Uswelulo 22 - UPANGANO UPYA

¹ Apano wasya wandanga uluzi lwa manzi ya upuma, luno lulumesa kunti bilauli, lwafuma un-chisumbicha-ukulu ichi Leesa, ni cha Mwana-nfwele.

² Apakasi ya nzila yaakwe, uku lusansa lu na lu lwa luzi lulye, pali chiti cha upuma, chino chilusêka ivisêke maila ikumi na yaili, chino chilucha ivisêke vyaakwe chila mwezi; na mafwa ya chiti chiyo aya kupozya antu.

³ Nga kutaluwa chimwi chino chatipwilwa kaili. Ni chisumbi-cha-ukulu ichi Leesa ni cha Mwana-nfwele chiluwamo. Naomvi yaakwe yalumwombelanga,

⁴ nayo yalunnola usyu wakwe, nizina lyaakwe liluwa apa mpuma zyao.

⁵ Nga kutaluwa usiku kaili; yatalusita umwengelela wi tala nanti umwengelela wi lanzi, kuno Mwene Leesa aluyakozezya; nayo yalulâsa manda ti na ti.

Kwiza kwi Yesu

⁶ Apano wannena, waati: “Amaswi ya aya kutailwa ni chumi. Nu Mwene, Leesa uwa myenzo ya malau, watumile malaika waakwe ukulangilila aomvi yaakwe ifintu fino vilungime ukwiza zuwa.

⁷ “Lola ndwiza zuwa. Inkatakwe wino alemisye amaswi ya ulau uwa chitabu chi!”

⁸ Ne Yoane, wino napulika nu kuvilola ifintu fiyo. Walangi pano napulika nu kuvilola, naponile ukuti nfukamile apa mulu yi malaika wilye wino wandanga fiyo.

⁹ Leelo wene wanena, waati: “Lola, utachichita vi! Nene momvi ponga newe nu wachako, apa amalau, nu wi yalye yano yalemile amaswi ya chitabu chi. Fukamila Leesa!”

¹⁰ Wanena, waati: “Utachi yatelela akamanyililo amaswi ya ulau ya chitabu chi, kuno amanda yao iyapalamila.

¹¹ Aakuchita viipe, achite nu kuluta. Nu ntakati, achite utakati nu kuluta. Nu wa chumi achite ivya chumi nu kuluta; nu nswepe aswefiwa nu kuluta.

¹² “Lola ndwiza zuwa na malipilo yane yali ponga nene, ukwizulipa chila untu ukuyana nu unnimo; wakwe.

¹³ Nene Alfa na Omega, Intangulo ni Chisila. Uwantangulo nu kumalilila.”

¹⁴ Inkata yao yano yalufula imyenda yao, yawe nu utumo wa kulya ivisêke vya ichiti icha upuma, nu kwingila un-nzi um-milyango yaakwe.

¹⁵ Ukunzi kuo kuli imbwa, nalozi, napundu na yumozi na yano yakupepa imyao, na wensi wino wakunda ufi, nu kuuvwanga.

¹⁶ Nene Yesu, natuma malaika wane kuti amwimikile ifintu fiyo um-makongani. Nene ndi Sinda nu mpanda wi Daudi, nankokola-wa-katondo aluyengesa.”

¹⁷ Nu Mweso na Nawinga. yaluti: “Nguna!” Na wino alupulika, ati: “Nguna!” Na wino ali nu nsala awize, na wino alusita atola amasi ya upuma uwila.

¹⁸ Ndumwikila usyuta chila ntu wino alupulika amaswi ya ulau ya chitabu chi: untu wensi ngi wongelezya-po chimwi, Leesa alumongelezya ivilumbelo fino vyandikwe un-chitabu chi.

¹⁹ Nu ntu wensi ngi waatisya chimwi um-maswi ya ulau ya chitabu chi, Leesa alutisya akai kakwe uku chiti cha upuma, nu ku nzi ulye unswepe, uno amaswi yaakwe yaandikwe un-chitabu chi.

²⁰ Wino aluyasyutila ya, aluti: “Endita, namwiza zuwa!” Amina. Nguna, Mwene Yesu!

²¹ Inkumbu zya Mwene Yesu ziwe ponga nemwe mwensi. Chiwe fiyo kwene.