2 Tui 3 - Ai Vola Tabu Ena Vakavakadewa Vou

Veivaluvaluti o Isireli kei Moapi

¹ A vakatekivu veiliutaki vei ira na Isireli mai Samaria o Jiorami na luve i Eapi ena i katini kawalu ni yabaki i Josefati na tui Juta, a tui o Jiorami me tinikarua na yabaki.

² A dau caka ca ena mata i Jiova o koya, ia a sega ga ni vakataki rau o tamana kei tinana; ni a biuta tani o koya na matakau i Peali, ka a cakava o tamana.

³ Ia a kabita ga na i valavala ca i Jeropoama na luve i Nipati, o koya ka a vakavalavalacataki ira na Isireli; a sega ni lako tani mai kina o koya.

Yalataka na Qaqa vei Moapi o Ilaisa

⁴ Ia a dau susu sipi o Mesa na tui Moapi, ka dau nona i tavi ena veiyabaki vua na tui Isireli e 100,000 na lami, kei na vutinisipi mai na 100,000 na sipi tagane.

⁵ Ia ni mate o Eapi, a qai talaidredre ena nona vakayacora na nona i tavi vua na tui Isireli o koya na tui Moapi.

⁶ A biuti Samaria ena gauna o ya o Jiorami na tui, ka soqoni ira kecega na Isireli.

⁷ A lako o koya ka talai vei Josefati na tui Juta, ka kaya, “Sa talaidredre vei au na tui Moapi, ka sa bese ni qaravi au; ia o na tovata li kei au ena nodra valuti na Moapi?” A sa kaya o tui Juta, “Io, au na lako kei iko ni daru sa duavata ga; o ira na noqu tamata sa nomu, kei ira na noqu ose sa nomu ose talega.”

⁸ A sa qai taroga, “Na sala cava me da na muria ena noda kaba vakaivalu?” A sa kaya o Jiorami, “Me daru muria na sala balavu vaka ki na vanua lala kei Itomi.

⁹ E rau a lako vata kei na tui Isireli, na tui Juta, kei na tui Itomi. Ia ni ra lako voli ena sala ka siga vitu, a qai sega na wai me ra gunuva na mataivalu, ka vakakina na medra wai na manumanu.

¹⁰ A sa kaya na tui Isireli, “Isa! Sa kacivi iratou vata na tui tolutolu oqo ko Jiova me soli iratou ki ligadra na Moapi.”

¹¹ A sa kaya o Josefati, “Sa sega beka ni dua na parofita i Jiova me da taroga kina na lomana?” A vosa mai e dua na nona tamata na tui Isireli, ka kaya, “Sa tiko eke o Ilaisa na luve i Safati, ka i vukevuke i Ilaijia.”

¹² A sa kaya o Josefati, “Io, sa parofita dina ka ni sa tiko vua na vosa i Jiova.” E ratou a mani lako sobu kina vua o iratou na tui Isireli, kei Josefati, kei na tui Itomi.

¹³ A sa kaya o Ilaisa vua na tui Isireli, “A cava li me'u cakava vei iko? Mo lako vei ira na parofita i tamamu, kei na parofita i tinamu.” A qai vosa vei Ilaisa na tui Isireli ka kaya, “E sega; sa kacivi iratou vata na tui tolutolu oqo ko Jiova me soli keitou ki na ligadra na Moapi.”

¹⁴ A sa kaya o Ilaisa, “Me vaka sa bula ko Jiova ni lewevuqa, o koya ka'u sa qarava, au sa sega wale ga ni'u dokai Josefati na tui Juta, au na sega sara ni gole vei iko, se raici iko.

¹⁵ Dou kauta mada mai vei au e dua na dauqiriqiri.” Ia ni qiriqiri tiko na dauqiriqiri, a yaco mai vei koya na kaukauwa i Jiova.

¹⁶ A sa kaya o koya, “Sa vosa vakaoqo ko Jiova, ‘Au na cakava na dreke ni wai sa maca oqo me sinai na kena veitobu.’

¹⁷ Ni kaya vakaoqo ko Jiova, ‘Dou na sega ni raica na cagi se uca, ia ena sinai ga na dreke ni wai oqo mo ni gunu kina, oi kemuni kei ira na nomuni bulumakau, kei na manumanu daucola i yaya.’

¹⁸ Ia oqo e ka lailai wale sara ena mata i Jiova; ena soli ira talega na Moapi ki ligamuni o koya,

¹⁹ ia o ni na vakadruka na veikoro vakabai kecega, kei na veikoro vinaka, ka vakasosoga na veimataniwai kecega, ka a vakacacana na veitiki ni vanua vinaka kecega ena vatu.

²⁰ Ia ena mataka ni siga ka dua, ni rauta toka na gauna ni vakacabo i madrali laukana, raica, sa drodro mai na wai vaka mai Itomi, me yacova ni sa luvu na vanua ena wai.

²¹ Ia ni ra rogoca kecega na Moapi, ni ratou a lako mai na tui me veivala kei ira, era a kacivi me ra soqoni vata yani, o ira a tokara rawa na i sulu ni valu, me vakatekivu mai vei koya ka gone duadua me yacovi koya ka qase taudua, ka ra la'ki tu ena i yalayala.

²² Ia ni ra yadra cake na Moapi ena mataka lailai, a cilava na wai na matanisiga, era a raica ni sa damudamu na wai me vaka na dra.

²³ Era kaya, Oqori na dra; era sa veiraravui vakaidina vakataki ira na tui, ka veivakamatematei. Ia oqo, o keda kece na kai Moapi, tou ia ki na i tokinivalu!

²⁴ Ia ni ra lako mai ki na nodra i tikotiko ni valu na Isireli, era a qai tucake na Isireli ka ravuti ira na Moapi me yacova ni ra dro e matadra; era a toso tikoga ki liu na Isireli ka vakamatei ira na Moapi.

²⁵ Era a vakacacana na nodra veikoro, ka ra dui biuta na nodra vatu na tamata yadua ki na vanua vinaka kecega, me yacova ni sa robota na vanua taucoko; era a sogota na veimataniwai kece. A la'ki vo walega na lalaga vatu e Kiri Ereseci, ka ra a qai tu volivolita na tamata daurabo ka valuta ena nodra i rabo.

²⁶ Ni sa raica o tui Moapi ni sa malumalumu tiko ena i valu, a qai kauta e lewe vitu na drau na tamata vakaiseleiwau, me tovolea me botea na mua donuya na tui Itomi; ia era a sega ni rawata.

²⁷ A qai taura na tui Moapi na nona ulumatua tagane, o koya ena kena i sosomi me tui, a vakacabori koya yani ena dua na i soro kama e dela ni vatu. A ka levu na cudru vei ira na Isireli; era a vakasuka tani mai vua, ka lesu ki na nodra dui vanua.