Yoane 1 - UPANGANO UPYA

Iswi lyawa untu

¹ Apa ntangulo pali Iswi ni Iswi lyaliko kuli Leesa, nalyo Iswi lyali Leesa.

² Liyo intangulo lyali kuli Leesa.

³ Fyoshi fyaombike kuli wiyo na apasi wiyo chitali chiombeke chimwi chino chaombeka.

⁴ Unkasi munali umuno mwali upuma, nao upuma wali umwengelela uku yantu.

⁵ Nao umwengelela ukuluswefya un-nchanda, ni chanda chitangi chiusimye.

⁶ Kwisile untu atumilwe ukufuma kuli Leesa, isiina lyaakwe Yoane.

⁷ Wiyo wisile ukuti alande umwengelela, ukuti yoshi yasumile kuli wenewe.

⁸ Wiyo atali umwengelela, leelo wisile ukuti alande umwengelela.

⁹ Kwali umwengelela unkola uno ulukosa antu yoshi, ulwisa kuno ukusi.

¹⁰ Iswi lyeliko kuno ukushi, nukushi kwene kwaliko kuno lili, leelo akusi yatammanyile.

¹¹ Wisile ukwakwe, leelo ayali yaakwe yatammulile.

¹² Leelo yoshi yano yammulile. wayapile amaka ayakuwa ana yi Leesa, ayano yasumile ishina lyaakwe.

¹³ Yano yatafilwe uku wasi, nanti uku kukasama kwa mwili, nanti uku kukasama kwa antu, leelo kwi Leesa.

¹⁴ Nalyo Iswi lyaombike umwili, likala kuno tuli, neswe twaulola ukulu wakwe, ukulu ndi kuti uMwana wenga wino afumile kuli Tata, uwa nkumbu ni chumi.

¹⁵ Yoane wannansile, awangula ukwiswi lyaakwe, wati: “Alawi uwino natasile amaswi yaakwe, wino alwisa uku chisila chane, waliko inkolelo yane.”

¹⁶ Kuno uku winji wa nkumbu shaakwe, sweswe swensi twapokelile inkumbu apa nkumbu.

¹⁷ Kuno Ntambi yafimilwe uku makasa yi Mose, leelo inkumbu ni chumi sisile ukwikasa li Yesu Klisto.

¹⁸ Kusi untu wino watana walola Leesa nanti limwi; uMwana wi Leesa wino ali pa chifuwa chi Tata, wafilwe wenga, uwino watulangilile.

Usyuta wi Yoane

¹⁹ Nau uli usyuta wi Yoane. Ayudea pano yantumile yakapela na aLevi ukufuma ku Yelusalemu, ukuti yamtondoshe, waati: “Wewe wini?”

²⁰ Nawe wasumile, atachili akane, wasumile fino wene asi Klisto.

²¹ Yamtondosha, yaati: “Nga wewe wini, fwandi? We Elia?” Wafwanga, waati: “Asi nene.’ “Wewe ilau lili?” Wafwanga, waati: “Awe!”

²² Nga yannena, yaati: “Wewe wini? Ukuti tukanene yano yatutumile. Wemwi apa lwako ulutuli?”

²³ Waati: “Nemwi nene iswi lya ntu lino lilulaizya un-nyika: Ololini ishila ya Mwene; ndi fino ilau Isaya watasile.”

²⁴ Na yaya yano yatumilwe yafumile uku aFaliseo.

²⁵ Yamtondosya nu kunnena, yaati: “Nga fino ulubatisha, ndi asi wewe Klisto, nanti Elia, nanti ilau liye?”

²⁶ Yoane wayanena, waati: “Nene ndubatisha uku mashi. Pali mwemwe awimilile wino mutammanile mwemwe.

²⁷ Uwino alwisa uku chisila chane, wino nene ntalingine ukutolompola imikowa ya nfwato shaakwe.”

²⁸ Ifintu vi vyaombike uku Betania, umbalama yi Yodani, kuno Yoane wali angi alubatisha.

