Yakobo 2 - UPANGANO UPYA

Mutawilila kumwi

¹ Yachane, usumilo wino um-Mwene witu wa ukulu Yesu Klisto, mutachiwa nao uku kuwilila antu yamwi.

² Kuno nguntu umwi wingila un-ng'anda ino iya kusalikila, nawe aswite mbalaminwe ya zaabu ni myenda imichindame, ichisila wiza umpina, wasizya imyenda,

³ nemwe ngi mwanchindika wilye, wino aswite imyenda imichindame nu kunnena ukuti: “Wikala wewe pano pali ningo,” nu kunnena umpina wilye, ukuti: “Wemwi wimilila palye,” nanti ukuti: “Wikala uku mulu yane.”

⁴ Chene! mutati muchite usolozi um-myenzo yino, mwawa yaputuzi ya melenguzi maipe?

⁵ Yachane yakundikwa, pulikisyini. Chene! Leesa atasolwile apina ya nsi i, yawe asavi ya usumilo na ya upyani wa wene uno wayalainye kuli yano yamkunda?

⁶ Leelo mwemwi mwamsula umpina. Chene! Asavi yatalumuzunya mwemwe nu kumutwala uku maka uku ng'anda-yauputuzi-wa-milandu?

⁷ Asi yano yalusula ishina lilye isifu lino mwapiwa?

⁸ Leelo ngi mwalilondela isunde lya wene ndi fino lyandikwe, ukuti: “Ukunde unnyonko ndi fino waikunda wenkola,” muluchita ichashipa.

⁹ Leelo ngi mwawililila antu yamwi, muluchita iifyo nu kuiyangulwa na Masunde fino mwe yononi.

¹⁰ Kuno untu wensi ngi walema amasunde yoshi, leelo ngi wonona lyonga, angi atonona um-Masunde yoshi kwene.

¹¹ Kuno wino wavwanzile, waati: “Utachichita ifya upundu,” uli wino waatile: “Utachumola.” Ichino nanti utachisile ivya upundu, leelo ngi umola, utonona masunde yoshi.

¹² Fwaangi mwemwe nu kuchita wa antu, yano yaluyangulwa uku masunde ya ukauwela.

¹³ Kuno uyanguzi usi ni nkumbu kuli wino atakulolela inkumbu; leelo inkumbu zikuutensya apa uyangusi.

Usumilo ni milimo

¹⁴ Yachane, chingamwaswa chani, ngu ntu wafwanga ukuti ali nusumilo leelo atakuuomba? Chene! usumilo uo ungamfyusya?

¹⁵ Ngu wachitu umonsi nanti umwanachi ali tupu nu kuulilwa ivyakulya,

¹⁶ umwi pali mwemwe wayanena, waati: “Pitangi lumi, mukotae umoto nu kwikuta,” leelo nanti kuyapa chimwi, chino yalusita, chingazwa chani?

¹⁷ Ifino chili nu zumilo, ngusi ni milimo, angi waufwila.

¹⁸ Leelo untu angafwanga ukuti: “Wemwi uli nusumilo, nene nkwite imilimo.” Ndanga usumilo wako nanti kuchita imilimo, nene nankulanga usumilo wane uku nzila ya kuchita imilimo.

¹⁹ Wemwi uzumile fino Leesa ali wenga? Wachita ningo; ni viwa navyo kwene vizumile leelo nu kutetema.

²⁰ Leelo ulusita ukumanya we ntu wino usi na chimwi, fino usumilo ngi waula imilimo usuvyala?

²¹ Chene! Tata witu Ablaamu atalilwe ukuwa ni chumi uku nsila ya milimo, pano wafimile Isaka umwanakwe pa altale?

²² Walola fino usumilo waomvile ponga ni milimo yaakwe, na fino usumilo ulye wafikilile uku nzila ya milimo.

²³ Amaandiko yalye yafikilile, yano yaatile: “Ablaamu wazumile Leesa, walilwa fino wa chumi,” nawe wisilwe ikatakwe na Leesa.

²⁴ Mwalola fino untu akulwalilwa ichumi uku kuchita imilimo, asi ku usumilo sile.

²⁵ Ifino na Laabu kwene, wilye chizelele, Chene! atalilwe ukuwa ni chumi uku kuchita imilimo, pano wapokelile yano yatumilwe, wayafumizya ukunzi uku nzila inji?

²⁶ Kuno ndi fino mwili ndi waula umweso, wafwa, ifino nusumilo kwene, ngi waula imilimo angi wafwa.