2 Tui 18 - Ai Vola Tabu Ena Vakavakadewa Vou

O Esekaia na Tui Juta

¹ Ena i katolu ni yabaki ni veiliutaki vakatui i Osea na luve i Ela e Isireli, a sa yaco me tui Juta o Esekaia na luve i Easi

² ni sa yabaki 25, ka veiliutaki mai Jerusalemi me 29 na yabaki. Na tinana o Epi na luve i Sakaraia.

³ A dau caka dodonu ena mata i Jiova o koya, me vaka na ka kecega a cakava na tui o Tevita na nona qase.

⁴ A sa vakarusa na veivanua ni qaravi kalou tani, ka voroka na vatu lelevu ni sokalou, ka basuraka na i vakatakarakara ni kalou yalewa o Asera. E a vorolaka vakamatailalai talega na gata parasa o Neusitani ka a cakava o Mosese. Me yacova na gauna o ya, era sa dau vakama tiko na ka boi vinaka o ira na Isireli me dau vakananumi kina.

⁵ A vakabauti Jiova na nodra Kalou na Isireli o Esekaia; ka sa sega tale ni dua na tui e Juta me tautauvata kei koya, mai liu se ena gauna e muri.

⁶ A sa tudei tikoga vei Jiova ka sega sara ni beca na nona lewa, ia sa dau qarauna vinaka me muria na veivakaro kece sara sa vakarota ko Jiova vei Mosese.

⁷ Ena ka oqo, a sa tiko kina vata kei koya ko Jiova, ka sa rawata vakavinaka na veika kece sara sa vakayacora. Ia sa sega ni muria na lewa i tui Asiria ka sega ni via vakamalumalumu vua.

⁸ A sa qaqa ena nona valuti ira na kai Filisitia, ka curuma vakaukauwa na nodra i tikotiko, mai na koro lailai duadua ki na koro levu duadua, ka okati kina o Qasa kei na veivanua e tikiva.

⁹ Ia ena i kava ni yabaki i Esekaia na tui, ena i kavitu ni yabaki i Osea na luve i Ela, na tui Isireli, sa valuti Isireli kina o Salimanisa na tui Asiria ka vesuka vakaukauwa na koro o Samaria.

¹⁰ E a qai soro o Samaria ena i katolu ni yabaki ni kena a vesuki tiko vakaukauwa; ka donumaka oqo na i kaono ni yabaki i Esekaia na tui, ka i kaciwa ni yabaki ni veiliutaki i Osea na tui Isireli.

¹¹ A kauti ira tani na Isireli ki Asiria o tui Siria, ka vakatikori ira mai Ela kei Apori, ena uciwai mai Kosani, kei na nodra veikoro na kai Mitia;

¹² baleta ni ra a sega ni vakarorogo ki na vosa i Jiova na nodra Kalou, ka vakacacana na nona veiyalayalati kei na ka kecega a vakarota o Mosese na i talatala i Jiova, ka ra sega ni via rogoca se talairawarawa kina.

Vakarerei Jerusalemi o Asiria

¹³ Ena i katinikava ni yabaki i Esekaia na tui, sa valuta na veikoro kaukauwa kece i Juta o Senakaripi na tui Asiria, ka vakadrukai ira.

¹⁴ A talatala vei tui Asiria ki Lakisi o Esekaia na tui Juta, ka kaya, “Au sa caka cala; au kerea mo tarova na nomu ravuravu, ka'u na solia vei iko na ka o vinakata.” E a qai tukuna lesu mai o tui Asiria me solia vua o Esekaia e 10,000 na kilokaramu na siliva kei na 1,000 na kilokaramu na koula.

¹⁵ A solia vua o Esekaia na siliva kecega a kunea ena Valenisoro kei na veika sa tu ena veivale ni yau ena valenitui.

¹⁶ A luvata tani talega o Esekaia na koula mai na i sogo ni katuba ni Valenisoro, ka vakakina na koula sa biuta o koya ena duru ni katuba, ka solia kece yani vei Senikaripi.

¹⁷ A sa tala o tui Asiria e dua na mataivalu levu mai Lakisi ki Jerusalemi me la'ki valuti Esekaia; ka ratou liutaka na mataivalu e tolu na nona turaganivalu lelevu. Ni ra yaco yani ki Jerusalemi, era a la'ki tu voleka ki na salisali ni drano e cake, ka koto ena sala ena vanua ni dausava i sulu.

¹⁸ E ratou a qai talatala yani vua na tui, ka ratou lako yani e tolu na i vakalesilesi ni tui me ratou veivosaki: o Elaiakimi na luve i Ilikaia, o koya sa lewa na i tikotiko vakatui, o Sepina na vunivola, vata kei Joa na luve i Esava, o koya sa dau maroroya na i tukutuku ni matanitu.

¹⁹ A sa qai tukuna vei iratou e dua na turaganivalu nei tui Asiria ni gadreva me kila o tui Asiria se na cava na ka e vakavuna me yalodei tiko kina o Esekaia na tui.

