Yakobo 1 - UPANGANO UPYA

¹ Yakobo umuofi wi Leesa nu wa Mwene Yesu Klisto, uku nko ikumi na ziili zino zyasambala, ndumulaula.

Usumilo na masosho

² Yachane, welengulini fino ukuchimba kutupu, ngi mwaponela um-masosho tuputupu.

³ Kuno mwamanya fino kwesiwa kwa usumilo wino kukuleta unte.

⁴ Leelo unte ufikilile unnimo wakwe, kuti muyanye nu kuyana nanti kuulilwa chimwi.

⁵ Leelo ndi umwi pali mwemwe waulwa mano, apepe kuli Leesa, wino akulupa antu yoshi uku wila, nanti kulandaula; nawe alupiwa.

⁶ Leelo alombe uku usumilo nanti kusisita, kuno wino alusisita, akoline niwimbi lya muli yemba, lino lisensilwe nunsa, nu kutenkelwa eku na kuo.

⁷ Kuno untu ndi wiyo atachelengula, fino alupokelela chimwi uku Mwene,

⁸ untu wa myenzo yiili akusisita unnzila zyaakwe zyonsi.

⁹ Leelo uwachitu wino asi nizina achimbae um-ukulu waakwe

¹⁰ Leelo unsavi achimbe un-kuchefiwe kwakwe, kuno alulukuta wa ngala ya mwisote.

¹¹ Kuno ilanzi likulupalala ni michachasi inyazya isote ngi ngala zilukuta, nuzipe waakwe ononeka. Ifino nu nsavi kwene aluyongoka un-nzila zyaakwe.

Ilunga lya mazosyo

¹² Inkata yaakwe untu wino aluzyansya um-mazosyo, kuno ngi wapota aluipokelela inkata ya upuma, yino Mwene walainye yano yamkunda.

¹³ Untu ndi wingila um-mazosyo, atachiti: “Leesa wangesya.” Kuno Leesa atanga wesiwe ni viipe, nanti unkola kwene atanga wesye untu.

¹⁴ Leelo ntu wensi akulwingila um-mazosyo uku kulondelela itama nu kukumbuka kwakwe unkola.

¹⁵ Nga apano itama isenda inda, ifyala iifyo, niifyo liyo pano lyakula, likulufyala infwa.

¹⁶ Yachane yakundikwa, mutachizosiwa.

¹⁷ Ukufima konsi kuzipe nu wila onsi uile, vikufuma mwiyulu kuli Tata wa myengelela, wene atakuleoka, nanti ukuleta ichinzingwa cha kusenuka-senuka.

¹⁸ Uku kukunda kwakwe unkola watuvile sweswe ukwiswi lya chumi, kuti tuwe ya ntomolo ya vilengwa vyaakwe.

Kupulika nu kuchita

¹⁹ Mumanyile yachane yakundikwa: Chilantu awangupale ukupulika, leelo atachangupala ukuvwanga, nanti ukulakalika.

²⁰ Kuno ichilakali cha ntu chitakuomba ivya chumi pali Leesa.

²¹ Ichino sumbilini ukutali unyamvi nuipe wonsi, nu kupokelela uku utonsu iswi lilye, lino lyapezilwe muno muli, lino lingafyusya imyenzo ino.

²² Muwe yakachita yiswi, mutachiwa yakapulika sile; angi muluuzosya apalwino.

²³ Kuno ndi umwi wawa ikapulika wiswi sile nanti kulichita, untu wiyo akoline nuntu wino aluulolekesya usyu waakwe un-chilole fino ali.

²⁴ Kuno aluulola asya ampita, liyo kwene annatila fino ali.

²⁵ Leelo wino walolekesya masunde ya kapanga aya kuuwela nu kwikala mwenemo, atachiwa ikapulika wa kulatila, leelo umuofi wa nnimo, wene wamwa ninkata un-kuomba kwakwe.

²⁶ Untu ngi welengula ukuti ali ni dini, leelo atakutungulula ululumi lwakwe, na kuno angi aluuzosya ummweso wakwe, idini ya ntu wiyo iya chaka chaka.

²⁷ Idini iswepe kwaula ilyala apa maaso yi Leesa Tata, iyi: ukusungula ana asyala na asimbe um-machulo yao, nu kuukola yatautela um-fiipe fya kuno ukunsi.