Aisea 14 - Ai Vola Tabu Ena Vakavakadewa Vou

Na Lesu mai na Tiko Vakabobula

¹ Ena qai lomani ira tale na nona tamata ko Jiova ka digitaki ira me ra nona. Sa na vakalesui ira mai ki na nodra vanua o koya; era na qai lako mai vei ira na kai veimatanitu tani ka mai tiko kei ira.

² Ena levu na matanitu era na vukei ira na Isireli me ra lesu mai ki na vanua e a solia vei ira ko Jiova. Era na qai mai qaravi ira na Isireli ena nodra vanua na kai veimatanitu tani. O ira era a vakabobulataki ira mada na Isireli ena dua na gauna era na qai vakabobulataki mai vei ira na Isireli, ka ra na qai lewai ira na tamata era a vakararawataki ira o ira na Isireli.

O Tui Papiloni ena Nodra Vuravura na Mate

³ Ena vakacegui ira na Isireli mai na nodra mosi kei na rarawa ko Jiova, ka vakakina mai na cakacaka kaukauwa era a vakabobulataki kina me ra cakava.

⁴ Mo ni qai taurivaka na vosavosa oqo vua na tui Papiloni ka kaya: “Sa qai oti vakadua vua na tui, O koya na dauveivakararawataki! Sa mudu vakadua sara Na nona dau veivakalolomataki!

⁵ Sa qai muduka ko Jiova Na nodra kaukauwa na dauveiliutaki ca.

⁶ O koya sa dauvakararawataki ira na tamata ena cudru, Ka sa sega ni mudu ni vakararawataki ira, Na veimatanitu sa dau vakadrukai.

⁷ Ia oqo, sa qai marau tu na vuravura, Ena vakacegu kei na sautu; Ka ra laga sere na tamata kecega ena marau.

⁸ Era sa marau na kau paini kei na sitari ni Lepanoni, Ni sa takali yani o koya, Ka sa sega e dua me vakabalei ira sobu.

⁹ Sa vakarau tu na nodra vanua na mate, Me tavaka na tui Papiloni. Sa vakayadrati ira na i liuliu e vuravura Era sa mate sara e liu me ra tavaki iko Sa vakaduri ira mai na nodra i dabedabe vakatui, Na tui kecega mai na veiyasa i vuravura.

¹⁰ Era na vosa kece ka kaya mai vei iko ‘O sa yaco talega mo malumalumu vakataki keimami! O sa yaco mo vakataki keimami!

¹¹ O a dau vakalagilagi ena domo ni api Ia oqo o sa tu ena nodra vanua na mate. Era sa nomu i davodavo na yavato O sa qai tutuvi ena ulo.’ ”

¹² O sa lutu mai vakacava mai lomalagi Na Kalokalo i Volasiga? O iko na dauvakadrukai ira na veimatanitu, O sa lauta sobu vakacava ki na qele?

¹³ O a kaya e lomamu. “Au na kaba cake ki lomalagi, Me'u cecere cake vei ira na kalokalo ni Kalou. Au na la'ki biuta na noqu i dabedabe ena vanua cecere Ka'u na la'ki dabe ena ulunivanua Era dausoqo kina na kalou mai na vualiku.

¹⁴ Au na cabe cake me sivia na kedra cecere na o, Ka'u na cakava me'u vakataki koya sa cecere sara.”

¹⁵ Ia o sa qai kau sobu mai ki na nodra vanua na mate, Ki na boto ni bulubulu.

¹⁶ O ira era raici iko era na wanonovi iko, ka vakananumi iko. Era na kaya, “Sa i koya li oqo na tamata e a vakarusa na veikoro

¹⁷ Ka vukica na vuravura me vanua dravuisiga, Ka sega ni sereki ira na kaivesu me ra dui lako?”

¹⁸ O ira kece na tui ni veimatanitu Era sa dui davo sobu ena kedra i bulubulu ena lagilagi.

¹⁹ Ia sa sega ga na nomu i bulubulu Ka sa viritaki laivi na yagomu sa mate me vuca. Sa ubia na yagodra mate na matasotia Ka viritaki vata kei ira ki na dua na qara vatu, Me vaka na yago ni mate sa butuki sobu.

²⁰ O na sega ni bulu me vakai ira na tui, baleta ni o sa vakarusa na nomu vanua ka vakamatei ira na nomu tamata. Ena sega tale ni dua na nomu kawa i valavala ca ena bula.

²¹ Vakarautaka na nodra vakamatei na luvena tagane ena vuku ni nodra ca na nodra qase. Ena sega na nona kawa me veiliutaki ena vuravura se tara kina na veikoro lelevu.”

Na Kalou ena Vakarusai Papiloni

²² A sa kaya ko Jiova ni lewevuqa, “Au na valuti Papiloni ka vakarusa. Au na sega tale ni vakavoca e dua na ka, ena sega tale ni vo e dua na gone se dua na ka.

²³ Au na vukici Papiloni me vanua lolobo ka me nodra vanua na lulu. Au na taviraki Papiloni ena dua na sasa ni veivakaleqai me na taviraki kina na veika kecega.”

Na Kalou ena Vakarusai Ira na Asiria

²⁴ A sa vosa bubului ko Jiova ka kaya, “Ena yaco na veika au sa nanuma, Ka na vakayacori na veika au sa nakita.

²⁵ Au na vakarusai Asiria ena noqu vanua, Ka butuki ira sobu ena noqu ulunivanua. Au na vagalalataki ira noqu tamata mai na nodra i tavi Vei ira na kai Asiria Kei na i colacola me ra colata.

²⁶ Sa i koya oqo na noqu i tuvatuva me baleti vuravura, Ka sa dodo yani na ligaqu me totogitaki ira na veimatanitu.”

²⁷ Sa nakita ko Jiova me cakava na ka oqo; A sa dodoka yani na ligana me veitotogitaki, Ka na sega ni dua me na tarovi koya rawa.

Na Kalou ena Vakarusai Ira na Filisitia

²⁸ Ena yabaki a mate kina o Easi na tui A vakaraitaki mai kina na i tukutuku oqo mai vua na Kalou.

²⁹ Ni kakua ni marau na kai Filisitia, Ni sa kamusu na kuita o ni kuita kina. Ni na mate e dua na gata, Ena lako tale mai e dua e ca cake sara, Ka na luvena e dua na drakoni.

³⁰ Ia era na vakania na nodra manumanu Na tamata dravudravua ena noqu veico, Ka ra na davo na vakaloloma ena vakacegu. Ia au na vakarusai ira na kai Filisitia ena dausiga, Ka sega ni vakabula e dua vei kemuni.

³¹ Ena rogo na qolou ena matamata ni koro, Kei na tagi ni veivukei ena loma ni koro. Ni sa lako mai na meca vakaitamera mai na vualiku.

³² Na cava me na tukuni vei ira na mata mai Filisitia? Me da mai tukuna vei ira Ni sa tauyavutaki Saioni ko Jiova, Ka ra na taqomaki kina na nona tamata Era sa vakararawataki.