2 Veigauna 6 - Ai Vola Tabu Ena Vakavakadewa Vou

Vosa o Solomoni vei Ira na Isireli

¹ A qai kaya o Solomoni, Sa kaya ko Jiova ni sa dautiko ena butobuto loaloa ka vavaku.

² Ia au sa tara oqo e dua na vale lagilagi me nomuni i tikotiko ka tawa mudu.

³ A vakanamata na tui vei ira na i soqosoqo na Isireli ka vosa vakalougatataki ira kece; era a duri taucoko tu na i soqosoqo ni Isireli.

⁴ A sa kaya o koya, “Me vakarokorokotaki ko Jiova na Kalou ni Isireli, o koya a vakayacora e ligana na ka e yalataka e gusuna vei, Tevita na tamaqu, ka kaya,

⁵ ‘Me vakatekivu mai na siga ka'u a kauti ira tani kina na Isireli mai na vanua o Ijipita, au a sega ni digitaka e dua na koro ena nodra veimataqali kece na Isireli me tara kina e dua na vale me tiko kina na yacaqu; ka sega talega ni digitaka e dua na tamata me turaga vei ira na noqu tamata na Isireli;

⁶ ia ka'u sa digitaki Jerusalemi me tu kina na yacaqu, ka digitaki Tevita me turaga vei ira na noqu tamata na Isireli.’

⁷ Ia oqo, a tu e loma i Tevita na tamaqu me tara e dua na vale ki na yaca i Jiova na Kalou ni Isireli.

⁸ Ia a kaya vei Tevita na tamaqu ko Jiova, Me vaka ni sa tu e lomamu mo tara e dua na vale ki na yacaqu, sa daumaka sara ni sa tiko e lomamu oqori;

⁹ ia o sa na sega ni tara na vale, ia na luvemu ga, ena tara o koya na vale ki na yacaqu.’

¹⁰ Ia oqo sa vakavatukanataka ko Jiova na vosa ni yalayala ka a cakava; ni'u sa cabe cake ki na i tutu i Tevita na tamaqu, ka dabe ena i tikotiko vakaturaga e Isireli, me vaka a yalataka ko Jiova, ia au sa tara oti na vale ena yaca i Jiova na Kalou ni Isireli.

¹¹ Ia au sa la'ki vakadabera kina na Kato ka koto kina na veiyalayalati ka a cakava o koya kei ira na Isireli.”

Na Masu i Solomoni

¹² A tucake o Solomoni ena mata ni cabocabonisoro i Jiova, e matadra na i soqosoqo taucoko ni Isireli, a dodoka yani na ligana ruarua.

¹³ (A cakava oti tu o Solomoni e dua na i tutu parasa, sa 2.2 na mita na kena balavu, e 2.2 na mita na kena raba, ka 1.3 na mita na kena cere; a vakadabera ena lomadonu ni lomanibai. A sa qai vakatikora na i tutu oqo, ka tekiduru sobu kina ni sa vakanamata ki na i cabocabonisoro, e matadra na lewenivanua kece i Isireli, ka sa dodoka yani na ligana ruarua vaka ki lomalagi.)

¹⁴ A sa masu, ka kaya, Oi kemuni Jiova na Kalou ni Isireli, sa sega na Kalou me tautauvata kei kemuni, mai lomalagi se ena dela ni vuravura, ni o ni sa tudei tikoga ki na veiyalayalati, ka vakaraitaka tikoga na nomuni loloma tudei vei ira na nomuni tamata, o ira ka lako voli e matamuni mai na vu ni yalodra taucoko.

¹⁵ O ni sa yalodina ki na nomuni vosa ni yalayala vua na nomuni tamata o Tevita; ka sa yaco vakakina edaidai na veivosa kece oqo.