²⁰ E a kaya vakaoqo, “Dou sa nanuma li ni vosa wale ga ena rawa ni vakaisosomitaka na kila-ka kei na kaukauwa ni mataivalu? O ni vakararavi li vei cei me vukea na nomuni sega ni via vakarorogo vei Asiria?

²¹ Kevaka o ni namaka me vukei kemuni o Ijipita, ia oqori ena vaka na vakayagataki ni gasau me nomuni i titoko ni taubale, ka ni na ramusu ka vakamavoataka tale na ligamuni. Sa vaka o ya na i yaloyalo i tui Ijipita vei ira kecega era vakararavi vua.”

²² E a tomana na nona vosa na turaganivalu ni Asiria ka kaya, “Ia kevaka dou kaya vei au ni o ni sa vakararavi vei Jiova na nomuni Kalou, sa sega li ni vakacacana na veitikina tabu i Jiova kei na vanua ni vakacaboisoro o Esekaia, ka qai tukuna vei ira na tamata e Juta kei Jerusalemi me ra sokalou duadua ga ena cabocabonisoro e Jerusalemi?

²³ Ia oqo, mo ni veiyalayalati mada kei na noqu turaga na tui Asiria; ia ka'u na solia vei kemuni e 2,000 na ose kevaka dou kunea rawa na i wiliwili ni tamata o ya me ra vodoka.

²⁴ Sa sega mada ga ni dou vakatauvatani rawa kei na i vakailesilesi vakaivalu lolovira duadua e Asiria, ia dou se nanamaki ga vei Ijipita me vakauta yani vei kemudou na qiqinivalu kei na mataivalu vodo ose!

²⁵ O ni nanuma li ni'u sa lako mai me'u valuta na nomuni vanua ka segai kina na veivuke i Jiova? Ko Jiova vakaikoya sa kaya me'u valuta na vanua oqo ka vakarusa.”

²⁶ E ratou a qai kaya vua na turaganivalu ni Asiria o Elaiakimi na luve i Ilikaia, kei Sepina, kei Joa, “Kerekere, mo ni vosa mada vaka-Arameka vei keitou baleta ni keitou kila na vosa oqori. Ia mo ni kakua ga ni vosa vakaiperiu baleta ni ra na rogoca ka kila na tamata kece era tiko ena dela ni bai.”

²⁷ A sauma lesu na turaganivalu ka kaya vei iratou, “Dou nanuma beka li ni a talai au mai na noqu turaga me'u mai vakadewa i tukutuku ga vei kemudou vata kei na tui? E segai sara, ni'u sa vosa talega vei ira na tamata era dabe tiko oqori ena dela ni bai, ka ni ra na kania talega na nodra benu ka gunuva na nodra suasua me vakataki kemudou.”

²⁸ E a qai duri cake na turaganivalu ni Asiria ka kacivaka vakadomoilevu ena vosa vakaiperiu, “Mo ni rogoca na veika sa tukuna oqo o tui Asiria vei kemuni!

²⁹ Sa kaya mo ni qarauna me kakua ni vakacalai kemuni o Esekaia. O Esekaia ena sega ni vakabulai kemuni.

³⁰ Ia me kakua ni rawai kemuni o koya mo ni vakararavi vei Jiova. Mo ni kakua ni nanuma ni na vakabulai kemuni ko Jiova, ka tarova na neimami mataivalu na kai Asiria mai na kena tauri vakavesu na nomuni koro levu.

³¹ Mo ni kakua ni vakarorogo vei Esekaia. Sa vakarota na tui Asiria mo ni lako tani mai soro vua. O ni na vakatarai kece mo ni kania na qerepi mai na nomuni i teitei, kei na vuanilolo mai na nomuni vunilolo, ka gunu mai na nomuni mataniwai;

³² me yacova ni'u na qai lako tale mai, ka kauti kemuni ki na vanua ka sa vaka na nomuni vanua, na vanua ni sila kei na waini, na vanua ni madrai kei na veiloganivaini, na vanua ni waiwai olive kei na de ni oni, mo ni bula kina, ka kakua ni mate. Ia mo ni kakua ni vakarorogo vei Esekaia, ni sa vakaisini kemuni, ka kaya, Ena vakabulai keda ko Jiova.

³³ A bau dua li na kalou ni veivanua oqo sa vakabula na nona vanua mai na ligana na tui Asiria?

³⁴ Sa evei na kalou ni Emaci, kei Apati? E vei na kalou ni Sivafeimi, Iena, kei Iwa? Era sa vakabulai Samaria li mai na ligaqu?

³⁵ Ena gauna cava li era sa bau vakabula kina na nodra vanua o ira na veikalou ni veimatanitu oqo mai na liga i tui Asiria? Ia na cava o qai via vakasamataka kina ni na vakabulai Jerusalemi ko Jiova?”

³⁶ Ia era a galu ga na tamata, ka sega ni cavuta e dua na vosa, ni a vakarota na tui, ka vaka, “Ni kakua ni sauma na nona vosa.”

³⁷ E ratou sa qai dresulaka na nodratou i sulu ena levu ni rarawa o Elaikimi, o Sepina, kei Joa ka la'ki raici Esekaia na tui me vakadewataki vua na i tukutuku nei turaganivalu ni Asiria.