1 Cesalonaika 1 - Ai Vola Tabu Ena Vakavakadewa Vou

¹ Oqo na i vola mai vei iratou o Paula, kei Sailasa, kei Timoci — Kivei ira na lewe ni soqosoqo lotu mai Cesalonaika, o ira era sa nona na Kalou o Tamada kei na Turaga ko Jisu Karisito. Me nomuni na loloma kei na vakacegu.

Na Nodra Bula kei na Vakabauta na Kai Cesalonaika

² Keitou sa dau vakavinavinaka tikoga vua na Kalou ena vukumuni kecega, ka dau nanumi kemuni ena neitou masu.

³ E sega ni mudu na neitou vakananuma ena mata ni noda Kalou o Tamada na nomuni vakavatukanataka na nomuni vakabauta, na nomuni cakacaka vagumatua ena vuku ni nomuni loloma, kei na tudei ni nomuni vakanuinui vua na noda Turaga ko Jisu Karisito.

⁴ Kemuni na weka i keitou, keitou sa kila ni sa lomani kemuni na Kalou ka sa digitaki kemuni o koya mo ni nona dina sara.

⁵ Ni keitou a sega ni kauta yani vei kemuni na i Tukutuku Vinaka ena vosa walega, ia ena kaukauwa ga kei na Yalo Tabu, kei na neitou sa vakadinadinataka ena vu ni yalo i keitou ni sai tukutuku dina. O ni kila vinaka tiko na i vakarau ni neitou bula ena gauna keitou a sa tiko vata kina kei kemuni. Keitou a cakava vaka o ya mo ni kila vinaka cake kina.

⁶ O ni a mani vakadamurimuri keitou ka vakadamurimuria vaka talega kina na Turaga. Ka dina ga ni o ni a vakararawataki vakalevu kina, ia o ni sa vakabauta na i tukutuku ena reki sa vu mai vua na Yalo Tabu.

⁷ O ni sa yaco kina mo ni i vakaraitaki vei ira kecega na tamata vakabauta mai Masitonia kei Akaia.

⁸ Ka ni sega walega ni o ni vakavuna me rogo na i tukutuku ni Turaga mai Masitonia taucoko kei Akaia, ia sa tete talega na i rogorogo ni nomuni vakabauta na Kalou ki na veiyasana kecega, ka sa sega tale na ka me keitou kaya kina.

⁹ Era sa dau veivosakitaka o ira kece na tamata e kea na nomuni ciqomi keitou ena gauna keitou a sikovi kemuni kina, kei na nomuni a saumaki mai na veimatakau ki vua na Kalou, mo ni qarava kina na Kalou bula ka dina;

¹⁰ ka mo ni waraka na Luvena me lako mai lomalagi, o koya ka a vakatura mai na mate, o ya ko Jisu; o koya sa vakabulai keda mai na cudru ni Kalou e sa lako tiko mai.