1 Tui 19 - Ai Vola Tabu Ena Vakavakadewa Vou

Sa Dro ki Ului Saineai o Ilaijia

¹ A sa tukuna vei Jesipeli o Eapi na ka kecega a cakava o Ilaijia, ka ni a vakamatei ira kece sara na parofita i Peali ena i seleiwau.

² A tala o Jesipeli e dua na tamata vei Ilaijia, ka kaya, “Me ra vakamatei au mada ga na kalou, kevaka au na sega ni vakamatei iko me vaka o a cakava vei ira na parofita ena gauna vata ga oqo ni mataka.”

³ A sa rere o Ilaijia, ka dro yani me bula; a sa kauta yani na nona cauravou ka lako i Perisepa mai Juta, ka biuta e kea na nona cauravou.

⁴ A lako tu o koya me bogi dua e loma ni veikau, a yaco yani, ka la'ki tiko sobu ena dua na vu ni junipa, a kerea o koya me mate yani, ka kaya, “Kemuni Jiova, sa rauta oqo; mo ni vakaotia na noqu bula, ni'u sa sega ni vinaka cake mai vei ira na noqu qase.”

⁵ Ia ni davo koto ka moce ena ruku ni junipa, raica, a tarai koya e dua na agilosi, ka kaya vua, “Mo duri cake mo kana.”

⁶ A rai voli o koya ka raica, a koto voleka ki uluna e dua na keke tavu oti ena qilaiso kei na dua na saqa wai. A kana o koya, ka gunu, ka koto sobu tale.

⁷ A sa lako vakarua mai na agilosi i Jiova, a sa tarai koya ka kaya, “Mo duri cake, mo kana ni sa rui balavu vei iko na sala.”

⁸ A duri cake o koya, kana, gunu, ka lako ena kaukauwa ni kakana o ya, me siga 40 ka bogi 40 ki Saineai, na ulunivanua ni Kalou.

⁹ A la'ki curuma o koya e dua na qara vatu mai kea ka moce kina. E ka ni kidacala ni sa vosa vua ko Jiova, “A cava o cakava tiko eke, Ilaijia?”

¹⁰ A sa kaya o koya, “Au sa rui yalo luluvu vakalevu ena vuku i Jiova, na Kalou ni lewe vuqa; ni ra sa biuta na veiyalayalati kei kemuni na Isireli; era sa talaraka sobu na nomuni cabocabonisoro, ka vakamatei ira na nomuni parofita ena i seleiwau; ia o au, ka'u sa vo duadua tiko; era sa saga tiko me ra vakamatei au.”

¹¹ A sa kaya o koya, “Mo lako yani, ka la'ki tu ena dela ni ulunivanua ena mata i Jiova, ni sa vakarau lako siviti iko ko Jiova.” A sa liwa mai e dua na cagi levu ka kaukauwa, a sa sea na veiulunivanua ka vorolaka na veiuluvatu ena mata i Jiova — ia sa sega ni tiko ena cagi ko Jiova. Ni sa oti na liwa ni cagi, a sa yaco e dua na uneune — ia sa sega ni tiko ena uneune ko Jiova.

¹² Ni sa oti na uneune, a basika mai na bukawaqa — ia sa sega talega ni tiko ena bukawaqa ko Jiova. Ni sa oti na bukawaqa, a qai rogo mai e dua na domo lailai ka malumu.

¹³ Ni sa rogoca o Ilaijia, a sa ubia na matana ena nona i tutuvi ka lako yani, ka la'ki tu ena gusu ni qara vatu. E dua na domo a qai voqa yani vua, ka sa kaya, “I Ilaijia, a cava o sa cakava tiko eke?”

¹⁴ A sa kaya o koya, “Au sa rui yalo vuvu vakalevu ena vuku i Jiova na Kalou ni lewe vuqa; ni ra sa biuta na veiyalayalati kei kemuni na Isireli, era sa talaraka sobu na i cabocabonisoro, ka vakamatei ira na nomuni parofita ena i seleiwau; ia ka'u sa vo duadua ga; era a saga tiko me ra vakamatei au.”

¹⁵ A sa kaya vua ko Jiova, “Mo lako, ka lesu tale ena nomu i lakolako ena loma ni veikau ki Tamasiko; ia ni o sa yaco kina, mo la'ki lumuti Eseeli me tui Siria;

¹⁶ ka lumuti Jeu na luve i Nimesai me tui Isireli; ka lumuti Ilaisa na luve i Safati na kai Epelimeola me parofita me kemu i sosomi.

¹⁷ O koya yadua sa dro mai na veivakamatei i Eseeli, ena qai vakamatea o Jeu; ia o koya sa dro bula mai vei Jeu ena qai vakamatea o Ilaisa.

¹⁸ Ia au na maroroya me noqu e lewe 7,000 na Isireli, o ira kecega sa dinati au ka sega ni cuva vei Peali se reguca na nona i vakatakarakara.”

Na Kacivi nei Ilaisa

¹⁹ A cavutu mai kea o Ilaijia, ka kunei Ilaisa na luve i Safati ni siviyara tiko. Era liu tiko vua e tinikadua na siviyara, ka yarua na bulumakau tagane me yarataka e dua na siviyara. E a vakayagataka tiko o Ilaisa na i otioti ni siviyara, ka kena i ka tinikarua talega. A qai lako siviti koya o Ilaijia ka taubena vua na nona i tutuvi.

²⁰ A biuti ira na bulumakau o Ilaisa, ka cici muri Ilaijia, ka kaya vua, “Me'u la'ki regu ni vakamoce mada vei rau o tamaqu kei tinaqu, oti o ya me'u qai muri iko yani.” A sa kaya vua o Ilaijia, “Mo lesu tale yani; a cava beka ka'u sa cakava vei iko?”

²¹ A lesu tale yani o Ilaisa, ka vakamatea na nona bulumakau ni siviyara. A sa vakayagataka na i yaya ni siviyara me buka, me vakasaqara kina na lewe ni manumanu, ka sa solia vei ira na tamata me ra kana. A qai cavutu me muri Ilaijia, ka qaravi koya.