Aisea 1 - Ai Vola Tabu Ena Vakavakadewa Vou

¹ Na i vola oqo sa koto kina na i tukutuku baleti Juta kei Jerusalemi e a vakaraitaka na Kalou vei Aisea na luve i Emosi ena gauna e ratou a tui kina e Juta o Usaia, o Jocame, o Easi kei Esekaia.

Era sa Ca Vakalevu na Juta

² Ni rogoca na vuravura kei lomalagi; ni sa vosa vakaoqo ko Jiova: Au a susugi ira na gone ka tuberi ira, ia era sa qai saqati au.

³ Na bulumakau sa kila na kena i taukei, ka sa kila na asa na bai ni nona turaga. Ia o ira na Isireli sa sega ni kila, ka ra sega ni tugana rawa e lomadra na noqu tamata.

⁴ O sa matanitu i valavala ca, ka matatamata sa bikai ena i valavala ca. O ni sa luve ni daucaka ca, na gone daumuria na sala duka, o ira sa biuti Jiova, o ira sa beca na Le dua Yalosavasava ni Isireli, o ira sa vakanadakui koya.

⁵ A cava na vuna o ni via laumoku tale kina? A cava o ni vakadrecike tikoga kina? Sa robota kece na ulumu na mavoa, ka sa tauvi mate na yalomu kei na nomu vakasama.

⁶ Mai na qeteqete ni yavamu me yaco sara ki ulumu, sa sega ni dua na tikimu me vinaka; Sa robo ena drakusi, ena bo kei na mavoa bula; Ka sa sega ni bau sava se vadretitaki. Sa sega talega ni biu kina na wainimate.

⁷ Sa lala na nomuni vanua, ka kama yavu na nomuni veikoro. Era sa taura na nomuni vanua na kemuni meca, ka sa yaco oqo ena matamuni; ka sa lala, me vaka sa vakarusai vei ira na vulagi.

⁸ Sa qai vo taudua ga na goneyalewa o Jerusalemi, me vaka na vale vakacevaceva ena loga ni vaini; Me vaka na vakatunuloa ena loga ni kiukaba, me vaka na koro sa vesuki.

⁹ Kevaka e a sega ni vakavoca ko Jiova e vica vei keda me bula, ke da a vakataki Sotoma se vakataki Komora.

¹⁰ Ni rogoca na vosa i Jiova, oi kemudou na i liuliu mai Sotoma! Dou vakarorogo ki na i vakavuvuli ni Kalou, oi kemudou na kai Komora!

¹¹ Sa kaya ko Jiova, “A cava na kena yaga vei au na nomuni i soro e vuqa;” Sa rauti au vinaka na veisoro kama, na sipi kei na uro ni nomuni manumanu maroroi; Ka'u sa sega ni taleitaka na dra ni bulumakau, kei na sipi, se na me tagane.

¹² O cei sa kerea vei kemuni mo ni kauta mai vei au na veika oqo ena nomuni lako mai mo ni mai qaravi au? O cei sa tukuna vei kemuni mo ni mai butubutu wavoki na noqu lomanibai?

¹³ Sa sega ni yaga mo ni kauta mai na nomuni i soro, ni ka'u sa vakasisilataka na nomuni madrali boi vinaka. Au sa sega ni vosota rawa na nomuni solevu ni vulavou, na nomuni Siga ni Vakacecegu kei na nomuni veisoqoni vakalotu. Era sa vakacacani kece ena nomuni i valavala ca.

¹⁴ Au sa cata na nomuni solevu ni vulavou kei na nomuni veisolevu tabu. Era sai colacola ga vei au ka'u sa oca na colata.

¹⁵ Ni o ni laveta cake na ligamuni ena masu, au na sega ni rai yani vei kemuni. E veitalia sara na levu ni nomuni masu, au na sega ga ni via rogoca, baleta ni sa duka tu na ligamuni ena dra.

¹⁶ Ni vui kemuni mo ni savasava; Ni tarova na veika ca o ni cakava tiko, na kena ka'u raica ni o ni se cakava tikoga. Io, ni muduka sara na nomuni i tovo ca,

¹⁷ ka vulica mo ni daucaka vinaka; Ni vakasaqara na cakacaka vakadodonu, ka vukei ira era tabaki sobu; Solia vei ira na luveniyali na nodra dodonu, ka taqomaki ira na yada.

¹⁸ A sa kaya ko Jiova, “Ni lako mai me da mai walia vata oqo. E dina ga ni sa takavi kemuni na damu ni valavala ca, au na savai kemuni mo ni savasava me vaka na uca vulavula. Kevaka sa damudamu sara, o ni na qai vaka ga na vuti ni sipi vulavula.

¹⁹ Kevaka ga o ni sa lomasoli ka talairawarawa, o ni na kania na vuata vinaka ni vanua.

²⁰ Ia kevaka o ni bese ka veisaqasaqa, o ni na mate ena i seleiwau; ni sa kaya vakaoqo ko Jiova.

Na Koro i Valavala Ca

²¹ Sa yaco vakacava me dautagane na koro yalodina? Ena dua na gauna era a tiko kina na yalododonu, ia oqo, era sa tiko ga kina na daulaba.

²² Na nomuni siliva sa yaco me tikitiki ni kaukamea tawayaga, Kei na memuni waini sa vakawaicalataki ena wai.

²³ O ira na nomuni turaga era sa dautalaidredre, ka ra nodra i tokani na daubutako. Era sa dau taleitaka me soli vei ira na i loloma, ka taura na ka era saumi kina me ra cakava na ka ca. Era sa sega ni taqomaki ira na luve ni yali, ka sega ni via rogoca na ka e baleti ira na yada.

²⁴ O koya oqo sa kaya kina ko Jiova ni lewevuqa, na Kalou qaqa ni Isireli: “Au na sauma na noqu cudru vei ira na kequ meca, ka cudruvi ira era sa cati au.

²⁵ Ia au na dodoka yani na ligaqu vei kemuni, me'u vuya laivi na nomuni dukadukali, ka savata tani kece na nomuni valavala ca.

²⁶ Au na qai solia tale vei kemuni eso na i liuliu, kei na so na daunivakasala me vaka e liu. Sa na qai vakatokai tale o Jerusalemi me koro savasava ka yalodina.”

²⁷ Ena vakabulai o Saioni ena lewa dodonu, kei ira era veivutuni kina ena i tovo savasava.

²⁸ Era na vakarusai na dautalaidredre kei ira era saqati koya, ka vaqeavutaki o ira era sa vakanadakui Jiova.

²⁹ O ni na qai maduataka na vuni oki o ni sa dau qarava, kei na veiteitei tabu o ni sa teivaka.

³⁰ O ni na qai vaka na vuni oki sa malai, kei na i teitei sa sega ni vakasuasuataki.

³¹ Ia me vaka na kena kama na kau mamaca ena dua na lidi ni buka, ena rusa vakakina na tamata kaukauwa ena nona i valavala ca, ka na sega ni dua me na tarova rawa na veivakarusai.