Aisea 31 - Ai Vola Tabu Ena Vakavakadewa Vou

Na Kalou ena Taqomaki Jerusalemi

¹ Ena yaco na veika ca vei ira era la'ki kere veivuke ki Ijipita. Era sa vakararavi ki na veiqiqinivalu kei na ose, Kei ira na sotia. Ia era sa sega ni vakararavi Vei Jiova na Kalou Yalosavasava ni Isireli, Se kere veivuke vua.

² Sa kila na ka e cakava o koya, Ka sa kauta mai na ka ni veivakaleqai. Sa sega ni dau vakasuka na nona vosa, Ka sa na dau totogitaki ira era i valavala ca, Kei ira era dau vukei ira na i valavala ca.

³ Era sa tamata ga na kai Ijipita ka sega ni Kalou; Era sa vakalewe ga na nodra ose, ka sega ni yalo. Ni sa dodoka na ligana ko Jiova, Ena malumalumu o koya sa ia na veivuke, Ka na bale o koya sa vukei, Ka rau na rusa ruarua ga.

⁴ Sa kaya vei au ko Jiova, “Ke mani levu sara vakaevei na nodra kaila na i vakatawanisipi, Era sa sega ni vakasava tani rawa na laione Mai na kena manumanu e se qai vakamatea. Sa vakakina oqo ni sa sega na ka me tarovi au Mai na noqu via taqomaka na Ulunivanua o Saioni.

⁵ Me vaka na nona ovici ira na luvena na manumanu vuka, Ena vaka o ya na noqu taqomaki Jerusalemi.

⁶ Kemuni na Isireli, ni lesu mai vei koya o ni sa talaidredre vua.

⁷ Ena siga o ya era sa na dui biuta tani kina na tamata yadua na nona matakau siliva kei na matakau koula sa cakava na ligamuni mo ni vakadukadukalitaki kemuni kina. Ena vakarusai o Asiria.

⁸ Ena vakarusai o Asiria ena i valu, Ka sega ena qaqa ni tamata. Era na dro yani na kai Asiria mai na i valu, Ka ra vakabobulataki na nodra cauravou.

⁹ Ena dro na nodra tui ena rere, Era na taqaya vakalevu na vakailesilesi Ka ra biuta tu mai na nodra drotini ka dro yani.” Ni sai Jiova ga sa kaya vakaoqo, O koya ka sa qaravi mai Jerusalemi, Ka sa caudre na nona bukawaqa Ena vuku ni i soro kama.