2 Tui 21 - Ai Vola Tabu Ena Vakavakadewa Vou

O Manasa na Tui Juta

¹ A sa yabaki tinikarua o Manasa ena gauna a yaco kina me tui Juta, ka veiliutaki mai Jerusalemi me 55 na yabaki. Na tinana o Efisepa.

² A sa ia o Manasa na i valavala ca ena mata i Jiova, me vaka na i tovo vakasisila era dau vakayacora na veimatanitu sa vakasevi ira tani ko Jiova e matadra na Isireli.

³ E a tara tale o Manasa na veitikina cecere ka sa vakacacana taumada o Esekaia na tamana; a tara cake eso na i cabocabonisoro vei Peali, ka cakava na i yaloyalo ni kalou yalewa o Asera me vaka sa kitaka o Eapi na tui Isireli. Sa dau cuva talega o Manasa ki na kalokalo eso ka qaravi ira.

⁴ A sa bulia talega eso na i cabocabonisoro ki na veikalou tani ena loma ni Valenisoro, oqori ena vanua sa kaya ko Jiova ni sa vakatikori kina na yacana me qaravi kina.

⁵ Ena loma ni lomanibai ruarua ni Valenisoro, sa tara kina eso na i cabocabonisoro ni qaravi kalokalo.

⁶ A sa vakacabora o Manasa na luvena me i soro kama. E a qarava na cakacaka ni vakacuru ka veitokani kei ira na daurairai. A sa vakayacora o koya na i valavala ca e vuqa ena mata i Jiova, ka sa vakacudruya.

⁷ A vakatikora na matakau ni kalou yalewa o Asera ena loma ni Valenisoro; oqori ena vanua sa tukuna kina ko Jiova vei rau o Tevita kei Solomoni na luvena na vosa oqo: “Ena i tikotiko oqo e Jerusalemi, na Valenisoro sai koya na vanua digitaki mai na nodra vanua raraba na mataqali i Isireli e tinikarua, me vanua me'u na dauqaravi kina.

⁸ Au na sega ni vakavuna tale me lako sese na yavadra na Isireli mai na vanua ka'u a solia vei ira na nodra qase, ia kevaka wale ga era qarauna me ra vakabauta ka cakava na ka kecega sa vakarota vei ira o Mosese na noqu tamata.”

⁹ Era a sega ni vakarorogo, ka vakacalai ira o Manasa me ra cakava e levu na ka ca, ka lailai na ka ca era cakava na veimatanitu ka a vakarusa ko Jiova e matadra na Isireli.

¹⁰ A vosa ko Jiova e gusudra na nona i talatala, na parofita, ka kaya,

¹¹ “O Manasa na tui Juta sa vakayacora na veitovo vakasisila oqo, ka vuqa na ka oqo sa ca vakalevu sara mai na kena era vakayacora na Amoraiti; ka sa liutaki ira na Juta ki na i valavala ca ena vuku ni nona kalou matakau e vuqa.

¹² Ena ka oqo, au na vakayacora na ca ki Jerusalemi kei Juta, ka ra na kidacalataka na tamata kecega sa rogoca.

¹³ Au na totogitaki Jerusalemi me vaka na ka au a vakayacora vei Samaria, me vaka na ka au a vakayacora vei Eapi na tui Isireli kei ira na nona kawa. Au na vakasavasavataki Jerusalemi vakavinaka sara, me vaka na savasava ni dua na veleti sa savati, ka qusi vakamamaca, ka cuvari sobu.

¹⁴ Au na biuti ira tu mai na vo-ni-bula, ka soli ira yani vei ira na kedra meca me ra vakacacani ira ka butakoca na nodra vanua.

¹⁵ Au na vakayacora oqo vei ira na noqu tamata ena vuku ni nodra caka ca e mataqu, kei na nodra vakacudrui au me vakatekivu mai na siga era a lako tani mai kina i Ijipita na nodra qase ka yacova mai na siga oqo.”

¹⁶ A vakadavea vakayauyau o Manasa na nodra dra na lewe vuqa ka ra a sega ni cala, me yacova ni sinai kina o Jerusalemi ena kena veiyasana kecega; ia oqo sa kena i kuri na nona i valavala ca ka vakaivalavalacataki ira kina na Juta, ni ra cakava na ka ca ena mata i Jiova.

¹⁷ Na vo ni veicakacaka kece i Manasa, ka okati kina na i valavala ca e vakayacora sa volai ena Kedra i Vola Tukutuku na Tui Juta.

¹⁸ A sa mate o Manasa ka bulu ena loma ni bai ni valenitui, ena teitei i Usa, ka sa sosomitaki koya o Emoni na luvena me veiliutaki vakatui.

O Emoni na Tui Juta

¹⁹ E a yabaki 22 o Emoni ena gauna sa tui kina e Juta, ka veiliutaki voli e Jerusalemi me yabaki rua. Na yaca i tinana o Mesulemeci na luve i Arusi na kai Jotipa.

²⁰ Ia me vakataki Manasa na tamana, a sa caka cala o Emoni ena mata i Jiova.

²¹ E a muria kecega na i valavala ka a cakava o tamana, ka dauqarava na veimatakau ka a dau qarava o tamana.

²² A sa besetaki Jiova, na Kalou ni nona qase, ka talaidredre ki na i vakaro i Jiova.

²³ Era a nakicataki koya na nona i vakalesilesi ka ra vakamatei koya ena valenitui.

²⁴ O ira na lewenivanua e Juta era a qai vakamatei ira kece na i vakalesilesi ka ra vakaitavi ena nona mate na tui, ka ra buli Josaia na luvena me nodra tui.

²⁵ A veika kece sa vakayacora o Emoni sa volai ena Kedra i Vola Tukutuku na Tui Juta.

²⁶ A sa bulu o Emoni ena nona i bulubulu ena tiki ni vanua i Usa; ka sa sosomitaki koya o Josaia na luvena me tui.