Uswelulo 21 - UPANGANO UPYA

Iyulu ninsi mpya

¹ Apano nalola iyulu lipya ninsi mpya. Kuno iyulu ninsi ya ntangulo vyapita; nanti yemba atachiliko kaili.

² Nga nalola unzi ulye umswefu, Yelusalemu mpya, ulwika ukufuma umwiyulu kuli Leesa, wateyanyiwa wi nawinga, wino atayemviwa kuli iya.

³ Napulika iswi kulu ukufuma un-chisumbi chilye cha ukulu, liluti: “Lola, amikalo yi Leesa yali ponga nantu; nawe alwikala ponga nayo, nayo yamwa antu yaakwe. Na Leesa unkola wamwanga ponga nayo.

⁴ Nawe wanjapyila amonsozi yoshi um-manso yao; kutaluwa infwa kaili, nanti ukulosya, nanti ukulila, nanti ukuwaya kutaluwako kaili; kuno ifintu vya ntangulo vyasila.”

⁵ Nawe wino watenzi apa Chisumbi chilye cha ukulu, waati: “Lola, nduchita ifintu vyonsi ukuwa ivipya.” Waanena, waati: “Wandika: kuno amaswi ya aya kutailwa ni chumi.”

⁶ Waanena, waati: “Ichiombeka. Nene Alfa na Omega. Intangulo ni chisila. Nene namnwesya uwa lusala uwila kufuma kuli kafukoka wa manzi ya upuma.

⁷ Wino Wapota alupyana ifintu vi, nene nduwa Leesa wakwe, nawe aluwa umwanane.

⁸ Leelo aya ngofi na yano yatasumile, na autakati na yumozi, napundu, nalozi, na yao akupepa myao, na yaufi yoshi, uwikalo wao umuli yemba wilye uwa moto ni sanku; alai ali mfwa ya uwili.”

Yelusalemu mpya

⁹ Nga awiza wenga pali yamalaika yaye saba, yano yali na zilye ingeso saba, zyazyuzile ivilumbelo saba ivya kumalilila, nawe avwanga, ati: “Nguna ku, nene nankulanga nawinga wilye nka Mwana-nfwele.”

¹⁰ Wansenda uMweso fika nu ku mwamba unkulu untali; wandanga unzi ulye unswepe, i Yelusalemu, ulwika ukufuma umwiyulu kuli Leesa;

¹¹ uwa utensyo wi Leesa, nu mwengelela waakwe wakolenkine nifinga lya mpia tupu, wifinga lya almasi, unswepe kunti bilauli.

¹² Wali nilinga inkulu, litali; lili ni milyango ikumi na yiili, na pa milyango ilye mwali yamalaika ikumi na yaili, na mazina yaandikwe-po, nayo amazina ya nko ikumi na ziili izya Islaeli.

¹³ Uku kafumandaka imilyango itatu, nu ku kaeya imilyango itatu, nu ku katutu imilyango itatu, nu ku kawa ndaka imilyango itatu.

¹⁴ Ni linga lya nzi lyali ni viimbili ikumi na viili, na pa viimbili fiyo pali amazina ikumi na yaili aya mitume ikumi na yaili aya Mwana-nfwele.

¹⁵ Na wino wanvwanzizye wali ni lonje lya zaabu, kwa kuti aulinge unzi uo, ni milyango yaakwe ni linga lyaakwe kwene.

¹⁶ Nu nzi uo wali nutali waakwe ulingine nu salazu wakwe; alinga unzi uo ni lonje liyo, wali wa kilometa ielfu ziili ni myanda ini; utali waakwe na salazu waakwe nu kuya umwiyulu, ichili chonga.

¹⁷ Walinga ilinga lyaakwe, liwa amakasa umwanda na makumi yani na yani, uku chilingilo cha untu, ali kuti, ichi yamalaika.

¹⁸ Nunkulo wi linga lyaakwe wali uwa almasi. Nunzi uo wali uwa zaabu nswepe ukolenkine ni chilole chiswepe.

¹⁹ Ni viimbili vi linga lya nzi iviyemvya na mafinga tupu tupu aya mpangila. Ichiimbili cha ntangulo chali i Almasi; icha uwili yakuti iSafila; icha utatu i Kalekedonia; icha uni Zumalidi.

²⁰ Icha usano i Saldoniki; icha sita, Sadio; icha saba i Klisolito; icha nnane, i Belulo; icha tisa, i Topazi; ichi kumi i Klisopazi; ichi kumi na chonga, i Yasinte; ichi kumi na uwili, Ametisto.

²¹ Ni milyango ilye ikumi na iili yali i lulu ikumi na ziili; chila unnyango wali ilulu yonga, ninzila ya nzi isaabu nswepe kunti chilole chino chengululwa nkani.

²² Nene ntawine ng'anda-nkulu-iyi-Leesa mwenemo; kuno uMwene Leesa uwa Maka-yonsi nu Mwana-nfwele, alu ng'anda-nkulu yaakwe.

²³ Nunzi ulye utalusita ilanzi nanti mwezi ukuwala mwenemo; kuno ukulu wi Leesa ukuluuswefezya, na tala waakwe uMwana-nfwele.

²⁴ Na antu yoshi yalupita um-mwengelela wakwe. Na ene ya nsi yakululeta ukulu wao mo.

²⁵ Ni milyango yaakwe italuyalwa unsanya, kuno muo mutaluwa usiku.

²⁶ Nayo yaluleta ukulu nu nchinzi wa antu unkasi.

²⁷ Na mwenemo chitalwingila nanti uche chino chili nu uipe, nanti uwino aluchita utakati nanti ufi, leelo yalye mpela, yano yaandikwa un-chitabu cha upuma icha Mwana-nfwele.