Aisea 26 - Ai Vola Tabu Ena Vakavakadewa Vou

Na Nodra Sere ni Qaqa na Juta

¹ Ena siga o ya, ena lagati kina na sere oqo ena vanua o Juta: Sa dua na noda koro kaukauwa! Sa taqomaka na kena bai na Kalou.

² Dolava na matamata ni koro, Ka laiva me ra curu na matanitu yalodina, Na matanitu era sa kitaka na ka dina na kena i taukei,

³ Turaga, ni solia na vakacegu dina, Vei ira sa vakadeitaka na nodra i naki, Ka vakadinati kemuni.

⁴ Ni vakadinati Jiova ena gauna kecega, Ni sa na taqomaki kemuni tiko.

⁵ Sa biuti ira ki ra na dokadoka, Vakarusa na koro kaukauwa era tiko kina, Ka talaraka sobu na kena bai ki na qele.

⁶ Era sa lako e delana na tamata era a vakalolomataki, ka butuka sobu ena yavadra.

⁷ A nodra sala na yalododonu sa dodonu sara; Oi kemuni na Yalododonu sara, O ni sa vakalogalogavinakataka na nodra sala na tamata vinaka.

⁸ Keimami muria na lomamuni ka vakanuinui vei kemuni, Sa i kemuni na veika kece keimami gadreva.

⁹ Ena bogi au sa gadrevi kemuni ena yaloqu taucoko; Ni o ni sa veilewaitaki vuravura kei ira na lewena; Era na vulica kece sara na ka sa dodonu.

¹⁰ Dina ni o ni sa vinaka vei ira na tamata ca, Era sa sega ni vulica rawa na ka dodonu. E ke sara mada ga na nodra vanua na tamata dodonu, Era sa vakayacora tikoga kina na veika ca, Ka ra sega ni via kila na kemuni meca ni o ni totogitaki ira.

¹¹ I Jiova ni vakamaduataki ira ka laiva Me ra sotava na ka rarawa, Me ra colata na i totogi o ni sa vakarautaka. Ni vakaraitaka vei ira na levu ni nomuni lomani ira na nomuni tamata.

¹² I Jiova, o ni sa solia vei keimami na tiko vinaka; Na veika kece keimami rawata, Sa vua ga ni nomuni cakacaka.

¹³ I Jiova na neimami Kalou, Keimami sa lewai tu mai vei ira na tani, Ia sai kemuni ga na neimami Turaga.

¹⁴ Ia oqo era sa mate, ka ra na sega ni bula tale, Ka sega ni tucake tale na yalodra, Baleta ni o ni sa totogitaki ira ka vakarusai ira. Sa sega tale ni dua me na nanumi ira tale.

¹⁵ I Jiova o ni sa vakatubura na neimami matanitu, Ka tosoya na kena i yalayala ena veiyasana kece, Na ka oqo sa vakavuna na nomuni lagilagi.

¹⁶ I Jiova o ni sa totogitaki ira na nomuni tamata, Ka ra sa masu vei kemuni ena rarawa.

¹⁷ I Jiova o ni sa vakavuna me keimami tagi yani, Me vaka e dua na yalewa taratara sa tagi ena mosi.

¹⁸ Keimami a rarawa ka taratara, Ia keimami a sega ga ni vakasucuma e dua na ka. Keimami sa sega ni bau rawata E dua na qaqa ena vuku ni neimami vanua, Ka keimami sega ni bau vakaotia e dua na ka.

¹⁹ O ira vei keimami era sa mate era na bula tale! Ena bula tale na yagodra! Era na yadra cake ka sere ena marau, O ira kece era sa moce tu ena kedra i bulubulu. Me vaka na kena vakabulabulataka na vuravura na tegu, Sa na vakabulai ira Vaka talega kina na sa mate Ena gauna makawa sara na Turaga.

Na Cudru ni Kalou kei na Vakalesui ni Bula

²⁰ Kemuni na noqu tamata ni curu ki na nomuni veivale, Ka sogota mai na katuba ki dakumuni. Ni vunitaki kemuni mada vakalailai, Me yacova ni sa oti na cudru ni Turaga.

²¹ Ni sa lako sobu mai ko Jiova, Me totogitaki ira na tamata e vuravura, Ena vuku ni nodra i valavala ca. Ena vakatakilai na laba eso e a caka vuni, Ia na qele ena sega ni vunitaki ira, Era sa vakamatei ena gauna makawa sara.