Aisea 18 - Ai Vola Tabu Ena Vakavakadewa Vou

Na Kalou ena Totogitaki Eciopea

¹ Isa, na vanua sa rogo kina domo ni vakatetaba, Ena vanua e sivia yani na veiuciwai kei Eciopea,

² Era sa vakauti na veimataki ena Naile, Ena waqa kuta ena dela ni wai! Ni lako yani, na dauvakauitukutuku totolo, ki na matanitu sa balabalavu ka yago lumisa, Ki na kawa tamata sa rerevaki raraba, Na matanitu sa kaukauwa ka qaqa, Ka sa tawasea na kena vanua na veiuciwai.

³ Ni rogoca mada na tamata kece o ni tiko e vuravura! Ni raica ni sa vakarewataka cake na drotini me i vakatakilakila ena dela ni veiulunivanua! Ni vakarorogo ni o ni sa rogoca na tagi ni davui!

⁴ Ni sa kaya vei au ko Jiova, “Au na rai sobu mai vakamalua ena noqu i tikotiko, me vaka na matata ni cila ni matanisiga ena siga katakata, me vaka na kabukabu ena vula i katakata.

⁵ Ni se bera ni veti na qerepi, Ni se qai mira na sena ka tekivu dreu, Era sa na vakarusai Eciopea na meca, Me vaka na rawarawa ni musu ni taba ni vaini ena i sele.

⁶ Ena qai biu tu na yagodra me kedra, Na manumanu vuka ena veidelana, Kei na manumanu kila ena dela i vuravura. Era na mai kania na yagodra na manumanu vuka Ena vula i katakata, Kei na manumanu kila ena vula i batabata.”

⁷ Ena gauna o ya ena kau mai vei Jiova ni lewevuqa Na i loloma mai na matanitu kaukauwa ka qaqa, Na nodra vanua na tamata babalavu ka yago dravia ena ulu ni Naile. Era sa tamata rerevaki e vuravura taucoko. Era na lako mai ki na ulunivanua o Saioni, Na vanua sa dau qaravi kina ko Jiova ni lewevuqa.