Aisea 22 - Ai Vola Tabu Ena Vakavakadewa Vou

Ai Tukutuku me Baleti Jerusalemi

¹ Oqo e dua na i tukutuku baleta na Buca ni Raivotu. Tukuna mada mai na cava sa yaco? A cava era sa lako cake kece kina na tamata, Ki na veidelavuvu ni vale?

² Sa yavala na loma ni koro taucoko, Ka levu na maue kei na marau. O ira na nomu tamata era sa mate, Ia era sa sega ga ni mate ena i valu.

³ O ira kece na nomu turaga era sa dro vata yani Ia era sa vesu ni ra bera ni vanataka e dua na gasau. O ira kece era kune era sa vesu, Dina ga ni ra dro sara vakayawa.

⁴ Ia au sa qai kaya: Ni laivi au mada me'u tu taudua, Ka me'u tagi vakalevu sara. Ni kakua ni via vakacegui au, Ni sa rui levu na noqu tamata era sa mate.

⁵ Sa i koya oqo na siga ni rarawa, Na druka kei na veilecayaki ena Buca ni Raivotu, Ka sa tala mai na ka oqo vei keda ko Jiova ni lewevuqa. Sa vorolaki sobu na nodra bai ni koro, Ka voqa na tagi ni kere veivuke ena veimama ni veidelana.

⁶ Era vodo ose kei na kareti mai na sotia ni Ilama, Ka vakaiyaragi ena dakaititi kei na kena gasau. Ia sa vakarau tu na nodra i sasabai na sotia mai Kiri.

⁷ Sa robota na veibuca bulabula e Juta na kareti Ka ra sa la'ki tu na sotia vodo ose ena matamata kei Jerusalemi.

⁸ Sa kakavorovoro na bai kecega kei Jerusalemi. Ena siga o ya o ni na la'ki vaqara na i yaragi Ena vale mai na veikau.

⁹ O ni sa raica na levu ni vanua sa ca ena koro I Tevita, o ni sa qai vakavinakataka ka tawana kina na wai mai na tobu e ra.

¹⁰ O ni sa qai wilika na veivale e Jerusalemi, o ni sa qai Basuka sobu, eso me vakavinakataki.

¹¹ O ni sa qai cakava e dua na tobu ni maroroi wai. Ia o ni sa sega ni gole vua na Kalou O koya sa nakita makawa sara na ka kece oqo, Ka vakavuna talega me yaco.

¹² Ena siga o ya sa na kacivi kemuni ko Jiova, Mo ni tagi ka vakaloloku, Mo ni toroya na ulumuni ka vakaisulu ena taga.

¹³ Ia o ni sa qai marau ka reki, Ka vakamatea na bulumakau kei na sipi, Ni kana lewe ni manumanu ka gunu waini, ni o ni sa kaya, “Me da kana ka gunu, Baleta ni mataka eda sa na mate.”

¹⁴ Sa vosa vei au ko Jiova ni lewevuqa ka kaya, “Au sa kaya vakaoqo, Ena sega sara ni vosoti na i valavala ca oqo Me yacova ni o ni sa mate.”

Ai Vakasala vei Sebina

¹⁵ A sa kaya vei au ko Jiova ni lewevuqa me'u lako vei Sebina na turaga sa lewa tiko na veika e baleta na valenitui ka kaya vua,

¹⁶ O cei o iko? Na dodonu cava e tu vei iko mo taya kina e dua na kemu i bulubulu ena yasa ni delana veivatu?

¹⁷ O sa rairai dokai beka, ia ena tauri iko cake ko Jiova ka viritaki iko tani.

¹⁸ O na muloci mo yaco mo vaka na polo, ka na qai kolotaki iko ki na dua na vanua levu cake. O na la'ki mate e kea ena ruku ni kareti o a dokadokataka tiko. O iko o sa vu ni veivakamaduataki ena nona vale na nomu turaga.

¹⁹ Ena vakasivoi iko na Turaga ka na kauti iko tani mai na nomu i tutu dokai.”

²⁰ A sa kaya na Turaga vei Sebina, “Ni sa na yaco na ka o ya, au sa na qai talatala yani vei Eliakimi na noqu tamata, na luve i Ilikaia.

²¹ Au na vakatokara vua na nomu i ubi balavu kei na beleti ka solia vua na kaukauwa taucoko ni nomu i tutu. Ena yaco o koya me vaka e dua na tama vei ira na lewe i Jerusalemi kei Juta.

²² Au na biuta ki tabana na ki ni vale i Tevita. Ena dolava ka na sega ni dua me sogota, ena sogota, ka na sega ni dua me na dolava.

²³ Au na vakataudeitaki koya me vaka e dua na i vako ena tikina sa tudei sara, ka na i vurevure ni lagilagi ki na nona vuvale taucoko.

²⁴ A sa kaya ko Jiova, “Era sa vakararavi kece vua na vuvale i tamana. Era na rube kece vua me vaka na kuro, na bilo, era rube ena dua na i vako.

²⁵ Ia ena siga sa na yaco kina na ka o ya, ena qai luluqa mai na i vako dei o ya ka lutu. Sa i koya sara talega o ya na i cavacava ni veika kece era rube tiko kina.