1 Samuela 7 - Ai Vola Tabu Ena Vakavakadewa Vou

¹ Era a qai lako mai na kai Kiriaci Jiarimi, ka kauta cake na Kato ni Veiyalayalati i Jiova ki na vale i Amenatave ka toka ena delana mai Kipea. Era a qai vakatabui Iliesa na luvena me qarava na Kato ni Veiyalayalati.

Sa Veiliutaki e Isireli o Samuela

² E a dede na kena tiko mai Kiriaci Jiarimi na Kato ni Veiyalayalati ka rauta ni ruasagavulu taucoko na yabaki na kena dede. Ia ena gauna kece oqo, era sa tagi kina vei Jiova na veimataqali e Isireli.

³ A qai vosa vei ira kecega na veimataqali i Isireli o Samuela, ka kaya, “Kevaka o ni via lesu tale vei Jiova ena yalomuni taucoko, ia mo ni biuta laivi na veikalou tani kei na Aseteroci talega. Mo ni vagolea vakatabakidua na yalomuni vei Jiova ka qaravi koya duadua ga; ena qai vakabulai kemuni o koya mai na ligadra na kai Filisitia.

⁴ Era a qai biuta tani na kalou o Peali kei Aseteroci o ira na Isireli, ka qaravi Jiova duadua ga.

⁵ Sa qai tukuna o Samuela, “Mo ni soqoni vata yani na Isireli kece ki Misipa me'u na masulaki kemuni vei Jiova.”

⁶ Era a qai soqoni vata ki Misipa, era a taki wai, ka sovara me vaka na i soro ena mata i Jiova, ka ra lolo ena siga taucoko o ya; era a qai kaya, “Eda sai valavala ca vei Jiova.” A sa walia na nodra leqa eso na Isireli o Samuela mai Misipa.

⁷ Ia ni ra rogoca na kai Filisitia ni ra sa soqoni vata mai Misipa o ira na Isireli, era a qai lako cake na nodra turaga na kai Filisitia me ra veivala kei ira na Isireli. Ia ni ra sa rogoca o ira na Isireli na ka oqo, era sa rerevaki ira na kai Filisitia.

⁸ Era a kaya vei Samuela o ira na Isireli, “Me kakua ni mudu na nomu tagi vei Jiova na noda Kalou, ka me vakabulai keda o koya mai vei ira na kai Filisitia.”

⁹ A kauta o Samuela e dua na lami ka sa sucu tiko vei tinana, ka la'ki vakacabora taucoko me i soro kama vei Jiova; a tagi o Samuela vei Jiova ena vukudra na Isireli, a sa rogoci koya ko Jiova.

¹⁰ Ia ni vakacabora tiko na i soro kama o Samuela, era a toro voleka mai na kai Filisitia me ra veivala kei ira na Isireli; a kurukuru vakadomoilevu na domo i Jiova vei ira na kai Filisitia ena siga o ya, ka curumi ira na taqaya kei na veilecayaki, ka ra se e matadra na Isireli.

¹¹ Era a lako mai Misipa na Isireli ka vakacemuri ira na kai Filisitia, ka vakamatei ira me yaco sara ki Pecikari.

¹² A sa taura e dua na vatu o Samuela, ka vakaduria ena kedrau veimama o Misipa kei Seni, ka vakatoka me yacana o Epenisa, ni sa kaya, “Sa vukei keda ko Jiova me yacova na gauna oqo.”

¹³ Era a vakamalumalumutaki na kai Filisitia, ka sega tale ni curuma na nodra i yalayala na Isireli. E a veivala tiko kei ira na kai Filisitia na liga i Jiova ena gauna taucoko i Samuela.

¹⁴ Ia a vakasukai tale vei ira na Isireli na veikoro era a kovea na kai Filisitia, mai Ekironi ka me yaco i Kaca; era a taura tale na Isireli na nodra vanua mai vei ira na kai Filisitia. A sa yaco talega na tiko veisaututaki ena kedra maliwa na Isireli kei ira na kai Kenani.

¹⁵ A sa veiliutaki voli o Samuela ena gauna taucoko ni nona bula.

¹⁶ Ena veiyabaki kece, a sa dau wavoki o koya mai Peceli kei Kilikali vata kei Misipa, ka dau walia na veileqa eso ena kedra maliwa na Isireli ena veivanua kece oqo.

¹⁷ A sa qai dau lesu tale o koya ki na nona i tikotiko mai Rama, ka sa ia talega na cakacaka ni dauveilewai mai kea. A sa tara e kea e dua na i cabocabonisoro vei Jiova.