Mwana-nfwele wi Leesa

²⁹ Uwanda wa uwili alola Yesu alwisa kuno ali, walanda, waati: “Lolini, uMwana-nfwele wi Leesa, wino alutisya amaifyo ya kushi.

³⁰ Wiyo uwino nafwashile amaswi yaakwe, ukuti: alwisa untu uku chishila chane, wino ali inkolelo yane, kuno waliko inkolelo yane.

³¹ Nene kwene ntammanyile, leelo kuti amanyike uku Islaeli, ichino nene nishile ndubatisha uku masi.”

³² Kaili Yoane wafwasile, ukuti: “Nalola uMweso Nswefu uluwika wa nkunda ukufuma umwiyulu, nao wawa pano ali.

³³ Nene kwene ntammanyile, leelo wino wantumile ukuyubatisha uku masi, uwino wanenile, waati: Wino walola Mweso wamwikila, nu kwikala panali, wiyo uwino alubatisha uku Mweso Nswefu.

³⁴ Nene nalola nu kulanda fino wiyo uMwana wi Leesa.”

Alondeshi ya ntangulo

³⁵ Na kaili uwanda wa uwili, Yoane wimilile ponga na alondeshi yaakwe yaili.

³⁶ Alola Yesu alupita, afwanga, wati: “Lolini, uMwana-nfwele wi Leesa!”

³⁷ Yaya alondeshi yaili yapulika alufwanga, yanlondela Yesu.

³⁸ Nga Yesu apepela ayalola yanndondile, ayanena, ati: “Mulusita chani?” Yannena, yaati: “Labi, (alikuti: Kasambilisha) ukuluikala kwi?”

³⁹ Wayanena, waati: “Nguni, mwampalola.” Nga yaya yalola pano akuluikala, yikala ukwakwe uwanda uo. Nalyo lyalile ilila.

⁴⁰ Andelea unnina wi Simoni. Petlo, walipo pali yaili yano yampulike Yoane nu kulondela Yesu.

⁴¹ Intangulo kwene wiyo wawine Simoni unnina, wannena, waati: “Twalola Mesia (alikuti: Klisto).”

⁴² Nga amtwala kuli Yesu, nawe Yesu anndolekesha, afwanga, wati: “Newe uli Simoni, umwana wi Yoane; nakutema we Kefa” (alikuti: Petlo nanti ifinga.)

⁴³ Nu wanda wa uwili wakasime ukuya uku Galilea, nawe alola Filipo. Yesu wannena, waati: “Ndondela.”

⁴⁴ Na Filipo ukumwao uku Betsaida, unkola nsi ponga na Andelea na Petlo.

⁴⁵ Filipo alola Natanieli, annena, wati: “Twalola wino waandikilwe na Mose um-Maandiko na muli kalakula: Yesu, umwana wi Yosefu, untu wa ku Nazaleti.”

⁴⁶ Natanieli wannena, waati: “Chingawela iswi lisipe ukufuma uku Nazaleti?” Filipo wannena, waati: “Nguna, ulole.”

⁴⁷ Nga Yesu alola Natanieli alwisa kuno ali, wafwanga nu kunnena amaswi; yaakwe, waati: “Lolini, alawi umu-Islaeli ningo, unkasi kakwe asi nu-chenjesu.”

⁴⁸ Natanieli wannena. waati: “Wammanya uli?” Yesu wannena, waati: “Pano Filipo achili akwite, pano walu uli umwisika ya nsanfu, nali nkuwine.”

⁴⁹ Natanieli wannena, waati: “Labi, wewe uli Mwana wi Leesa, we Mwene wa Islaeli.”

⁵⁰ Yesu wannena, waati: “Kuno nakunena, nati: Nali nkuwine umwisika ya nsanfu, wasumila? Ululola ifintu ifikulu ukuluta efi.”

⁵¹ Wannena, waati “Umwenemo, umwenemo, ndumunena: Mululola iyulu lyalepuka na yamalaika yi Leesa yalukwela nu kwika apa Mwana-ntu.”