2 Veigauna 9 - Ai Vola Tabu Ena Vakavakadewa Vou

Na Veisiko i Ranadi ni Sipa

¹ A sa rogoca na ranadi ni Sipa na i rogorogo kei Solomoni, ka sa lako mai ki Jerusalemi me mai vakatovolei koya ena nona veitaro dredre eso. A sa lako vata mai e vuqa na nona tamata kei na ira na kameli era usana mai na ka boi vinaka, na vatu talei, kei na koula levu. Ia ni sa yaco yani vei Solomoni, a sa qai vakataroga vua na veitaro kece sara e vakasamataka rawa.

² A sauma vua na ranadi ni Sipa o Solomoni na nona taro kece sara; a sa sega ni dua na ka e dredre vua me sega ni vakamacalataka vua o koya.

³ A sa rogoca na ranadi ni Sipa na vuku titobu i Solomoni ka sarava na valenitui sa tara.

⁴ A sa raica na kakana e vakarautaki ena nona teveli, na nodra i tikotiko na nona vakailesilesi, na nodra veitosoyaki na nona tamata era veiqaravi, na nodra i sulusulu, na nona dau tauri bilo, kei na i soro kama ka dau vakacabora ena Valenisoro. A sa vakadrukai kina vakaca ka qoroqoro.

⁵ A sa kaya o koya vua na tui, “Sa dina sara na i rogorogo ka'u a dau rogoca tu mai na noqu vanua, ena vuku ni veika me baleti kemuni kei na nomuni vuku!

⁶ Au a sega ni vakadinata na veitukutuku era tukuna vei au me yacova na noqu lako mai oqo ka mai raica sara e mataqu. E se bera mada ga ni yacova na veimama ni nomuni vuku na veika au sa rogoca rawa. O ni sa uasivi cake sara mai na veitukutuku ka'u a rogoca.

⁷ Era sa kalougata dina na nomuni tamata! Era sa kalougata dina na nomuni dauveiqaravi, o ira sa dau tu e matamuni ena veisiga ka rogoca na nomuni vuku!

⁸ Me vakarokorokotaki ko Jiova na nomuni Kalou! O koya sa vakatakila na nona taleitaki kemuni ni sa vakatikori kemuni ena nona i tikotiko vakaturaga mo ni tui ena vuku ni yacana. Me vaka ni sa lomani Isireli na nomuni Kalou ka sa vakataudeitaki ira me tawa mudu, sa lesi kemuni kina o koya mo ni nodra tui ka me rawa ni vakayacori kina na lewa dodonu kei na i valavala dodonu.”

⁹ A sa qai solia na ranadi ni Sipa vei Solomoni na tui na nona i loloma e kauta voli mai: e sivia na 4,000 na kilokaramu na koula ka levu sara na ka boi vinaka kei na vatu talei eso. E sega tale ni qai dua na ka boi vinaka me uasivi cake mai na kena ka solia na ranadi ni Sipa vei Solomoni na tui.

¹⁰ (O ira na tamata i Irami kei ira na tamata i Solomoni ka ra kauta mai na koula mai Ofira, era a kauta talega mai na kau junipa kei na vatu talei.

¹¹ A vakayagataka o Solomoni na kau oqori me tara kina na i kabakaba ni Valenisoro ka caka talega kina na api kei na soliteri vei ira na daunisere. A sega vakadua ni se bau raici e dua ka vaka o ya ena vanua o Juta.)

¹² A sa solia vua na ranadi ni Sipa o Solomoni na tui na ka kecega sa taroga ka gadreva; ka sa levu cake sara na veika oqo mai na i loloma e kauta mai vua na ranadi. Sa qai lesu tale kei ira era qaravi koya ki na nona vanua o Sipa.

Nona i Yau na Tui o Solomoni

¹³ Ena veiyabaki, sa dau kumuna o Solomoni na tui e rauta ni 23,000 na kilokaramu na koula,

¹⁴ ka vakuri oqo mai na i vakacavacava era sauma vua o ira na dauvolivolitaki kei ira na dauveivoli. Era a kauta talega mai na siliva kei na koula vei Solomoni o ira kece na tui ena vanua vaka-Arapea kei ira na kovana ni veitikina e Isireli.