¹⁶ Ia oqo, kemuni Jiova na Kalou ni Isireli, mo ni vakayacora mada na nomuni vosa ni yalayala tale eso vua na tamaqu o Tevita, ena nomuni a tukuna vua ni na sega ni muduki na nona kawa mai na veiliutaki vakatui e Isireli kevaka era muria vinaka na nomuni lewa me vaka na i vakarau i Tevita.

¹⁷ Ena ka oqo, kemuni Jiova na Kalou ni Isireli, mo ni vakataudeitaka mada na nomuni vosa ni yalayala vei Tevita na nomuni tamata.

¹⁸ Ia ena mai tiko vakaidina li na Kalou kei na tamata e vuravura? Raica, ena sega ni rawa me vakarurugi kemuni na lomalagi, kei na lomalagi e cake sara; ia sa qai vakacava sara mada na kena lailai sobu na vale ka'u a tara oqo!

¹⁹ Ia mo ni goleva ga na masu kei na nona kerekere na nomuni tamata, kemuni Jiova na noqu Kalou, ka rogoca na noqu tagi kei na vakamamasu e matamuni;

²⁰ me yadra ka vakanamata tiko na matamuni ena bogi kei na siga ki na vale oqo, na vanua o ni sa yalataka ni o ni na vakatikora kina na yacamuni, me rawa ni o ni rogoca na noqu masumasu ka cabora na nomuni tamata ki na tikina oqo.

²¹ Ia mo rogoca na nona kerekere kei na vakamamasu ni nomuni tamata, kei ira na nomuni tamata na Isireli, ni ra masu mai na tikina oqo; ia mo ni rogoca mai na nomuni i tikotiko vakaturaga mai lomalagi; ia ni o ni sa rogoca, mo ni qai vosoti keimami kina.

²² Ia kevaka e caka cala e dua na tamata vua na kai nona, a sa vakabubuluitaki, ka lako mai ka mai bubului ena mata ni cabocabo ni soro ni vale oqo,

²³ ia mo ni qai rogoca mai lomalagi, ka cakava, ka lewai ira na nomuni tamata, ni o ni sa sauma na nona caka cala vua, ka vakamatei koya ena vuku ni nona caka cala; ka vakadonui koya sa caka dodonu, ka solia vua me vaka na nona i valavala dodonu.

²⁴ Ia kevaka era sa vakamalumalumutaki na Isireli e matadra na meca, ena vuku ni nodra i valavala ca vei kemuni, ia kevaka e ra sa vuki tale ka vakatusa na yacamuni ni ra sa vuki mai, vakamamasu ka kerekere vei kemuni ena vale oqo,

²⁵ mo ni qai rogoca mai lomalagi, ka mo ni vakalesui ira tale ki na vanua o ni a solia vei ira na nodra qase.

²⁶ Kevaka sa sogo o lomalagi, ka sega kina ni tau na uca, ena vuku ni nodra i valavala ca vei kemuni; ia kevaka era sa vakamamasu ki na vale oqo, ka vakatusa na yacamuni, ka vuki tani mai na nodra i valavala ca ni o ni sa vakararawataki ira;

²⁷ mo ni rogoca na nodra vakamamasu mai lomalagi ka mo ni vosota na nodra i valavala ca na nomuni tamata na Isireli, ni o ni a vakavulici ira ena sala vinaka me ra muria; ka vakatauca na uca ki na nomuni vanua, o ni sa solia vei ira na nomuni tamata me nodra i votavota.

