1 Tui 6 - Ai Vola Tabu Ena Vakavakadewa Vou

Sa Tara na Valenisoro o Solomoni

¹ Ni oti e va na drau walusagavulu na yabaki ena gauna ka ra a lako tani kina mai na vanua o Ijipita o ira na Isireli, ena i kava ni yabaki ni nona tui Isireli o Solomoni, ena i karua ni vula, sa vakatekivu kina na cakacaka ni tara Valenisoro.

² Na vale oqo ka tara o Solomoni me nei Jiova e 27 na mita na kena balavu, e ciwa na mita na kena raba, ka 13.5 na mita na kena cere.

³ Ia na varada ka i curucuru ki loma ni Valenisoro e 4.5 na mita na kena titobu ka ciwa na mita na kena raba, ka tautauvata kei na raraba ni vale.

⁴ Na lalaga ni Valenisoro e toka kina eso na vanua cicila, ka rabalailai na kena e tautuba mai na kena e loma.

⁵ A tara e tolu na tabavale ka ravita tu yani na lalaga e tautuba mai na yasa ruarua kei na daku ni Valenisoro, ka 2.2 na mita na cere ni tabavale yadua.

⁶ Na rumu yadua ni tabavale sara e ra e 2.2 na mita na kena raba, e 2.7 na mita na raba ni kena e lomadonu, ka 3.1 na mita na raba ni kena e cake sara. Na lalaga ena tabavale yadua e mamare toka mai na kena e rukuna baleta me rawa kina ni semati ga ki lalaga na veirumu yadua e cake ka segai tale ni qai gadrevi na isa ni vale.

⁷ Na vatu e vakayagataki ena kena tara na Valenisoro sa vakarautaki oti kece mai na vanua ni ta vatu, oqo me kakua kina ni rorogo na domo ni tukituki, se na matau, se dua na i yaya kaukamea vakamatai ni tara tiko na Valenisoro.

⁸ Na katuba ki na tabavale sara e ra e toka mai na yasana ki na ceva ni Valenisoro, ka semati na i karua kei na i katolu ni tabavale na i kabakaba vakarautaki.

⁹ A sa qai tara oti na Valenisoro o Solomoni na tui. Sa vakasiligitaka na doka ni vale e loma ena kau sitari balabalavu kei na kena e rabaraba.

¹⁰ A cakava o koya eso na i tabavale ena yasa kece ni vale, na taba ni vale yadua sa 2.2 na mita na kedra cere; era sa semati vata ena kau sitari.

¹¹ A yaco mai na vosa i Jiova vei Solomoni, ka kaya,

¹² “Ena vuku ni vale oqo o tara tiko, kevaka o muria na noqu i lesilesi, ka cakava na noqu lewa, ka vakabauta na noqu i vakaro ka muria vakakina, au na qai vakataudeitaka vei iko na noqu vosa, ka'u a vosataka vei Tevita na tamamu.

¹³ Ia ka'u na tiko ga kei ira na luve i Isireli, ka na sega ni biuti ira na noqu tamata na Isireli.”

¹⁴ Ena ka oqo sa tara kina na Valenisoro o Solomoni, ka vakaotia.

Na i Ukuuku e Loma ni Valenisoro

¹⁵ A sa tara na lalaga mai loma me yaco ki na siligi ni vale ena sitari rabaraba, ka cakava na buturara ni vale ena paini.

¹⁶ E dua na rumu e loma, sa vakatokai na Tikina Tabu Sara, sa tara koto ena daku ni Valenisoro. Na kena balavu e 9 na mita ka sa lati ena sitari rabaraba me tekivu mai na buturara me yaco ki na siligi ni vale.

¹⁷ Na rumu ena mata ni Tikina Tabu Sara e 18 na mita na kena balavu.

¹⁸ Na kau sitari e loma ni vale sa ceuti kina me kena i ukuuku na i yaloyalo ni vuanikau kei na senikau. Sa ubia kecega na lalaga ni vale mai loma na kau sitari, ka sa sega ni laurai kina na lalaga vatu.

¹⁹ A sa tara e dua na rumu tabu ena daku ni Valenisoro, ka oqo na vanua me vakotori kina na Kato ni Veiyalayalati i Jiova.

²⁰ Na rumu tabu oqo e 9 na mita na kena balavu, ka 9 na mita na kena raba, ka 9 na mita na kena cere, ka sa boroi ena koula dina. A sa solegi na i cabocabonisoro ena i musumusu ni sitari.

²¹ A sa solega o Solomoni na loma ni Valenisoro ena koula, ka vakaliliga na i taube koula e mata ni katuba ki na rumu tabu me tawasei rau, ka sa boroi talega ena koula.

²² Sa solega na veitikina kecega e loma ni Valenisoro na koula, ka vakakina na i cabocabonisoro ena Tikina Tabu Sara.

²³ Ia ena loma ni Tikina Tabu Sara, a cakava o koya e rua na jerupi ena kau olive, ka 4.4 na mita na kedrau cecere yadua.

²⁴ E dua na taba ni jerupi e 2.2 na mita na kena balavu, ka 2.2 talega na mita na tabana kadua, ka sa 4.4 na mita na balavu e koto mai na sovu ni tabana edua me yaco ki na kena i karua.

²⁵ Na i karua talega ni jerupi sa 2.2 na mita na kena balavu, ni sa tautauvata vinaka na kedrau levu kei na kedrau i bulibuli na jerupi.

²⁶ Na kedrau cecere na jerupi yadua e 4.4 na mita.

²⁷ A sa vakatikori rau veitikivi na jerupi ena Tikina Tabu Sara, me rawa ni veisotari na tabadrau ena lomadonu ni rumu ni rau vakatetaba toka, ka tara yani na lalaga na mua ni tabadrau kadua.

²⁸ E rau sa solegi ena koula na jerupi ruarua oqo.

²⁹ Ia ena lalaga ni vale kece sara e loma kei na taudaku, sa ceuti kina na i yaloyalo ni jerupi, kei na vuni niusawa, kei na senikau sa seraki me ukucavutaka.

³⁰ A sa boroya talega o koya na buturara ni vale ena koula, ena rumu e loma kei na kena e taudaku.

³¹ Ia ena i curucuru ki na Tikina Tabu Sara, a sa cakava o koya na katuba ena olive, ka sa lima na muana baleta ni momoto cake na dela ni katuba.

³² A sa cakava talega ena olive na i sogo ruarua; a ceuta kina na i vakatakarakara ni jerupi, na niusawa, kei na senikau. A sa boroya na jerupi kei na niusawa ena koula.

³³ A cakava na duru ni sogo ki na rumu levu ena olive, ka taya vakarivirivi na va na yasana.

³⁴ Ia sa caka ena paini na i sogo ruarua, ka rawa ni lobi na muana yadua.

³⁵ A ceuta kina eso na i yaloyalo ni jerupi, kei na niusawa, kei na senikau me kena i ukuuku, ka boroya ena koula.

³⁶ A sa tara ena mata ni Valenisoro na rara-e-loma, ka sa viribai na rara oqo mai na dua na i yatu kau na sitari kei na vatu e tataqavi tolu.

³⁷ E a vakadavori na yavu ni Valenisoro ena i kava ni yabaki ni veiliutaki i Solomoni na tui, ena i karua ni vula, na vula o Sifi.

³⁸ Ia ena i kawalu ni vula, na vula o Puli, ena i katinikadua ni yabaki ni veiliutaki i Solomoni, a sa tara vakaoti kina na Valenisoro me vaka sara ga na kena i tuvatuva. E taura e vitu taucoko na yabaki na nona tara vale o Solomoni.