2 Pita 3 - Ai Vola Tabu Ena Vakavakadewa Vou

Na Yalayala me Baleta na Lesu Tale Mai ni Turaga

¹ Oi kemuni na wekaqu lomani, oqo na i karua ni vola ka'u sa vola yani vei kemuni. Sa volai ga na i vola ruarua oqo mo ni vakananumi kina ka vakayaloqaqataki me taucoko sara ka savasava na nomuni i tovo ni vakasama.

² Au vinakata mo ni daunanuma lesu na nodra vosa na parofita yalosavasava ena gauna eliu. Ni kakua talega ni guilecava na veivakaro ni noda Turaga ka noda i Vakabula sa vakadewataka yani vei kemuni mai vei iratou na nomuni i apositolo.

³ E bibi taumada kina mo ni kila na ka oqo, ni na lako mai ena gauna emuri sara eso na tamata sa liutaki na nodra bula mai na nodra gagadre ca. Era na vakalialiai kemuni

⁴ ka ra na taroga, “A sega li ni yalataka o koya ni na lesu tale mai? Sa evei ga o koya? Era sa mate oti taucoko na neimami qase, ia era se tautauvata vinaka tikoga na veika sa yaco me tekivu mai na i vakatekivu kei vuravura!”

⁵ Era na kaya na ka oqo baleta ni ra sa nakita me ra vakalecalecava na ka dina me baleta na nona a vosa taumada na Kalou ena gauna makawa sara, ka sa buli kina na lomalagi kei na vuravura. A sa wasei tani na vuravura mai na wai ka sa buli ena wai,

⁶ ka sai koya talega na wai, na wai ni waluvu, sa luvuci ka vakarusai kina na vuravura makawa.

⁷ Ia sa maroroi ga na lomalagi kei na vuravura edaidai mai na nona vosa talega na Kalou me yacova na siga ni veilewai. Ena qai vakacacani emuri ena bukawaqa, ka ra na vakarusai vakakina na tamata tawalotu.

⁸ Kemuni na wekaqu lomani, ni kakua ni guilecava na ka oqo! Ni sa sega sara na kedrau duidui ena mata ni Turaga na dua na siga kei na 1,000 na yabaki, ni sa tautauvata ga na 1,000 na yabaki kei na dua na siga.

⁹ Sa sega ni berabera na Turaga ni vakayacora na nona vosa ni yalayala, me vaka era sa nanuma eso. Ia sa vosoti kemuni ga vakadede, baleta ni sa sega ni vinakata o koya me rusa e dua, ia me ra veivutunitaka ga na nodra i valavala ca na tamata yadua.

¹⁰ Ia ena yaco mai na Siga ni Turaga me vaka na daubutako. Ena Siga o ya, ena takali tani kina o lomalagi ena rorogo domoilevu, era na vakawaicalataki ena bukawaqa na veika era ciri tu e maliwa lala, ka na vakarusai vakadua o vuravura kei na veika kecega sa tu kina.

¹¹ Me vaka ni ra na vakarusai vakaoqo na veika kece sara oqo, na mataqali i vakarau ni bula cava sa dodonu sara mo ni bulataka? Sa dodonu me savasava sara ka vakacabori me nona duadua ga na Kalou na nomuni bula.

¹² Ena nomuni namaka tiko na Siga ni Kalou, ni gumatua me rawa ni yaco mai kina vakatotolo — na siga ena vakamai ka vakacacani kina o lomalagi, ka na vakawaicalataki kina ena bukawaqa na veika era ciri voli tu ena maliwa lala.

¹³ Ia oi keda, me vaka na nona vosa ni yalayala na Kalou, eda sa waraka ga na lomalagi vou kei na vuravura vou, sa vakaitikotiko kina o valavala dodonu.

¹⁴ O koya oqo, kemuni na wekaqu, ni o ni sa waraka tiko na Siga oqo, mo ni gumatua sara kina mo ni savasava ka vinaka sara ena mata ni Kalou, ka mo ni tiko veiyaloni kaya tikoga.

¹⁵ Ni okata na gauna balavu e veivosoti tiko mai kina na Turaga me ia kina na veivakabulai vei kemuni, me vaka na nona volavola yani vei kemuni na noda i tokani lomani o Paula, ni sa vakayagataka na yalomatua sa solia vua na Kalou.

¹⁶ Ni sai koya ga oqo na veika sa vola o koya ena nona i vola kece sara me baleta na ulutaga oqo. Era tiko ena nona i vola eso na veika dredre me kilai, ka ra sa vakatanitaka o ira na tamata lecaika ka sega ni tudei ena vuku ni nodra vakamacala lasulasu, me vaka era sa dau kitaka ki na veitiki ni Vola Tabu tale eso. Ena ka oqo era sa vakarusai ira vakai ira ga kina.

¹⁷ Ia vei kemuni na wekaqu, o ni sa kila rawa oti tiko na veika oqo. Mo ni qaqarauni vinaka kina, de o ni na qai vakacalai mai na nodra cala na tamata daubasulawa vakaoqo ka bale kina mai na nomuni yavu dei.

¹⁸ Ia ni tubu cake ga ena lolomasavu kei na nomuni veikilai kei na noda Turaga ka noda i Vakabula ko Jisu Karisito. Me ia ga vua na vakarokoroko ena gauna oqo ka tawamudu! Emeni.