “Ena vakaraitaka vei iko na Kalou e dua na i vakatakilakila mo vakadinadinataka ni na vakayacora na ka sa yalataka.

⁸ Ena i kabakaba e a tara o Easi na tui, ena cakava ko Jiova me vakasuka lesu na i yaloyalo ni matanisiga sa kala sobu me rauta ni tini na i kalawa ki muri.” A sa suka lesu vakakina me tini na i kalawa ki muri na i yaloyalo ni matanisiga.

⁹ Ni sa bula tale o Esekaia mai na nona tauvi mate, a sa qai vola na sere ni veivakacaucautaki oqo:

¹⁰ Au nanuma ga ni'u sa na toki yani ni se tu donu tu na noqu bula, Me'u sa na la'ki tu voli ki Etesi ena vo ni noqu veiyabaki.

¹¹ Au kaya ni'u na sega tale ni raici Jiova, se dua tale na tamata ena vuravura oqo.

¹² Sa muduki koso na noqu bula ka sa mai cava, me vaka na uru sobu ni valelaca. Sa vaka na i sulu sa kotivi tani mai na kena i vivivi sulu, Ka'u a nanuma ni sa muduka na noqu bula na Kalou.

¹³ Au tagi yani ena vutugu ena loma ni bogi taucoko, Me vaka sa qurulaka na suiqu e dua na laione, Ka'u a nanuma ga ni sa tinia na noqu bula na Kalou.

¹⁴ Sa rogo lailai ka malumalumu na domoqu, Ka'u sa tagi me vaka na ruve. Sa oca mai na mataqu ena rai cake ki lomalagi. I Jiova, ni sereki au mai na leqa kece oqo.

¹⁵ Na cava me'u kaya rawa? Sa cakava ko Jiova na ka oqo. Sa rarawa na yaloqu, ka'u sega ni moce rawa.

¹⁶ Isa Turaga, au na bula ga ena vukumuni, Ena vukumuni duadua ga. Ni vakabulai au, ka vakatara me'u bula tiko.

¹⁷ Ena vuki na noqu rarawa ki na yalo vakacegu. O ni sa vakabulai au mai na leqa kecega; O ni sa bokoca na noqu i valavala ca taucoko sara.

¹⁸ E sega ni dua mai na nodra vanua na mate me rawa ni vakacaucautaki kemuni. Ni ra sa sega ni rawa ni vakadinata na mate na nomuni yalodina.

¹⁹ Ni sai ira ga na bula era vakacaucautaki kemuni, Me vaka na noqu vakacaucautaki kemuni yani oqo. Era sa tukuna na i tubutubu vei ira na luvedra na nomuni yalodina.

²⁰ I Jiova, o ni sa vakabulai au. Keimami na qiria na api ka seretaka na nomuni lagilagi. Keimami na seretaka ena nomuni vale tabu ena gauna kece ni neimami bula.

²¹ A sa tukuna o Aisea vua na tui me walia na nona bo ena drega ni lolo ka me na qai bula tale kina.

²² Ia sa qai kaya o Esekaia, “Na i vakatakilakila cava ena vakadinadinataka ni'u na rawa ni lako tale ki na Valenisoro?”