¹⁵ A sa cakava o Solomoni na tui e 200 na i sasabai lelevu ena koula sa lautuki, ka vakarautaki ni rauta e 7 na kilokaramu na bibi ni koula lautuki e vakayagataki ena dua na i sasabai.

¹⁶ A cakava talega e 300 na i sasabai lalai ena koula lautuki, ka vakarautaki ni rauta e 3 na kilokaramu na bibi ni koula lautuki e vakayagataki ena dua na i sasabai; ka sa la'ki maroroi ira ena Vale ni Veikau ni Lepanoni.

¹⁷ A sa cakava talega na tui e dua na i dabedabe vakaturaga cecere. E dua na tikina sa ukucavutaki ena ivori, ka boroi na yasana kadua ena koula dina.

¹⁸ E ono taucoko na levu ni kabakaba me lako cake ki na i dabedabe vakaturaga, ka sa toka ravita na i tutu ni yava sa boro ena koula. E toka ruarua na i taqataqa ni liga ena i dabedabe vakatui, ka rau duri e yasadrau na i vakatakarakara ni laione e rua.

¹⁹ A tu kina e tinikarua na laione, a ono ena yasa ni tagede ka dua, ka ono ena yasa ni tagede ka dua. A sega tale ni bau dua na ka vaka o ya a bau caka ena dua na matanitu.

²⁰ A sa koula kecega na bilo i Solomoni na tui, kei na i yaya kece e loma ni Vale ni Veikau ni Lepanoni sa buli ena koula dina. E a se bera ni okati me i yau vakamareqeti na siliva ena dela ni gauna i Solomoni.

²¹ Era a dau soko ki Tasisi na nona waqa na tui kei ira na tamata mai Irami; era a dau vakaiusana mai na waqa eso mai Tasisi ena veiyabaki tolu ka ra kauta mai na koula, na siliva, na ivori, na maqe eso, kei na pikoki.

Na Vuku i Solomoni

²² A sa uasivi cake o Solomoni na tui mai vei ira kecega na tui e vuravura, ena levu ni nona i yau kei na vuku.

²³ Era a gadreva me ra raici Solomoni o ira kecega na tui e vuravura, me ra rogoca na nona vuku ka a solia ki na yalona na Kalou.

²⁴ Era a kauta yadudua yani vua na tui na nodra ka ni loloma, eso na i yaya siliva, ka so na i yaya koula, eso na i sulu, na ka boi vinaka, eso na ose kei na meuli, ka vaka tiko oqo ena veiyabaki.

²⁵ A sa nei Solomoni na tui e 4,000 na i tutu ni ose kei na qiqi ni valu, ka ra lewe 12,000 na lewe ni nona mataivalu vodo ose, ka ra a lesi me ra tiko ena veikoro ni qiqinivalu, se me ra vakaitikotiko ga e Jerusalemi kei koya na tui.

²⁶ A lewai ira na tui kecega o koya me vakatekivu mai na Uciwai na Uferetisi ki na nodra vanua na kai Filisitia, ka vakakina ki na i yalayala kei Ijipita.

²⁷ A ka levu sara na siliva era a kauta mai ki Jerusalemi na tui, a la'ki vakawaleni kina na i yau oqo me vaka ga na vatu ni koro o ya, ka vuqa sara na vunisitari me vaka na levu ni vunilolo ka ra tu ena buca mai Sepela.

²⁸ A dau kau tiko mai eso na ose mai Ijipita vei Solomoni, kei na veivanua e vuqa.

Tukutuku Lekaleka ni Bula i Solomoni

²⁹ Ia oqo na vo ni cakacaka i Solomoni, mai na kena i tekivu ki na kena i otioti, ka sega li ni volai ena i vola tukutuku ni gauna i Necani na parofita, kei na parofisai i Eaija na kai Sailo, kei na raivotu i Ito na daurairai, me baleti Jeropoama na luve i Nipati?

³⁰ A lewai ira kecega na Isireli mai Jerusalemi o Solomoni me vasagavulu na yabaki.

³¹ A mate o Solomoni ka moce kei ira na nona qase, a bulu ena koro i Tevita na tamana; ka lewa o Reopoama na luvena me kena i sosomi.