²⁸ Kevaka sa yaco na dausiga ni vanua, se veidewavi e dua na matetaka levu, se vakarusai na i teitei mai na cagilaba se qele ni vodre, se kevaka era buku druadrua na meca ena dua ga na nodra veikoro, se veitakavi na mate dewa ena kedra maliwa,

²⁹ ka sa masu ka kerekere vei kemuni e dua ga na tamata, se mai vei ira kecega na nomuni tamata na Isireli, ni ra sa dui kila yadua na nodra vakararawataki, kei na nona rarawa, ka dodoka yani na ligana vaka ki na vale oqo;

³⁰ mo ni qai rogoca mai lomalagi mai na nomuni tikotiko vakaturaga, ia mo ni veivosoti ka mo ni solia vua na tamata yadua, me veiganiti kaya na nona i valavala kecega, ni o ni sa kila na lomadra yadua, ni sai kemuni duabau ga ka kila na lomadra kecega na luve ni tamata;

³¹ me rawa ni ra vakarokorokotaki kemuni, ka me ra muria na nomuni sala, ena gaunisala kecega era bula kina ena vanua o ni a solia vei ira na neimami qase.

³² E vakakina vei ira na tamata tani, ka sega ni kai vata kei ira na nomuni tamata na Isireli, ka a lako mai ena dua na vanua yawa ena vuku ni yacamuni rogo, na ligamuni kaukauwa, kei na ligamuni sa dodo tu, kevaka sa lako mai ka masu ena vale oqo,

³³ mo ni qai rogoca mai lomalagi ena yasana o ni sa tiko kina, ka mo ni cakava me vaka na ka kecega sa tagi kina vei kemuni na kai tani; me ra kila kina na yacamuni o ira kecega na kai vuravura, me ra rokovi kemuni, me vakataki ira na nomuni tamata na Isireli, ka me ra bau kila na vale oqo ka'u tara ni sa vakatokai ki na yacamuni.

³⁴ Kevaka era sa lako yani na nomuni tamata me ra la'ki vala kei ira na kedra meca, ena sala cava ga o ni talai ira kina, ka ra qai gole ka masu vaka ki na koro o ni a digitaka, ki na vale ka'u sa tara ena yacamuni,

³⁵ ia mo ni qai rogoca mai lomalagi na nodra masumasu kei na nodra kerekere, ka cakava na ka e vinaka vei ira.

³⁶ Kevaka era sai valavala ca vei kemuni ni sa sega na tamata sa sega ni valavala ca ia o ni sa cudruvi ira ka soli ira yani ki na kedra meca, me rau kau vakabobula ki na dua na vanua yawa, se vanua voleka;

³⁷ ia kevaka era taura matua e lomadra ena vanua ka ra kau vakabobula kina, ka veivutuni, ka vakamamasu mai vei kemuni mai na vanua era kau vakavesu kina, ka ra kaya, Kemami sai valavala ca, keimami sai valavala vakatani, ka i tovo ca;

³⁸ ia kevaka era sa veivutuni ena vu ni yalodra kei na lomadra taucoko ena vanua era tiko vakabobula kina, ni ra kau vakavesu kina, ka ra masu yani ni ra rai vaka ki na nodra vanua o ni a solia vei ira na nodra qase, ki na koro o ni a digitaka, kei na vale ka'u a tara oti tu oqo ena yacamuni;

³⁹ ia mo ni qai rogoca mai lomalagi, ena yasana o ni sa tiko kina, na nodra masumasu, kei na nodra kerekere, ka cakava na ka sa dodonu vei ira, ia mo ni qai vosota na nodra ca na nomuni tamata era sai valavala ca vei kemuni.

⁴⁰ “Ia oqo, kemuni na noqu Kalou, me raica na matamuni ka rogoca na daligamuni na masu sa cabori ena tikina oqo.

⁴¹ Mo ni cabe cake i Jiova na Kalou ki na nomuni vakavakacegu, oi kemuni kei na Kato ni nomuni kaukauwa. Ni laiva vei ira na nomuni bete, kemuni Jiova na Kalou, me ra vakasulumi ena veivakabulai, Ka me ra rekitaka na nomuni loloma o ira na nomuni tamata yalododonu.

⁴² Kemuni Jiova na Kalou, mo ni kakua ni vakanadakuya na nomuni lumuti oqo! Mo ni qai nanuma na nomuni loloma tudei vei Tevita na nomuni tamata.”