Uswelulo 3 - UPANGANO UPYA

Amaswi ku Salidi

¹ “Na kuli malaika wikongani lya ku Saldi andika, uti: Wino ali na ilye iMyenzo saba iyi Leesa ni ntanda zilye saba, wavwanga ifintu vi, waati: Manyile milimo yako, fino uli nizina lya kuwa nupuma, leelo wafwa.

² Uwe wa kuuchesya, ukomye ifintu fino vyasyalila, fino vilusita ukufwa. Kuno ntawine imilimo yako fino yafikilila apa maaso yi Leesa wane.

³ Ichino leelo welengula ngi wapokelile uli nu kupulika, ifino uvisunge, nu kuvipela. Leelo ngu taluuchesya, ndwiza wa mwivi, nga utalumanya lino ndukwizila.

⁴ Leelo uli na mazina mache um-Saldi, antu yano yatafisizye imyenda yao. Nayo yalupita ponga nene angi yazwite imyenda imitiswe, kuno chiyaile.

⁵ “Wino wacha wapota, wene aluzwikwa imyenda imitiswe wi yao; nga ntaluzimya izina lyaakwe un-chitabu cha upuma; leelo ndwimikila izina lyaakwe apa maaso yi Tata na pa maaso yi yamalaika yaakwe.

⁶ “Wino ali na makutwi, apulike iswi lino Mweso alunena makongani.

Amaswi ku Filadelfia

⁷ “Na kuli malaika wikongani lya ku Filadelfia andika, uti: Wiwi uNswepe, uWa-Chumi, wino ali nu luchinji lwi Daudi, wino ngi wayula kusi angayala, nawe ngi wayala, kusi angayula, wavwanga ifintu vi, waati:

⁸ “Manyile imilimo yako: Lola nakupa unnyango uno wayulwa apa maaso yako, uno kusi angauyala; kuno uli na maka mache, newe wasunga iswi lyane, nga utachili Ukane izina lyane.

⁹ Lola, nankupa a mwikongani lyi Shetani, yano yaluti: Swe aYudea; nayo asi yaliyo, leelo yaluvwanga ufi. Lola nduyachita yize yafukame apa mulu yako nu kumanya fino nakukunda.

¹⁰ Kuno walema iswi lya kumpembela, nene kwene nankutula apa kweziwa kuno kulwizila insi yoshi, ukwezya yano yatenzi un-nsi.

¹¹ Ndwiza zuwa; lemasya chino uli nacho, atize umwi atole Inkata yako.

¹² “Wino wacha wapota, nduchita awe luzyiko un-ng'anda-nkulu-iyi Leesa wane, atalufuma-mo kaili nanti uche; nene ndwandika panali izina li Leesa wane nizina lya nzi wi Leesa wane, iYelusalemu mpya, uno ulwika kufuma mwiyulu kuli Leesa wane, nizina lyane nenkola ilipya.

¹³ “Wino ali na makutwi, apulike iswi li lino Mweso alunena makongani.

Amaswi uku Laodikea

¹⁴ “Na kuli malaika wikongani lya ku Laodikea andika, uti: Wino ali Amina, Syuta wa kutailwa nu wa chumi, uwa ntangulo apa vilengwa na Leesa, wavwanga ifintu vi, waati:

¹⁵ ‘Manyile imilimo yako, fino utazukile nanti ukulungula. Chali chiwe inkata ngu uzukile nanti ukulungula.

¹⁶ Ichino fino uli chizunzuwe, nga utazukile nantu kulungula, nankuputa ufume un-nnomo wane.

¹⁷ Kuno uluti: Nene nsavi, nausavya nga ntaulilwe chimwi. Newe utamanyile fino wewe nnanda, we wa kukumbukilwa, nupina, nupofu, uli tupu,

¹⁸ nakupa iswi, ukale ukwane zaabu yino yengulwa um-moto, kuti uwe nsavi, ni myenda mitiswe uzwale, kuti insoni zya kwikala tupu zitachiloleka, nu nnembo wa maaso uwa kupakala, kuti ulole.

¹⁹ Yoshi yano nakunda, nkuluyuma nu kuyasunda; ichino uwe nu nte, uvipele.

²⁰ “Lola, ngimilile apa nnyango ndukong'onsya. Ngi untu wapulika iswi lyane, wayula unnyango, namwingila mulaliwe; nene nandyanga ponga nawe, nawe kwene ponga nene.

²¹ “Wino wapota, nampa ukwikala ponga nene apa chisumbi chane icha ukulu, ndi fino nemwi napoteka, nikala ponga na Tata pa chisumbi chakwe cha ukulu.

²² “Wino ali na makutwi, apulike iswi li lino Mweso alunena makongani.”