Aisea 35 - Ai Vola Tabu Ena Vakavakadewa Vou

Na Sala ni Yalosavasava

¹ Ena reki na vanua dravuisiga, Ka na se na senikau ena veivanua matemate.

² Ena sere ka kaila ena reki na vanua dravuisiga, Ka na yaco me rairai vinaka sara me vakataka Na ulunivanua o Lepanoni, Ka na bulabula me vaka na buca o Kameli kei Saroni, Ka raica na nona qaqa kei na kaukauwa.

³ Vakaukauwataka na liga sa damele Kei na duru sa sautaninini ka malumalumu.

⁴ Tukuna vei ira kece sa yalolailai, “Ni kaukauwa tiko, ka kakua ni rere! Sa na lako mai na Kalou me sereki kemuni, Ka sauma lesu tale na veika ca Vei ira na kemuni meca.”

⁵ Ena rai rawa tale na mataboko, Ka rogo tale na didivara.

⁶ Ena rika me meke na lokiloki, Ka kaila ena marau na galu; Ena drodro ena vanua dravuisiga na veiuciwai.

⁷ Sa na yaco me drano na vanua nuku katakata, Ka bini na veitobu wai ena vanua mamaca sara.

⁸ Ena tu e dua na gaunisala levu e kea, Ka na vakatokai na Sala ni Yalosavasava. Ena sega na tamata i valavala ca, E muri ena sala oqo, Ka na sega na lialia me vakasesei ira era lako kina.

⁹ Ena sega e kea na laione, Ka na sega na manumanu daukata me lako kina. Sa i ira ga sa sereka ko Jiova, Era na lesu ki na nodra vanua ena sala oqo.

¹⁰ Era na yaco ki Jerusalemi ena marau, Ka ra na sere ka kaila ena reki. Era na marau ka tawa mudu, Ka na takali yani vakadua na rarawa kei na oca.