2 Cesalonaika 3 - Ai Vola Tabu Ena Vakavakadewa Vou

Mo ni Masulaki Keitou

¹ Me'u tinia, kemuni na veiwekani, ni masulaki keitou me rawa ni tete vakatotolo yani kina na vosa ni Turaga ka me ciqomi ena doka, me vaka sara ga na kena yaco oqo ena kemuni maliwa.

² Ni masulaka talega me na vakabulai keitou na Kalou mai na ligadra na tamata yalo vakatani ka dau caka ca; ka ni ra sega ni vakabauta kece na tamata na i tukutuku.

³ Ia sa yalodina ga na Turaga, o koya ena vakaukauwataki kemuni ka maroroi kemuni mai vua na vuni ca.

⁴ Keitou sa yalodei talega vua na Turaga ena vukumuni, ni o ni sa cakava tiko na veika keitou sa dau vakarota vei kemuni.

⁵ Me tubera mada ga na lomamuni na Turaga ki na loloma ni Kalou kei na yalo ni vosota sa dau solia na Karisito.

Sa Noda i Tavi me Da Cakacaka Tikoga

⁶ Ia oqo, keitou sa vakaroti kemuni kina na veiwekani, ena yaca ni noda Turaga ko Jisu Karisito, mo ni kakua ni tiko vata kei ira na tamata vakabauta vucesa ka ra sa dau vakasavuliga voli ga, ni sa sega ni vaka o ya na i vakavuvuli o ni a rogoca mai vei keitou.

⁷ Ni o ni sa kila vakai kemuni ni sa kilikili mo ni vakadamurimuri keitou; ni keitou a sega ni dau vakasavuliga se vucesa ena kemuni maliwa.

⁸ Keitou a sega ni ciqoma wale tu ga na nodra veitokoni na tamata, ia keitou a saumi ira ga. Ia keitou a cakacaka ga vakaukauwa ena siga kei na bogi me keitou kakua kina ni vakaicolacolataka e dua vei kemuni.

⁹ Na neitou vakayacora oqo e sega ni baleta ni sa sega vei keitou na dodonu me keitou namaka kina na nomuni veiqaravi; ia keitou sa kitaka ga me i dusidusi vei kemuni mo ni muria.

¹⁰ Ena gauna keitou a tiko vata kina kei kemuni, keitou a tauca oti vei kemuni na i vakaro oqo: “Me kakua ni kana na tamata sa sega ni via cakacaka.”

¹¹ Keitou sa rogoca ni ra tiko eso vei kemuni era sa vakasavuliga voli ga ka vucesa, ka ra dau la'ki veivakasosataki vei ira tale eso.

¹² Keitou sa vakaroti ira kina na tamata vakaoqo ka vakauqeti ira ena yaca ni noda Turaga ko Jisu Karisito me ra bulataka na bula vakaivakarau ka vakasaqaqara cakacaka me ra bula rawa kina vakai ira.

¹³ Kemuni na veiwekani, ni kakua ni vakacauoca ena caka vinaka.

¹⁴ Ia kevaka e dua vei kemuni sa bese ni muria na neitou vosa mai na i vola oqo, mo ni kakua ni cakava vua e dua na ka se kauwaitaki koya kina, ka me na qai madua ga kina o koya.

¹⁵ Ni kakua ga ni okati ira oqo me ra kemuni meca, ia mo ni vunauci ira ga me vaka ni ra sa nomuni i tokani ena vakabauta.

Na Kena i Tinitini

¹⁶ Me qai solia vei kemuni na Turaga ni veivakacegui na vakacegu ena veigauna kecega. Me tiko vei kemuni vakayadua na Turaga!

¹⁷ Oi au o Paula, ka'u sa vola yani na vakanuinui vinaka oqo ena ligaqu dina. Sa i koya oqo na i vakatakilakila ena noqu i vola kece; ni'u sa dau volavola vakaoqo.

¹⁸ Me tiko vata kei kemuni kece sara na lolomasavu ni noda Turaga ko Jisu Karisito.