2 Veigauna 1 - Ai Vola Tabu Ena Vakavakadewa Vou

Kerea na Vuku o Solomoni na Tui

¹ A vakataudeitaki koya ena nona matanitu o Solomoni na luve i Tevita, ni sa tiko vata kei koya ko Jiova na nona Kalou, ka sa vakalevulevui koya vakalevu.

² A qai vosa o Solomoni vei ira kece na Isireli, vei ira na turaga vakailesilesi ni yayaudolu kei na yayadrau, kei ira talega na turaga ni lewa, kei ira na i liuliu ni veimatavuvale taucoko, kei ira era sa kena turaga.

³ A lako o Solomoni vata kei ira na i soqosoqo taucoko, ki na tikina cecere mai Kipioni ni tiko kina na Vale ni Veitavaki, ni a cakava o Mosese na i talatala ni Kalou mai na vanua lala.

⁴ Ia, a kauta cake ki Kiriaci Jiarimi na Kato ni Veiyalayalati o Tevita ki na tikina a vakarautaka o koya me tu kina, me vaka ni a birika o koya e dua na kena valelaca mai Jerusalemi.

⁵ Ia a koto e kea ena mata ni vale i Jiova na i cabocabonisoro parasa ka a cakava o Bisaleli na luve i Uri tagane. A qarava na Kalou o Solomoni kei ira na lewe ni soqosoqo.

⁶ A cabe cake o Solomoni ki na i cabocabonisoro parasa, ena mata i Jiova ka tu ena Vale ni Veitavaki, ka vakacabora kina e 1,000 na i soro kama.

⁷ Ena bogi o ya, a rairai kina vei Solomoni na Kalou, ka kaya vua, “Mo kerea na ka me'u solia vei iko.”

⁸ A sa kaya o Solomoni vua na Kalou, “O ni sa vakaraitaka na nomuni loloma levu ka tudei vei Tevita na tamaqu, ka o ni sa buli au me'u tui me kena i sosomi.

⁹ Ia kemuni Jiova na Kalou, mo ni qai vakayacora na nomuni vosa ni yalayala vei Tevita na tamaqu, ni o ni a buli au me'u tui vei ira era sa lewe vuqa me vaka na kuvu ni soso kei vuravura.

¹⁰ Mo ni solia mai vei au, na vuku kei na yalomatua me'u veilakoyaki ena kedra maliwa na nomuni tamata; o cei li ena lewai ira rawa na nomuni tamata; ni ra sa rui lewe vuqa sara?”

¹¹ A sa kaya vei Solomoni na Kalou, “Ena vuku ni kena sa tiko e lomamu na ka oqo, o a sega ni kerea na veika mo taukena, se na i yau, se na dokai, se me ra mate o ira era cati iko; o qai sega wale mada ga ni kerea mo bula balavu, ia o a qai kerea ga me nomu na vuku kei na yalomatua me rawa kina ni o lewai ira vakavinaka na noqu tamata, ka'u a buli iko kina mo nodra tui,

¹² au a solia kina vei iko na vuku kei na yalomatua. Au sa na solia talega vei iko na veika mo taukena, kei na i yau, kei na dokai, ka sa sega mada ni rawata taumada e dua na tui sa bula e liu, ena sega talega ni vakakina e dua ena gauna mai muri.”

Na Kaukauwa kei na Vutuniyau i Solomoni

¹³ Sa qai lesu tale mai o Solomoni mai na vanua cecere mai Kipioni ena mata ni Vale ni Veitavaki, ki Jerusalemi. A sa liutaki ira voli na Isireli mai kea.

¹⁴ A sa tauyavutaka o Solomoni e dua na nona mataivalu ka lewena e 1,400 na qiqinivalu kei na 12,000 na matasotia vodo ose. O ira oqo a vakatikori ira ena veikoro ni qiqinivalu, ka so era a tiko kei koya na tui mai Jerusalemi.

¹⁵ Ena dela ni nona veiliutaki, sa ka levu sara na siliva kei na koula e Jerusalemi me vaka na veivatu, ka sa ka levu sara na sitari me vaka na vunilolo.

¹⁶ A dau volia tiko mai Ijipita kei Kuei na ose eso o Solomoni, ka ra dau tauri qele ni ose mai Kuei na nona dauveivoli na tui ena i sau rawarawa.

¹⁷ Era a volia e dua na qiqinivalu mai Ijipita, ka kena i sau e 600 na tiki ni siliva; ka kena i sau talega e dua na ose e 150 na tiki ni siliva; era a vakauta talega vakakina vei ira kece na nodra tui na Itaiti, vei ira talega na tui e Siria.